1 Oyesu she ebeni bita kweyi ga agbabo ko Oyahuda, kweyi sheyi ki ishu ko Ojoda. Ewa ka asuse we ebe nu, oya fuwoza byoni oya ya hagye ni.

2 Ashishini ka Awofarisi we ebe nu ko moma, adoka mo, <<Owo ono la shini ongo na kabo kpo onya nu?>>

3 Okyogwu mo, <<Oji ni Omusa ke kadala?>>

4 Akamo, <<Omusa daha oshu ko to okpa shini na wo olobene ko kabo ko onya kpo oba kweyi nenya.>>

5 Oyesu kyogwu mo, <<Ebe ko otu bibi kala pini yo Omusa ko ono mani da la. 6 Bwi ikyikyo kese, Owuso <yo ongo kpo onya.>* 7 <Ikweyi koni ongo ya shi inanu kpa adanu bita kweyi ya gbo onya nu, 8 kweyi ase epa ni wi ikpiye oye kponu.> Bwe ebeni awase epa lo, ke wo oye la.* 9 Ni olemani, oza no Owuso yi gbo ni ashishe naka yiyi lo.>>

10 Ishini abi ipu kole ni, awogboso do Oyesu oka ikweyi kela ni oka ni. 11 Okyogwu mo, <<Kpiri kase ni ka abo kpo onya nu kweyi gbo onya oye, oya beba kpa anu pini oma. 12 Kweyi onya ni tela ko obunu ga gbo oba oye, oya beba kpa anu pini oma.>>

13 Abya ayi leke wa do Oyesu shini na suwa aboneshi, awogboso ke ba gba awase ni apwo mo ana hagye. 14 Ishini Oyesu ma mani ni okyanya kpa awa. Oka da awa mo, <<Ala sha ayi leke bita na we ebe hin, ala ka wuwo obi lo, obula ko Owuso wa akaka wa la. 15 Nyya kadala okwokwoshi, kpiri kase ni zo obula ko Owuso bya ayi leke mani lo, oya ga nu lo.>> 16 Kweyi okwa ayi leke sa akya nu, kweyi suwa aboneshi.

17 Ni Oyesu yipu ki iyawu ya ga ni, ongo oye nyinya wa kwagye obutu nu kweyi doka mo, <<Inofoza neshi, oji ni nyya ya shina pyo olayi ko gbogbo-gbogbo?>>

18 Oyesu doka mo, <<Ojiya ni oyumo ogwu mo ase neshi? Ashishe wa ase neshi lo, so Owuso fufunu. 19 Ogyo oza ni ono ka ni, <Ka ngmase lo, ka beba lo, ka wi lo, ka ba ase ela lo, geyagye da ada wo kpe ene wo.>>>

20 Okamo, <<Inofoza, kpiri ka awoza mani nggeyagye danu bwi ishini nwwo oyi leke ni.>>

21 Oyesu pyi iyi mo kweyi oyimu nu, okamo, <<Oza oye nyo. Ga yo oza ni ogbo kpiri yi ra shini oyi ikwiri yi ko da awoleha, shini ogbo odu iso. Kweyi owa gbosun.>>

22 Ela mani yi iyi ko ongo mani gola. Oga kpo otu byobya, koni ogbo odu nwashika ni.

23 Oyesu pyi iyi ma awogboso kweyi kamo, <<Oya lono do olodu ko go obula ko Owuso!>>

24 Ebeni igbashi ya awogboso kwu ikweyi kela ni oka ni. Oyesu ki kamo, <<Ayi leke, oya lono ko go obula ko Owuso! 25 Oya le kwee do onyakwimi ko bwo owu ko onya sho olodu ko go obula ko Owuso.>>

26 Igbashi ya awogboso kwu kweyi aba diyiwa oka mo, <<Anoho ni aba ngmanu?>>

27 Oyesu pyi iyi muwa kweyi kamo, <<Ebe ka asuse oya gbodagye lo, ebe ko Owuso ke kpiri ko oza oya gege ko ya.>>

28 Obitrus ka danu mo, <<Aha ke sho ojoji bita kweyi gboso!>>

29 Oyesu ka da awa mo, <<Nyya kadala okwokwoshi, kpiri kase ni sho ole nu bita kwe ayinanu nongo kpa anya kwe ada nu kwe inanu kwe ayi nu kwe eho nu ikweyi hin kpe ela hin, 30 oya pye ole ogbogbo, ipu ki ishi mani ole kwe ayene wo nongo kpa anya kwe ene wo kwe ayi wo kpe eho wo kpe egye, oya pyo olayi ko gbogbo-gbogbo ipu ki ishi ni ya wa ni. 31 Awase ni ke wa kikyikyo ba wa ko ogwejeji, ko ogwejeji ba wa kikyikyo.>>

32 Ni abowe ko go Ojerusele ni, Oyesu yo ohobu wa. Kweyi igbashi ya awogboso kwu, kweyi awase ni ki ba gbosuwa ni oshi yuwa kwu. Ebeni oya awogboso igwepa ogwu go okoka kweyi ka da awa oza ni ya wa gbodagye kpa anu ni. 33 Oka da awa mo, <<Aha ba go Ojerusele, kweyi aba ga yo Oyi ka Asuse ya ra da awoteyi ka awosapa kpa awofono. Aba kwe epwo ko yo ngmo, kweyi aba yo ya na abo da awase ni wa Ashashe ni, 34 shini ana gbo owuru, ana tehe sho, ana ya aboshi, ana yo ngmo. Eno ko omweta oya nyiso.>>

35 Ebeni Oyakubu kpo Oyohana ayi ko Ozebedi we ebe ko Oyesu kweyi kamo, <<Inofoza, aba yimu shini oyo oza kpiri ni aha do oka ni daha.>>

36 Oduwoka mo, <<Oji ni ala ba yimu?>>

37 Akyogwu mo, <<Ya ashe ipu ka aha na yagye abore wo, oye na yagye aboshe ipu ko igyashi wo.>>

38 Oyesu ka da awa mo, <<Ala gyo oza ni ala ba doka ni lo. Ala ba gege ko gwinyi kpa abwa ni nyya gwinyi kpa anu kwe ana ya ala obatisma ni nyya ni lo?>>

39 Akyogwu mo, <<Aha ba gege.>>

Oyesu ka da awa mo, <<Ala ba gwinyi kpa abwa ni nyya gwa ni kweyi ki yo obatisma byoni nyya ni, 40 yagye abore kwe aboshe hin ke, ami gbo oshu ko da ase lo. Omani akyanu tu gbeyi kawase ni akyanu tu ela wa ni la.>>

41 Ishini ashini ka awogboso igwo pwela mani ni, akyanya kpo Oyakubu kpo Oyohana. 42 Oyesu yuwo ogwu tukpa kweyi kamo, <<Ala gye mo awase ni wose ka wase WO Oyahuda lo ni ba yuwa ayikoko ko Oyesu, kweyi ase ni wo onongbo nyakwu ipu wa gbo oshu ikweyi wa. 43 Oke ya lemani kpa ala lo. Mani oni, kpiri kase ni ya yimu ko wo oteyi ipu kala na zi iyinu wo oyole, 44 kweyi kpiri kase ni ya yimu ko wi ikyikyo na wo oyole ka ananoho. 45 Kwo Oyi ka Asuse wa shini ana gbeshe danu lalo, oke wa shini ona gbeshe da ase, kweyi ona ki zo olayi nu ikweyi kase nwashika.>>

46 Ebeni ago ogya ko Ojeriko. Byoni Oyesu kpa awogboso kpe ewa ka asuse ba sho ogya nyakwu oni bita ni, ofiyi oye ni aba yo mo Obartimawus (oyi ko Otimawus) ni yagye okunu kowe ya boza. 47 Ishini opwo mo Oyesu ko Onazaret ya shigbo ni, okwotu ko ngmegba mo, <<Oyesu, Oyi ko Odawuda, miyinyinyi hin!>>

48 Awase ni be ebeni gba apwo kweyi kamo ona sha, anu ke ya zoko iso nwa ya kamo, <<Oyi ko Odawuda, miyi nyinyi hin!>>

49 Oyesu hagye kweyi kamo, <<Ala yo ogwu.>>

Ebeni ayo ofiyi oni ogwu mo, <<Shotunehe! Nyiso sho hagye! Oya yo ogwu.>> 50 Oyo oshiye nu shonu kweyi shibi we ebe ko Oyesu.

51 Oyesu do oka mo, <<Oji ni oya yimu shini na ya da awo?>>

Opwiyi mani kamo, <<Inofoza, nyya yimu ko ki me ebe.>>

52 Oyesu ka danu mo, <<Ga, otuse wo da awo ogege.>> Ebebeni iyi nu gwa kweyi ogboso Oyesu.