1 Ipu ki ishi oni, ewa ka asuse ki gbayi. Agbo oza ko re lo, Oyesu ya awogboso ogwu kweyi ka da awa mo, 2 <<Nyya miyinyinyi wa, eno eta yoma ni abebeni kpa ami kweyi agbo oza ko rore lo. 3 Owoni nkamo ana go ole kpe emye aba ga shekwu owe ikweyi koni ashini wa bwe ebe lenu ni.>>

4 Awogboso do oka mo, <<Aha ke ba ga pyo ozarore ko gye ewa mani ebenya ipu ki ikyashi mani?>>

5 Oyesu duwoka mo, <<Ikyoga ema ni ala gbo?>>

Akamo, <<Ahapa.>>

6 Oka de ewa mo ana bagye okpagye. Ishini ozo ikyoga ahapa mani kweyi okeshi do Owuso, oyi ko da awogboso mo ana da ase, ake ya mani. 7 Agbe ebenyi gbayayi, oki keshi kweyi ka da awogboso mo ana yi ko da ase. 8 Ase roza yipu. Awogboso kpo shishini ko ozarore nwo ogwugwu ene. 9 Awase ni ro oza ni go okpakwu ene. Ebeni oka da awa mo ana ga wa. 10 Ebebeni ogipu ko owu anu kpa awogboso kweyi ago okpagye ko Odalumanuta.

11 Awofarisi we ebe ko Oyesu kweyi ba tawashu kpa anu. Aba yimu ko moma, kweyi aba doka ko oyi bwi iso. 12 Oyiyi kwuwa kweyi ogbolayi fa, kweyi okamo, <<Ojiya ase ke eno ki ikyeni ba yimu ko oza ki igbashi ome? Nyya kadala okwokwoshi, aba shiya ala oza ki igbashi oyoye lo.>> 13 Ebeni oshu wa bita, okwikye gipu ko owu kweyi sheyi ge ega ki ishu.

14 Awogboso nwanyi ko byikyoga, so oni yipu kowu kpawa ni. 15 Oyesu pyuwa akpaha mo, <<Ala gbera kpo oyisi ka Awofarisi kpo Ohiridus.>>

16 Adiyiwa oka mo, <<Kwe ikweyi koni abyo ikyoga lo ni pini oya ka mani la?>>

17 Oyesu gyo oza ni aba ka kpi iyiwa ni, oduwoka mo, <<Ojiya ni ala ba kela ikweyi koni ala byo ikyoga lo ni? Kwikyikyeni ala gye lo? Ikweyi kala lenu la? 18 Ala gbiyi yeye, ala ke ba ma lo, ala gbakpaha kweyi ala ke ba pwo lo. Kweyi ala ba ra lo? 19 Ishini nfi ikyoga eho da ase okpakwu eho ni, oni aha shishini ni nwo ogwugwu ema?>>

Akyogwu mo, <<Igwepa.>>

20 <<Kweyi ishini nfi ikyoga ahapa da ase okpakwu ene ni, oni aha shishini ni nwo ogwugwu ema?>>

Aka danu mo, <<Ahapa.>>

21 Oka da awa mo, <<Kwikyikyeni, ala gye lo?>>

22 Awo Obetseda, ebeni abyo ofiyi oye wa danu kweyi abo mo ona ganu abo. 23 Obyo ofiyi abo kweyi byo bose sho ogya. Otehe shi iyi kweyi ya abo so. Oyesu do oka mo, <<Omo oje?>>

24 Otiyi mi iso kweyi kamo, <<Nma asuse bye efu ba yawu.>>

25 Oki ga anu abo iyi. Ebeni iyi nu gwa, ebe moma nu kwikye, kweyi ome ebe neneshi. 26 Oyesu ka danu mo, <<Go ole, ka kwikye gipu ogya lo.>>

27 Oyesu kpa awogboso ba gogya ko Okesariya Ofilipi, ishini abi ipu ki iyawu ba ga ni, oduwoka mo, <<Anoho ni ase ba kamo, nwwe?>>

28 Akyogwu mo, <<Ashishini kase mo owo Oyohana ine ko Obatisma, ashini mo owi Iliya, ashini mo owo oye ipu kawo bane nekye.>>

29 Oduwoka mo, <<Anoho ni ala kamo nwwe?>>

Obitrus kamo, <<Awo wo Omezaya.>>

30 Ebeni Oyesu pyuwa akpaha mo, ana ka ka da ashishe lo.

31 Ebeni okwotu ko fuwa oza mo Oyi ka Asuse ya wa mowe nwashika kweyi anyakwase kpa awosapa kpa awofono ba wa tela nu. Aba yo ngmo, eno ko ome eta oki ya nyiso ikwu. 32 Oyesu kela mani kya da awa ebeni Obitrus byo go okoka kweyi okwotu gba apwo.

33 Oyesu ke pyi iyi ma awogboso, kweyi ogbo Obitrus apwo mo, <<Shaga shun Ibiri, ogbo oza ko Owuso ipu ko otu wo lo, so oza ka asuse.>>

34 Ebeni oye ewa ka asuse kpa awogboso ogwu kweyi ka da awa mo, <<Kpiri kase ni ya yimu ko gbosun owotiri ni oya tela ki iyinu kweyi zo oshi nu gbosun. 35 Ase ni ya yimu ko gbo olayi nu oya yi tonu, ase ni ke yo olayi nu tonu ikweyi hin, oya gbo gbogbo. 36 Oji shoshi da asuse owoni opyo oza kese mani kpiri okwunu ko olayi nu? 37 Kwe oji ni ase ya sore okwunu ko olayi nu? 38 Ase ni yi iweyi hin kpe ela hin ipu ki ishi bibi ni gyo Owuso lo mani, Oyi ka Asuse ya yi iweyi nu ishini oya wa ipu ko igyashi ka Ada nu kpa ayoleho sere.