1 Ni Imya ko Sheyi kpi imya ki ikyoga ni gbo oyisi lo ni she ene epa ni, oteyi ka awosapa kpa awofono ba tiyi ko owe ni aba yo Oyesu ya kwu kweyi yo ngmo teba ni. 2 Akamo, <<Ona ka wi ishi ki imya lo ela koni apwo ya nyiso ipu ka asuse ni.>>

3 Ishini otayayo yo Obetani, oyagye ya roza ipu kole ko Osimo ni gbi iyiwa ni, onya oye wa kpo ogya ka ano kpeye ni gbi ikwiri nwashika. Obyo ogya ka ano kpeye kweyi yi nyiikweyi.

4 Ashishini kase ni bebeni otuwa bya kweyi aba diyiwa oka mo, <<Ojiya ni oya ano kpeye mani ya yi yishi? 5 Obi ya ano kpeye mani bi yi ra kweyi yi ikwiri yi da awoleha.>> Kweyi akyaneha jajaja. 6 Oyesu kamo, <<Ala sho onya mani bita, ojiya ni ala ba byotu kpa anu ikweyi koni oyumo oza neshi ni? 7 Ishi kpiri ala yo kpa awoleha, ala ba gege ba tuwa abo ishini ala yimu. Ami ke ya yo kpa ala ishi kpiri lo. 8 Oyo oza ni oya gege ni, onyuma ano ikpiye gbeyi kishi ni aba yun nyi ni. 9 Nyya kadala okwokwoshi, ebeni ako oshu neshi anu kpiri ipu kese mani, aba ko oneshi ko onya mani.>>

10 Oyahuda Iskariyoti oye bwi ipu ki igwepa ge ebe ko oteyi ka awosapa shini ona yo Oyesu ra da awa. 11 Otuwa sha, ishini apwo mani ni kweyi asho okoyi ko danu ikwiri. Bwebeni, oya tikpo ko owe ko yo Oyesu ra.

12 Eno kikyikyo ki imya ko oza rore ni gbo oyisi lo ni, owo odu wa ni aba shoko ko otukpo ki Imya ko Sheyi, awogboso Oyesu do oka mo, <<Ebenya ni oya yimu shini ahan ga yo oza rore ki Imya ko Sheyi do ko re?>>

13 Bwe ebeni, ota asepa oleho ipu ka awogboso mo, <<Ala gipu ko ogya, kweyi ala ba mo ongo oye byo ogya ki inyawo ya wa gbayi kpa ala. Ala gboso. 14 Ala ka da ada kole ni ala ganu ni mo, <Inofoza ya doka ko oda ko roza, ebenya ni nyya roza ki Imya ko Sheyi ami kpa awogbosun?> 15 Oya shiya ala oda oye nyakwu ki iso, akyanutu hagye. Ala yo oza rore ebeni.>>

16 Awogboso shobita, agi ipu ko ogya, kweyi ga mo oza kpiri ni Oyesu ka da awa ni. Ebeni ayo oza rore ki Imya ko Sheyi.

17 Ishini eno sha ni, Oyesu kpase igwepa ni ge ebeni. 18 Ishini aba roza ni, Oyesu ka da awa mo, Nyya kadala okwokwoshi, <<Ashe ipu kala, ni ya roza kpa ami owatu oye kponu ni ya wa yun ra.>>

19 Abyotu, kweyi akwotu ko do oka oyoye mo, <<Kwe ami la?>>

20 Okyogwu mo, <<Oye ipu ki igwepa ni ya labo owatu oye kponu kpa ami ni. 21 Oyi ka Asuse ya ga byoni ayitota ikweyi nu ni. Igbe na ta ase ni ke yo Oyi ka Asuse yi ra ni! Oya shoshi danu owoni abi ka mo lo.>>

22 Ni aba roza ni, Oyesu zo ikyoga kweyi okeshi, kweyi oyi kyigbo, kweyi oyi da awogboso mo, <<Ala ze, omani wi ikpiye hin la.>>

23 Ebeni oki za abwa, okeshi kweyi kamo ala ze, shini ala gwa bwi ipu nu. 24 Okamo, <<Omani pini woyi hin ko okoyi ni aba yi shonu ikweyi kase nwashika ni la. 25 Nyya kadala okwokwoshi, bwi ikyeni, nyya gwi inyi ko ogwogwa ke efu kelo si ishini nwwa gwo opepe obula ko Owuso.>>

26 Awigye ko Ozabura, kweyi abose ge ese ge ebe ke Efu ko Ozetu.

27 Oyesu ka dawa mo, <<Kpiri kala ba wa nyinya shun, koni okpa ko Owuso kamo, <Nyya ngmi inogbeho ko bize, kweyi otukpo ba kya.> 28 Ishini nke nyiso, nyya yohobu kala ya gipu ko Ogalili.>>

29 Obitrus kamo, <<Owoni kpiri kase nyinya sho, ami ya nyinya lo.>>

30 Oyesu kamo, <<Nyya kadala okwokwoshi, ome obogwu na tono ko omwepa, oya tawashu mo ogyun lo igbeta.>>

31 Obitrus hagye okokonu mo, <<Kwo owa ko gekwu kpa awo, nyya tawashu wo lo.>> Kweyi ashini wa ka mamani.

32 Abose ge ebye ni aba yogwu mo, Ogesamani, kweyi Oyesu ka da awogboso mo, <<Ala bagye ebeni, nyya ga tinarigwu.>> 33 Oga, Obitrus, kpo Oyakubu, kpo Oyohana. Kweyi otu nu kwotu ko bya ko otata. 34 Oka da awa mo, <<Otu hin ya bya ko otata ko gekwu. Ala bagye ebeni shini ala gbeho.>>

35 Osha go ohobu kee, ogbo okpagye kweyi otinarigwu mo owoni obi kyogwu, obi ye ebi mani bize shun. 36 Okamo, <<Ada hin, oya gege ya yo ojoji kpiri. Ya abwa ko owe mani yi bize shun. Ka yo oza ko otu hin lo, ke so oza ko otu wo.

37 Ebeni okwikye we ebe ka awogboso wa ta awa ba gbola. Oka do Obitrus mo, Awo Osimo, ala ba gbola la? Ala ba gege ya bagye ki ishi oye lo? 38 Ala bi iyi, kweyi ala tinarigwu lalo ala ba gbo gipu ko omama. Omaku ya yimu, ikpiye ke gekwu.>>

39 Oki kwikye ge ebeni ki kyi inarigwu oni ta. 40 Ishini okwikye wa ni, oki wa ta awa ba gbola, ola nwuwiyi. Agyoza ni aba ka danu ni lo.

41 Okwikye ko omweta, oka da awa mo, <<Kwikyikyeni ala tayayo ba gbola? Ola na gbayi mani! Ishi ya wa. Ala ma, ayo Oyi ka Asuse ra da awine ko ozalabi wa. 42 Ala nyiso, shini ahan ga! Ase ni yun ra ni ya wa ma!>>

43 Oyipu kela ya ka, Oyahuda oye ipu ka ayikoko ko Oyesu igwepa, wa kpe ewa ka asuse nwashika, kpe ewakpa, kpe efu, ni anyakwase kpo oteyi ka awosapa, kpa awofono tuwo oleho.

44 Ase ni yo ra ni ka da awa oza ni oya ya ni. Oka da awa mo, <<Ase ni nkwo botu, anu pini ala ba yo ya kwu la.>> 45 Ishini afu ebe ko Oyesu kweyi Oyahuda kamo, <<Inofoza!>> kweyi okwo botu. 46 Awase ni yo Oyesu kwu. 47 Ebeni oye ipu kawase ni hagye ni ngme ewakpa kweyi yo oyole ko osapa nyakwu akpaha she.

48 Oyesu kamo, <<Ala bose kpe ewakpa, kpo efu ko wa yun kwu, byo nwwo owi? 49 Ebe ni ya nya kpiri nyyo kpa ala, nyya foza ipu kole ko Owuso, kweyi ala yun kwu lo. Omani gbodagye shini oza ni okpa ka ni na gya.>> 50 Ebeni kpiri ka ananoho nyinya wa sho kweyi ga wa.

51 Isongo oye yo opa kweyi ya gboso Oyesu. Ishini ayo kwu ni, 52 ayikyi nu shu kweyi onyinya ewewa.

53 Abyo Oyesu ge Ebe ko osapa nyakwu kpo oteyi ka awosapa, kpa anyakwase kpa awofono kweyi awa gbayi kpiri. 54 Obitrus gboso itikpi ebe lenu gipu kole ko osapa nyakwu, ebe ni oyagye kpa awase ni ba gbeho ni ya gyola.

55 Awosapa nyakwu kpa anyakwase ba labo ko oza ni aba ya abo abyo shini ana yo Oyesu ngmo ni, ake pye lo. 56 Ase nwashika wa yo olobene kweyi oza ni aka ni kpiri we ela meme.

57 Ebeni ase shishini nyiso kela meme ikweyi nu mo: 58 <<Aha pwo oya kamo, <Anu ya yo ole ko Owuso ni asuse ma ni ya yi kye shonu, kweyi ipu ke eno eta anu ya mo ohoha, wo olamu ni asuse ma ni lalo.>>> 59 Ipu ko olobene ni aka ni, akyogwu kpa anu lo.

60 Ebeni osapa nyakwu nyiso hagye obutu wa kweyi do Oyesu oka mo, <<Ogbo ojije ko ka lo? Pwo olobene ni awase mani ba ka ikweyi wo mani ke?>> 61 Oyesu ke ko ojije lo kweyi yagye nu kpo.

Awosapa nyakwu ki doka mo, <<Awo wo Okristi la, Oyi kase neshi?>>

62 Oyesu kamo, <<Ami la, kweyi ala ba mo Oyi ka Asuse yagye abore ka Ada nyakwu kweyi ya wa ipu ko okpowuso.

63 Osapa nyakwu yo oshiye nu sha. Kweyi okamo, <<Olobene ko oji nwashika na aha ba tikpo ke?>> 64 Ala pwe ela ka arigbetu ni oka ni. Oji ni ala ma?

Kpiri wa kamo oshu ko gekwu! 65 Ebeni ashini wa ba tehe sho, ayo oza gbi iyi kweyi ba gwo kpo ayiki wa kweyi kamo, <<Bane daha!>> Awogbeho byo kweyi ga gwo.

66 Ishini Obitrus yagye akpada ko oda ke epwo ni, oye ipu ka awoyole nonya ko osapa nyakwu we ebeni. 67 Ishini omo Obitrus ya gyola ni, oyi iyi kwo, kweyi do oka mo,

<<Awo yo kpo Oyesu ko Onazaret. 68 Anu ke tawashu mo, <<Ngyo oza ni oya ka ni lo,>> kweyi obose ga yo owofunu ke ekpa.>>

69 Ishini oyole nonya mo ebeni ni, oki ka da awase ni bebeni mo, <<Ongo mani wo oye ipu wa.>> 70 Ebeni Obitrus otawashu.

Ishi kee, awase ni bebeni kamo, ko okwokwoshi oye ebeni, awo wa ase ko Ogalili la.>>

71 Ebeni okwotu ko si iyinu esa, kpe ene gwogwa da awa mo, <<Ngya ase ni ala ba kela ikweyi nu ni lo.>>

72 Ebebeni obogwu tono ko omwepa. Ebeni Obitrus rela ni Oyesu ka danu ni mo, <<Ome obogwu na tono igbepa, oya tawashu hin igbeta. Ni orela mani ni okwotu ko kyegba.