As 10 parábolas mais importantes de Jesus

3 na heye Yesu nakawalonjela mbuli nyinji kwa nhelo.

"Mhulichize! Mnyalaji nakaluta kunyala nyhadikwa. 4 Loyali yonyala nyhadikwa, zinji nazigwa mnzila, videje navyuya kulya. 5 Zinji nazigwa hali maganga hawele hela misanga minji. Zota himahima kwa vila misanga jali michefu. 6 Isanya lolulawile, zikala kwa vila nzabi zalihela mong’ho, zikoboka. 7 Zinji nazigwa hali migodi ja miwa, miwa najikula nakuzipilinjila. 8 Nyhadikwa zinji nazigwa hali misanga jinojile, zota, nazilela lukami, nyhadikwa zinji mala miya, nyhadikwa zinji mala makumi sita, na nyhadikwa zinji mala makumi gadatu." 9 Yesu nakasinda kwa kulonga, "Yawele na makutu ga kuhulika na yahuliche!"

Kiwhana na Msamalia yanojile

25 Mhela awo munhu yumwe yalingugazela ng’hatu malajizo ga Musa nakoya kwa Yesu leka yamjeze, nakamuuza, "Mlangusa, ndite choni leka ndiuhalile ukomu wa mazuwa gose?" 26 Yesu nakamwidichila, "Nakwandichigwa choni kuli chitabu cha malajizo ga Musa? Hegwe nakilangusa ndaze?" 27 Nakamwidichila, "Mgane Mkulu Nguluwi kwa nhumbula ya hegwe yeng’ha na kwa muhe wa hegwe weng’ha na kwa mong’ho wa hegwe weng’ha na kwa luhala lwako lweng’ha, na umgane yomlingikala habehi kota vyoulingigana gwegwe baho." 28 Yesu nakamwidichila, "Nakwidichila goya, udite ahyo nagwe kochikala."

29 Ila munhu yula nakagana kilajila kota nakanoga, aho nakamuuza Yesu, "Yawele habehi na heni ndo whaani?" 30 Yesu nakamwidichila, "Munhu yumwe nayali yaduliche kulawa Yelusalemu kuluta Yeliko. Loyawele mnzila, nakavabigwa na wabokaji, nawamsukula vyeng’ha vyoyawele navyo na kumtowa, nawamleka yawasile bahala yawele behi kubagama. 31 Mtambika yumwe nakakola kuli nzila yila loyamuwene munhu yula yatowigwe, nakakola hafungo. 32 Hihyo Mlawi yumwe loyafichile hala nakamona munhu yatowigwe, naye nakakola hafungo. 33 Ila Msamalia yumwe yawele mmajendo nakafika hala hoyawele yula munhu yatowigwe, loyamuwene, kamonela isungu. 34 Nakamhejelela habehi, nakavibakaliza mafuta na Divai vilonda na kuviwopa. Hamba nakamkwiniza mchanya mwa idogowi lyake, nakamigala mbaka kuli ng’handa ya wajenzi na kumlolela. 35 Mitondo Msamaliya yula nakalavya sendi denali mbili nakamha yawele na ng’handa ya wajenzi na kumlonjela, ‘Mlolele ayu munhu, choneche choyotumiya mzidi ndokupa hondihiluka.’ " 36 Hamba Yesu nakamuuza munhu yula, "Hali awo wanhu wadatu, yalikohi yalajile kota kangikalasa habehi na yula munhu yatowigwe na wabokaji?" 37 Yula munhu yalingugazela ng’hatu Malajizo ga Musa nakedichila, "Yula yamonele isungu." Yesu nakamlonjela, "Ulute nagwe ukadite hiho."

4 "Wone yumwe wa hemwe kana ming’holo miya imwe, hoyovizela kota limwe hali ajo ming’holo nalyajilila, kodita choni? Kojileka jila makumi tisa na tisa kuli chiwala na kuluta kulipala lila lyajilile mbaka yalyone. 5 Hoyolipata kosangalala na kolipika mmayega ga heye. 6 Hoyofika kaye kowachema goloko wa heye na walingikalasa habehi na kuwalonjela, ‘Msangalale hamwe na heni kwa vila nandilyona ling’holo lya heni nalyajilile.’ 7 Ndangukulonjelani, kowa na kusangalala ng’hatu kilanga kwa chwalo cha yalingudita gehile yumwe kumgalamchila Nguluwi kusinda wanhu watanganiche makumi tisa na tisa wohambe waganigwe kusilwa gehile.

Iwhano lya mwana yajilile

11 Yesu nakalutilila kulonga, "Nakwali na munhu yumwe yawele na wana weli wasongolo. 12 Yula mdodo nakamlonjela mhaza wa heye, ‘Mhaza, umhe heni uhalizi wa heni.’ Ahyo mhaza nakawagawila lufufu lwa heye. 13 Logakolile mazuwa mado, yula mdodo nakaguza uhalizi wa heye, hamba nakoka na kuluta isi ya kutali, ako nakatumiya vibi sendi za heye. 14 Loyasindile kutumiya chila chinhu choyawelenacho, nalulawila lufemba kuli isi yila, naye nakaluka kugaya. 15 Ahyo nakaluta kukola mijito kwa munhu yumwe nayali mwenyeng’haye wa isi yila, naye nakamhilika kuli mgunda wa heye yawe yohombela migubi. 16 Nakawa na maya ga kulya mibanzi jojidile migubi, nakwali haduhu munhu yampele chilyo. 17 Nyhala lozaluche kuhiluka, nakelonjela, ‘Kula kuluga kwa mhaza wa heni kuna wakola mijito wenji wawele ngulya na kulechelela, iwa ndaze heni hano ndagubagama kwa nzala? 18 Ndokuka na kuluta kwa mhaza wa heni na kumlonjela kota, mhaza, nandita gehile hali Nguluwi na hali hegwe. 19 Hambe nganigwe kuchemigwa mwana wa hegwe, undite kota yumwe wa vitumagwa wa hegwe.’ 20 Ahyo nakoka, nakaluta kwa mhaza wa heye.

"Ila loyawele yang’hali kutali, mhaza wa heye nakamona, nhumbula ya heye naimema isungu. Nakambilimila mwanage, nakamkumbatila na kumnonela. 21 Yula mwana nakamlonjela, ‘Mhaza, nambifya kwa Mkulu Nguluwi na kwa hegwe. Hambe nganigwe kuchemigwa mwana wa hegwe.’ 22 Ila mhaza wa heye nakawalonjela vitumagwa, ‘Himahima! Migale nguwo inojile mumvalize. Mvicheni pete kuli chidole cha heye na makwamba kuli magulu ga heye! 23 Hamba mlidumule singo ilogota lihatile, tulye na tudite mnvina! 24 Kwa vila ayu mwana wa heni nayali yabagame ila lelo nakazilipuka, nakajilila ila lelo nakoneka’ Ahyo nawaluka kudita mnvina.

25 "Mhela awo yula mwana mkulu nayali kumgunda. Loyawele yohiluka, habehi na kaye nakahulika lizi lya zimbo na wanhu wovina. 26 Nakamchema chitumagwa yumwe na kumuuza, ‘Hana choni?’ 27 Yula chitumagwa nakamlonjela, ‘Mng’holozo nakahiluka haluga na mhaza wa hegwe nakalidumula singo ilogota lihatile kwa vila mwana wa heye nakahiluka yawele mkomu.’

28 "Ayo mwana mkulu nakazudila ng’hatu, nakalema kwinjila mng’handa. Mhaza wa heye nakalawa kunze na kumdedeza yenjile mng’handa. 29 Ila heye nakamwidichila mhaza wa heye, ‘Wijese, miyaka jeng’ha nandikukolela mijito, ne zuwa limwe silechile kuhulichiza mzilo wa hegwe ne umwe. Nakumha choni? Humhele ne mhene ndodo leka sangalale na goloko wa heni! 30 Ila ayu mwanago yawifile lufufu lwa hegwe na wang’hondwa loyahiluche kaye nakulidumula singo ilogota lihatile kwa chiwalo cha heye!’ 31 Mhaza wa heye nakamwidichila, ‘Mwana wa heni, nakuwa na heni kwa mazuwa gose, chila chinhu chombele nacho ndo cha hegwe. 32 Ila naitugana tudite mnvina kwa vila ayu mng’holozo nayali yabagame, lelo kamkomu, nayali yajilile lelo nakoneka.’ "

Kiwhana na Lulu

45 "Kahi, undewa wa kilanga wangiwhana na yalinguguza vinhu yumwe yawele yopala lulu inojile, 46 loyapatile lulu imwe ya sendi nyinji ng’hulu, nakaluta, nakaguza geng’ha goyawele nago, nakagombola lulu ila.

Nhelo ya Mfalisayo na mkongoza kodi

9 Hamba Yesu nakalonga nhelo ayi kwa wala wanhu walingiwona kota watanganika na kuwabeza wanji. 10 Nakalonga, "Wanhu weli nawaluta kuli ng’handa ya Nguluwi kulanda, yumwe nayali Mfalisayo na yunji nayali mkongoza kodi.

11 "Ayo Mfalisayo nakema, nakalanda mnhumbula, ‘Gwa Nguluwi, ndangulonga malumbo kwa vila heni siwele kota wanhu wanji walinguboka na walingubunza na wang’hondwa ne kota ayu mkongoza kodi. 12 Ndangwesela kulya mazuwa meli kwa juma, ndangulavya zaka honhu hamwe ha kumi ha lufufu lwangu.’

13 "Ila yula mkongoza kodi nakema kutali ne henule meho gake kilanga, ila naketowa mhambaga kwa masinzo yolonga, ‘Gwa Nguluwi mbonele isungu heni ndiwele na gehile!’ 14 Ndangukulonjelani, ayo mkongoza kodi nakahiluka kaye yawele yalechelwe gehile ga heye kusinda yula Mfalisayo. Kwa vila chila yalingikwiniza koduliswa na yoneche yochidulisa, kokwinizwa."

Chiwalo cha vitumagwa wadatu

14 "Mhela awo Undewa wa Nguluwi wowa kota munhu yumwe yalingwinula majendo kuluta honhu hamwambu, nakawachema vitumagwa wa heye, walolele lufufu lwake. 15 Nakampa chila yumwe kota mong’ho wa heye vyouwele, yumwe kampa sendi mihako jihano, yunji mihako mili ja sendi na myage mhako umwe wa sendi, hamba koka. 16 Lelo yula yapegwe sendi mihako jihano kakola mijito najo kawa na chonjezeche mihako jihano jiyage. 17 Vivyo na yula yapegwe mihako mili, kazidita zonjezeka mihako mili jiyage. 18 Ila yula yapegwe mhako umwe, kaluta kabawa hasi, kaivisa ula mhako wa sendi za mkulu wa heye.

19 "Mhela loupulute, yula mkulu nakahiluka, nakaluka kukagula hisabu ya zowapatile na kutumiya sendi za heye. 20 Chitumagwa yapegwe migwala jihano nakoya yaholile migwala jihano jonjezeche, nakamlonjela, ‘Mkulu, nakunipa migwala jihano, hano hana migwala jihano jiyage jonjezeche jomhatile.’ 21 Mkulu wa heye nakamlonjela, ‘Goya, chitumagwa unojile na wakitumbila. Kunoga kuli mbuli ndodo, ndokudita uwe mlolezi wa mbuli zitanganiche. Uye usangalale hamwe na mkulu wa hegwe.’

22 "Chitumagwa yapegwe migwala mili ja sendi nakoya, kalonga, ‘Mkulu, nakunipa migwala mili. Uhole migwala mili jiyage zonjezeche zomhatile.’ 23 Mkulu wa heye nakamlonjela, ‘Goya, chitumagwa unojile na wakitumbila. Kuwa wakitumbila kwa mbuli ndodo, ndokudita uwe utanganiche mbuli zitanganiche. Uye usangalale hamwe na mkulu wa hegwe.’

24 "Ila yula yapegwe sendi igwala limwe nakoya, kalonga, ‘Mkulu, ndivizela hegwe kwa munhu yang’ang’ale, hegwe kubetaga hala hounyalile, na kukungajiza hala hosanzanze. 25 Nandumba, nandilivisa igwala lya hegwe hasi. Uhole lelo igwala lya hegwe.’

26 "Mkulu wa heye nakamlonjela, ‘Hegwe kwa chitumagwa wihile na mgata! Kuvizela kota heni sibetaga hala hosinyalile, na kukungajiza hawele hosanzanze. 27 Naikugana lelo, kuuwika mhako wa sendi ya heni kuli ng’hano na heni ndahaholile mhako wa sendi wa heni na zila zonjezeche! 28 Lelo msukuleni ayo mhako wa sendi namkampe yula yawele na mihako kumi. 29 Mina, yawele na chinhu kopegwa na konjezelwa. Ila yula yawele hela chinhu, na chila chidodo choyawele nacho choholigwa. 30 Na kwa mbuli ya ayu chitumagwa yawele hatanganiche, mlavyeni kunze kuli jiza! Ako kowa na chililo na kujejeda mizino.’

Yawele na lufufu na Lasalo

19 "Nakwali na munhu yumwe yawele na lufufu, yawele yovala mivalo ja sendi nyinji ng’hatu ja kitani inojile na kudita mnvina chila zuwa. 20 Kuli lwizi lwa ng’handa ya heye nakwali na munhu yumwe yalinguchemigwa Lasalo, yawele nayali yamemile vilonda mlukuli. 21 Lasalo nakagana yalye usanyangwa ulagale kulawa kuli chisaga cha yula yawele na lufufu, mzidi wa ago mibwa najali jikuya na kumyanga vilonda vya heye!

22 "Lelo yula mzunwa nakabagama, nawo mwahilisi nawahola, nawamuwika habehi na Abulahamu na yula yawele na lufufu naye nakabagama, nakatiligwa. 23 Yula yawele na lufufu loyawele yogazigwa kula kuli isi ya wabagame, nakenula meho ga heye, nakamona Abulahamu kwa kutali na Lasalo yekale hafungo hake. 24 Lelo nakachema kwa lizi likulu, ‘Mhaza Abulahamu, mbonele isungu, mlonjele Lasalo yadolize chidole cha heye kuli mazi leka yahoze umyango wa heni kwa vila ndangugazika ng’hatu kuno kuli chiluli.’

25 "Abulahamu nakedichila, ‘Ukumbuchile kota kuli kikala kwa hegwe nakubochela, naye Lasalo nakabochela gehile. Lelo heye kanguhozwa nagwe kwangugazigwa. 26 Mzidi wa ago, hana ikulubila ikulu hali hetwe na hemwe, leka wala walingugana kuya kwa hemwe kulawa kwa hetwe walemwele na walingugana kuya kwa hetwe kulawa kwa hemwe walemwele.’ 27 Yawele na lufufu nakalonga, ‘Mhaza Abulahamu ndangukulanda umlajize Lasalo yalute kaye kwa mhaza wa heni. 28 Kwa vila ndina wang’holozangu wahano, yalute yawakanye leka waleche kuya kuno kuli magazo.’ 29 Ila Abulahamu nakamlonjela, ‘Wang’holozo wanago Maandiko ga Musa na waloli, wawahulichize awo.’ 30 Ila heye nakalonga, ‘Hebu mhaza Abulahamu! Wone munhu kozilipuka kulawa kwa wabagame na kuwalutila, womgalamchila Nguluwi.’ 31 Abulahamu nakalonga, ‘Wone hambe wawahulichize Musa na waloli, hawojesa ne munhu hoyozilipuka kulawa kwa wabagame.’ "

Kiwhana na misolo

24 Yesu kawalonjela wanhu nhelo yinji, "Undewa wa kilanga uwhana kota hino. Munhu yanyalile nyhadikwa inojile kuli mgunda wa heye. 25 Ila hamihe imwe wanhu lowali wawasile, mwihe wa heye nakoya, kanyala misolo hagati ha uhemba, koka. 26 Lelo nyhadikwa loyotile na kwaluka kubahula, misolo najo najaluka koneka. 27 Vitumagwa wa yula yawele na mgunda wamlutila, wamlonjela, ‘Mkulu, nahaunyalile nyhadikwa inojile kuli mgunda wa hegwe. Lelo misolo jilawa kohi?’ 28 Heye nakawedichila, ‘Mwihe ndo yaditile ahyo.’ Lelo vitumagwa wa heye wamuuza, ‘Ndaze, kwangugana tuche tukajing’umbule?’ 29 Na heye kawedichila, ‘Hebu, mleche baho homkungajiza misolo, mong’umbula na uhemba kahi. 30 Mleche vikule hamwe mbaka mhela wa mbena. Mhela awo ndowalonjela walingubeta, mkungajize tandi misolo mjiwohe chilundochilundo cha kugasoma. Ila uhemba mukungajize mkauwiche kung’hano ya heni.’ "

Kiwhana kwa wahinza kumi

1 "Mhela awo, undewa wa kilanga ufanda kota wahinza kumi waholile vyenje vya hewo, waluta kumbochela mkasano. 2 Wahano wa hewo wali wapoka na wahano wanji wali na luhala. 3 Wala wapoka nawahola chenje za hewo, ila hawaholile na mafuta ga kuwesela. 4 Ila wala wawele na luhala nawahola mibuli ja mafuta gawo hamwe na chenje za hewo. 5 Kwa vila mkasano na kakawila kuya, wala wahinza weng’ha nawasinzila, wawasa. 6 Hagati ha nechilo kwali na iyowe, ‘Mwela yoo, Mkasano kanguya mlute kumbochela.’ 7 Aho wala wahinza weng’ha walilimka, waviwika goya vyenje vya hewo. 8 Wala wapoka nawawalonjela wala wawele na luhala, ‘Mtujidile mafuta mado ga hemwe kwa vila vyenje vya hetwe vyanguzima.’ 9 Ila wala wawele na luhala nawawalonjela, ‘Hatokwenela hetwe na hemwe! Fola mlute kwa walinguguza vinhu migulile!’ 10 Lelo wala wahinza wapoka lowalutile kugula mafuta, mkasano nakafika. Wala wahinza nawawele goya wenjila hamwe na heye mli ng’handa ya mkasano, hamba lwizi luhindigwa. 11 Hamba wala wahinza wanji nawoya, nawachema, ‘Mkulu, mkulu, tuchumulile!’ 12 Ila heye kawedichila, ‘Ndanguwalonjela ndikomya, siwazelele hemwe.’ " 13 Hamba Yesu nakasinda kwa kulonga, "Lelo mikale meho, kwa vila hamzelele zuwa ne saa.