As 10 parábolas mais importantes de Jesus

Lûkêndê lwa Musamalia musoga

25 ✝Sigi limo mulangi gûmo wabisila wêmene mwanda amutompe Yesû, umubumlishe: "Mulangi, nonge ntêê kûba mone kûyana bûkome bwa miaka?" 26 Yesû umuêndwêle: "Musintwe nte mu bisila bya musa, wategelela ntêê?"

27 ✝Umwêndwêle, "‘Mukampwe Kolo Kabesha Mpûngû obe kwa kikûlê kyobe kyonse, kwa mutêma gobe gonse, kwa bûkome bobe bonse, no kwa lango lyobe lyonse’; no ‘Mukampwe mukuminkani nobe monka molê mwikampêlwe mwine.’"

28 ✝"Yesû umulombwele," Bisoga, longa nansho; "Nogwe sowêkane."

29 Mone gûlya mulangi wabisila ûkebile kwêmonia kûba wasitê, umubulishe Yesu: "Mukuminkani nane nani?"

30 Yesû umuêndwêle, wêsambile, "Muntû gûmo utukile kuima Yelusalema kûgya Yeliko, ûsûmbêlêlwe no binyanga nyanga, bamushûlile bishandê, bamuswininie lûheto lwege no kumuhûla bamusigile sabaga abûsho kûkya. 31 Nansi kyonka kikyo kyaba mulambwili gûmo ûbele wahêta mundjela gilya, lwamumwene muntû gûdjo uwitile kûnkondo. 32 Byonka nansho, Mwinalefi gûmo lwaikile antû hao umumwene, witile mugela gûnge. 33 ✝Mone, Musamalia gûmo ûbele mulwendo uwikile alya abele muntû gûlya, noge lwamumwene umukyêlêle lûsa. 34 Umugêlêle umundaile biloho byage, kwakumubêka difai, no makita no kumuomba kiûto; nfulo umubandishe kwêgûlû lya mpûnda gyage, umwilile mu nsese gimo gya bageni no kûmuundaa. 35 Djoo lyage, gûlya Musamalia uhiminie lûmea lûbêlê lwakitûngo umuele gûlya mwine nsese wêsambile: ‘Mundae gûdjû no kyokyonse kyonokengêla nene anankebwêla, nikakûwa.’

36 No Yesû ubulishe: "Mubûkata mwababo basatû, nani ûlangêshe kûba mukuminkani wagûlya ûsûmbêlêlwe no binyanga nyanga?"

37 Gûlya mulangi wabisila umwuêndwêle, "Gûlya umumwenene lûsa."

Huao Yesû umulombwele, "Gyatalobe nogwe ûkalonge byonka nansho."

4 "Kokûba gûmo wenyu wêno mikoko lûkama, no gee kusiminia gûmo wabo, saûlonge ntê? Saegisige gilya makumi abûla no abûla mu kyanya, no kûgya kwêgûkeba gûlya gusimine kuikêla egûmone. 5 Kyaba kyalê kegûmona, saegûtwale amakombe kwamulogo 6 No kûgya kû nsese. Nfulo wêkebeta balûnda nage no bakuminkani nage amo no kwêbalombola, ‘Mulogelelwe amo nane, kibalo nanigûmona gûlya mukoko gwane gusimine.’ 7 Namilombola kwana, byonka nansho kwêkaba no ndoge mwigûlû kibalo kya wêno bûbe gûmo kumulêlêla, kûlêmbela beno sitêê makumi abûla no abûla bashakûkeba kumulêlêla.

Lûkêndê lwa mwana wa mwana mulûme musimine

11 Yesû ûgêlêlêle kwêsamba, "Kûbele muntû gûmo ûbele no baana babêlê babana balûme. 12 Gûlya munina umulombwele shage: ‘Tata, ntange bûyana bwane.’ Noge wêbatangile lûheto lwakitûngo lwege. 13 Nghimba gya masigi gasho, gûlya ûkuminkenye bintû byonse byabele nabyo, ûgêle nsêê gya kûla kûko wêngêle lûheto lwege mu nginkeno gibe. 14 Lwabidjile kwêla bintû byonse. Kuimine ndjala gikole mumwalo gûlya, noge ûbambile kûdjemba. 15 Kwanansho ugêle kûlomba mugêlo kwimwine mwalo gûmo, wakûko noge umwilile kwêbala lyage kûlêsha ngûlûbe. 16 Ûkampilwe kûlya byakûlya bibele byalya ngûlûbe, mone hakûbele muntû umuele kintû kyokyonse. 17 Habambile kwisingûlûla, uningile: ‘Mwanda gwakê Tata wane wêno bengili baangê bakûlya biiko, mone nene ano nankûkya no ndjala! 18 Sansemuke no kwêbwêlêla kwê Tata, no kumulombola: ‘Tata, nanonga bûbe kûgêbwa gya gûlû no gwee swaa. 19 Nsimuyenene byonka kwêtwa mwanobe; mbêke kûba nagwe gûmo wabengili bobe.’ 20 Nfulo, ûsemukile wêbwêlêle kwê shage.

"Lwabele ukikûla shage umumwene; kwa mutêma gwa lûsa, umunkukile kwa kumuhûkêla, no kumutomona. 21 Mwana wa mwana mulûme umulombwele: ‘Tata,’ nanongela gûlû bûbê, nogwe swaa. ‘Nsimuyenene kwêtwa mwanobe.’ 22 Mone shage wêbalombwele bengili bage: ‘Bûkêle!’ Musishe kishandê kisoga mumushêke. ‘Mumushêke lûpete kumunie gwage no bikwabêlo kûmagûlû! 23 Musishe kyana kya nghombe ginone no mukisêndje, no tûlogelelwe amo. 24 Kibalo gûdjû mwanene wa mwana mulûme, ûbele mukye, noano gee mugima; ûbele musimine, noanogee wamoneka.’ Babambile kûlonga kikwe.

25 "Kyaba kikyo, gûlya mukûlû ûbele kwêbala. Kyaba kyakwêbwêlêla kwage, lwashabele kûbwehê no nsese, ûtegelele ndjwê lya nghimbo no nghoma gya bantû mukûkenda. 26 Umwitile gûmo wabengili ubulishe, ‘Kwikintû kêê?’ 27 Gûdjo mwingili umuêndwêle: ‘Muninobe wagibwêla kû nsese no shobe wamusêndja mwana wa nghombe ginone, kwa kûba wagibwêlêla kû nsese mugima wêpo.’ 28 Gûlya mwana mukûlû usumininwe biiko, ûbengile kûtwela mu nsese; nfulo, shage wemine andje no kumwisasa atwele mu nsese. 29 Mone gee umuêdwêle shage: ‘Lola, miaka gyonse gyana nkwêlêla, no line sigi limo shalisilûle kisila kyobe, wimumpe kêê? Nomwine mwana wa mbusi gûmo honolimpe nonge kikwe amo no balûnda nane! 30 Mone mwanobe gûdjû ûlele lûheto lobe amo no babûseki, kûsha kwage wamusêndjêla gûlya mwana nghombe munone!’ 31 "Shage umuêndwêle: ‘Mwanane, gwee wêamo nane masigi gonse, no kyonse kyandê nakyo kyobe. 32 Kitûyenene, kûlonga kikwe no kûlogelelwa, kibalo muninobe ûbele mukye, nansi mugima; ûbele musimine, noge wamoneka.’"

Lûkêndê lwa Mufalisayo no Musonkya Misonko

9 Byonka nansho Yesû wêbalombwele lûkêndê lûno, kibalo kya bantû bakwêmona kûba beno sitê no kûbedja bange: 10 "Bantû babêlê bagêle mukitotelo kûlomba: Gûmo wabo ûbele Mufalisayo, no gûnge Musonkya Misonko.

11 "Gûlya Mufalisayo wêmene ankondo kwêlombelela gemwine wêsambile, ‘Ee Kabesha Mpûngû, na nkufwisha kwakûba nene sinagwe bantû bange ba mulyoko, baswinania, bangêla bûbê, babûseki. Nankufwisha kwana, nene nsi nagwe gûdjû, Musonkia Misonko. 12 Nanigima nghendo gibêlê mwidjênga, na mpimia lûheto kiba kya kumi kya bûmoni bwane bonse.’

13 "Mone gûlya Musonkia Misonko ûbele mwimane kûla mpee, no hanyonghwene kûtûlûla meso gage mwigûlû, mone wêbikile kûboko mukyalê no kwêsamba: ‘Ee Kabesha Mpûngû, nkyêle lûsa nene wêno bûbê!’ 14 ✝"Nanimilombola kwana muntû gûdjû, Musonkia Misonko wêbwêlêle kû nsese gyage, abele mulekelelwe gûlya gûnge halekelelwe, kibalo gense wakesesha. wakatukibwa, nogense waketûkya wakasesibwa."

Lûkêndê lwa mpeta no Lasalo

19 "Kûbele muntû gûmo mpeta, ûbele mwidjêbêle kûshala bishandê bibele bisoga no bya kitûngo kikata biiko, no wêkene mumulogo masigi gonse. 20 Amushango gwa gûdjo mpeta, abele no nanda gûmo sina lwege Lasalo, kwana ûbele no biene biingê, 21 Lasalo ûkampilwe kûebwa bisigela bigwilile kuima amutalako gwa gûdjo mpeta. No nghimba gya ao mbwa gibele gyasha gyalamba biene byage.

22 "Kyaba akiikile gûlya nanda ukile no Masalagûlû gamubûgwêle gamubikile mukyalê kya Bûlaimu. Gûlya mpeta noge ukile ushikilwe, 23 Gûlya mpeta, ûbele no mudjembo gûkata kûko kûkalûnga nyembo ûtûlwêle meso gage. Ûmumwene Bûlaimu kûla no Lasalo ûbele kûbwêhê nage. 24 Nansho gûlya mpeta umwitile Bûlaimu kwa djwê: ‘Tata Bûlaimu, nkyêle lûsa, no mutume Lasalo akunye lwala lwa munie gwage mu madjê, aoshe lulimi lwane kibalo nansûsûka biiko mukaya kano!’

25 "Mone Bûlaimu umwindwêle: ‘Mwanane gidjûkana kwana ûtambwêle bisoga byobe mungikeno, noge Lasalo ûtambwêle bibê, mone ano gee waempûlwa, nogwe wêmumudjembo gûkata. 26 Nghimba gya ao, abûkata bwetû no benywe kûbêkwe bwêna bûkata, kibalo bakûkeba kûsha kwamulê kuima kûno habakûnyonghona no bakûkeba kuima kwamulê kûsha kwatûlê habakûnyonghona.’ 27 Gûdjo ûbele mpeta wêndwêle: ‘Nfulo, Tata Bûlaimu nankûlomba mutume Lasalo abagale kû nsese gya tata wane, 28 kwakûba nino baana nane ba baana balûme batano. Agye ebalêngele kibalo nabakasi nobo kuika hantu ano amudjembo.’

29 "Mone Bûlaimu umulombwele: ‘Baana nobe beno lusinto lwa Musa no bamoni, wêbaleke bebategelele boo.’ 30 Gûlya mpeta wêsambile: ‘Hakiyenene tata Bûlaimu, mone muntû kûshûka kuima kûbaki, no kwêbaikêla bekesasa.’ 31 Mone Bûlaimu wêbalombwele: ‘Ntêê abebategelele ba Musa no bamoni, habanyonghoni kûbembwa nomwine muntû wa shûka kuima kûbaki.’"