1 Kûwa Yesû kuima kûsense gya Yahilo, wêbwêlêle kûkibûnde kyage kya byalilwe Nasaleti, baana babûganga bage bagêle amo nage. 2 Sigi lya kwêtûsha lya Bayuda aliikile,* Yesû ûbambile kûlanga mu nsese gya milombelo gya Bayuda.* Bantû bamutegelele ao begalagenie biiko bebulishe: "Muntû gûdjû mianda gino waligiimya kwêê? Nani ûmuele lweni lwamuswelo gûgû? No Bûkome bwa kûlonga byesha bibi? 3 Gûdjû nantê ûgûlya ngino gya bibale, mwana wa Malia, mukwa nyage no Shake,* Yose, Yuda no Simo? No bankasi byala gyane nantê bekane amo netu?" No kwabibyo byonse bakolelwe biiko bandilwe kûmwitabêsha.

4 ✝Mone Yesû wêbalombwele: "Mumoni enabûnyeme mu mwalo gwage, ku muso gwage, no kû nsese gyage."

5 No hanyonghwene kûlonga byesha kûko, nambo kûbatongi basho betentekile maboko no kwebahandya. 6 Noge wêgalagenie biiko, kibalo kya lûhûma lwa Mitêma gyabo.

7 Yesû wêbetile baana babûganga bage kumi no babêlê, no ûbambile kutuma babêlê babêlê. Gee kwêbaha bûkome bwa kûkûmba minyaga gibê. 8 ✝Wêbalagile wêsambile: "Na mukatwali kintû kyokyonse mulwendo lwenyu nambo lûbango yaa, na mukatwali kya kulya kya mundjêla, no gwêne mutûngû no lwêne lûheto mukikadja. 9 Nambo mushale mikalabanda, mone na mukatwali bishandê bibêlê." 10 Wêbalombwele byonka: "No antû honse abalê kemikûnka munda gya nsese, mwikane mumo kuikêla sigi lya mulêkaima mumo. 11 ✝Mpenga gyonse gya basi kemikûnka benywe no kûbûla kwêmitegelela, amulê kaima kûko mukakûnkûle lûbimbi lwê kûmagûlû genyu. Kûba kabandêlêlo kwabalê!"

12 Baana babûganga bage baimine kûgya kûsahûla kwana bantû bonse besase bûbê bwababo. 13 ✝Ba kumbile minyaga giingê gibê mu bantû, ba handishe batongi baangê no kwê basinga makita.

14 ✝Noge Kolo Helode ûtegelele musahû gwa Yesû, kibalo sina lyage libele limanyikane kokonse. Bantû bamo besambile: "Yoano mubatisha wa shûka mu baki! No kwanansho elê no bûkome bwakûlonga byesha bibyo."

15 Baange besambile: "Ni Elia."

Baange nobo besambile: "Gûdjû mumoni, nagwe gûlya gûmo wabalya bamoni bakala."

16 Kyaba Helode lwategelele byonse bisambilwe, wêsambile: "Gûlya Yoano! Wankalile twe, washûka!" 17 ✝ûtakêshe bamukwate Yoano, bamukwêke midjololo no bamubêke mukikûtû, ûlongile nansho kibalo kya kûlogesha Helodiya mukasi wa Filipo mukwa nyage, wakwelile. 18 Kibalo Yoano umulombwele Helode: "Hakiyenene kolê kûba no mukasi wa mulûnda nobe."

19 No gee gûlya Helodiya ûbele mumubêkêle Yoano nfika, ûkebile ku mwiyagya no hanyonghwene, 20 kûwa Helode umutudjukile Yoano, kibalo ûbele muntû mulûmbûlûke no wasitêê, nansho umuempile. Kyaba kyamutegelele Yoano, ûdjembile biiko, noge ûkampilwe yaa kumutegelela.

21 Mone sigi limo, Helodiya ûmwene kyaba kisoga kya kumwiyagya Yoano. Kolo Helode ûtekishe matekya gange kyaba kya sigi lya ngidjû gya kubyalwa kwage, ûkongile bakûlû bamwalo, no bakûlu ba basilêkale ba bantû banyeme ba Galilaya. 22 Hûao nsongwa kasi wa Helodiya ûtwelile musense gya kikwe no ûkindile, umulogeshe Helode amo no balya bagitile. Helode umulombwele gûlya nsongwa kasi: "Nombe kyokyonse kyonokeba, no nene nshankûwe." 23 No ûgêlêlêle byonka umulapêle: "Kyokyonse kyo shaûnombe nshankwabêle, kyo kûba kiba kya bûkolo bwane."

24 Gûdjo nsongwa kasi uwimine andje, ûgêle kwe nyage no kumubûsha: "Nombe kêê?"

Nyage umuendwele: "Lomba twee lya Yoano Mubatisha."

25 Lûkwe lûmo gûlya nsongwa kasi wêbwêlêle bûkêle kwê Helode no umulombile: "Nankeba onkaano mpebwe twe lya Yoano Mubatisha mulûbadje!"

26 Helode ûkolelwe biiko, mone wandilwe kûbenga kibalo ûlapile kûmeso ga balya bagitile. 27 Onka alya Helode umutakêshe gûmo wa basilêkale bage kumuêla twe lya Yoano Mubatisha. Musilêkale ûgêle munda gya kikûtû, kumudjêgûla Yoano twe; 28 usilishe twe lya Yoano Mubatisha mulûbadje kumuela gûlya nsongwa kasi, noge nsongwa kasi umuelêle nyage. 29 Baana babûganga ba Yoano lwabategelele mwanda gûgo, bagêle kutwala mubele gwage, no kwêgûshêka mukilêbû.

30 Kûwa baana babûganga abebwêlêle babûngakene kwê Yesû, bamuêlêle musahû gwa mianda gyonse gyabalongile no gilya gya balangile. 31 Nansilya kûbele bantû baangê babele basha no bakûgya no hakûbele antû hakûlêla. Yesû wêbalombwele: "Tûbagale kuntû kusi bantû twêtûshe kûko asho." 32 Nfulo, babandile mubwato bûgima bwabo no kûgyata hantû hasibele bantû.

33 Mone bantû baangê bebamwene basindûka, basingûlwêle kwabalê mukûgya; nobo bebatangêlêle lûbelo lwa magûlû kuima mubibûndê byabo batangêle kuika mbelê gya Yesû no baana babûganga bage. 34 ✝Abatukile mubwato, Yesû ûmwene mulongo gûkata gwa bantû, wêbamwenene lûsa, kibalo babele amo nagwe mikoko gisi no muempi, Yesû ûbambile kwêbalanga mianda giingê. 35 Aliikile lêngolo, bana babûganga bamugêlêle Yesû no kumulombola: "Anohatûle mukabenga, no djûba lyawa lwendo. 36 Wêbalage bantû baba bagyate mumabala no mubibûnde bikûbwêê bole byakûlya."

37 Yesû wêbaêndwêle: "Benywe bene mwibae byakûlya."

Nobo bamubulishe: "Twêbûnyonghona kûgya kûûla mikate gya mia gibêlê gya falanga, no kwêbaa kyakûlya?"

38 Noge Yesû wêbabulishe: "Ao mwino mikate gingaa? Mugye bêle mulole."

Bagêle kulola no basile kumulombola: "Twêno mikate gitano no misha gibêlê."

39 Onkao, Yesû ûtakêshe bana babûganga bage bebekêke bonse bibûngo bibûngo, abinya bibêsê. 40 Nobo bekeene, bibûngo bya bantû lûkama no bya bantu makumi gatano. 41 Yesû ûtwalile gilya mikate gitano no gilya misha gibêlê, ûlwele meso mwigûlû, no kumufwisha Kabesha Mpûngû. Yesû ûtimwine gilya mikate wêbaele baana babuganga bage bebatange bantû bonse. Kûwa ûtwalile gilya misha gibêle bebatange byonka bantû. 42 Bonse balêle no kwekûta. 43 Kûwa baana babûganga babungile biende bisigele bya mikate no bya misha badjulishe bitala kumi no bibêlê. 44 Balya balêle mikate babele baana balûme elufu litano.

45 Onkalya Yesû wêbatakeshe baana babûganga bage batwele mubwato batangele kû Betesaida, kûbwala bwa siba lya Galilaya, noge bugima bwage ûbambile kwêbwêlêsha bantû. 46 Kûwa Yesû kwêbebwêlêsha balya bantû, ûgêle kûlûgûlû kûlomba. 47 Aliikile lêngolo, bwato bûbele mubûkata bwa siba, Yesû ûbele bugima bwage kûntala. 48 Wêbamwene baana babûganga bage bakûdjemba kwa kwekanka no nkaêê, kibalo kya munyaga gusikukile; no kwebakankasha. Akûkendûlûka kwa bûsigi, bamumwene Yesû wakutamba egûlûlû lya madje, no ûkebile kwebaêta. 49 Kyaba kya bamumwene watamba egûlû lya madje, baningile kwana mulêndê, batele kahûndû, 50 bonse bamumwene no batudjukile biiko.

Onkao Yesû wêbalombwele: "Mwihe mutema, ninene. Namukatudjuki!" 51 Kûwa Yesû ûbandile mubwato mwababele, munyaga gûtalele. Bonse begalagenie mumitema gyabo. 52 Nobo habasingûlwele byesha bya gilya mikate; kibalo kya lûûma lwa mitema gyabo.

53 Yesû no bana babûganga bage, lwabadjabukile bwala bwa siba baikile mwalo gwa Genesaleti, bashaminie nshamo. 54 Lwa baimine mu bwato, lwendo lûmo bantû ba musingûlwêle Yesû. 55 Balya bantû bagêle lûbelo kû mwalo gonse no ku bibûndê ba twalile batongi ku mikabo, kwê balonda konse kwa bategelele kwana Yesû wê kûko. 56 No hantû onse Yesû agêle, mu tûbûndê, mu bibûndê, no mu mabala, bantû ba bikile batongi ebûlû, no ba mwisasile ebaleke bakume hêndo lya lûbega lwege. No bonse ba mukumine ba handile.