1 ✝Kusigele masigi gabêlê kuikêla sigi likata lya Pasaka* no lya mikate gisi no kidjûsho. Bakûlû ba balambwili no balangi babisila babele bakeba ndjêla gyakumukwata Yesû kwabubisa no kumwiyage. 2 Kûwa besambile: "Na tûkalongi nansino kyaba kya kikwe, ntê anansho bantû swabalonge fulugo."

3 ✝Yesû ûbele Betania, mu nsese gya Simo wêno bûsûngû. Kyaba kyabele mwikane kumutalako kûlya kyakûlya, mwana mukasi gûmo ûtwelile ûbele no lûnengo lwa alabasita* lûbele lûdjûle makita ga nalado gabele gasoga gakitûngo kikata, utimwine lûlo lûnengo, ûkûnkwêle gago makita mwi twee lya Yesû. 4 Abele no bantû baange bakolelwe biiko no beninghininie bobene: "Kibalo kyakê kusiminia bibê makita gaga? 5 Gaswa kûnyonghokela kusibwa lûkama mia gisatû gya lûheto, no kûebwa balanda!" Bamukankêle gûdjo mwanamukasi.

6 Mone Yesû wêbalombwele, "Mumulekele! Kibalo kyakê mwamudjembya nansho? Wanongela mwanda gûsoga biiko. 7 ✝Balanda mwikaba nabo masigi gonse, no mwibûnyonghona kwêbakwasha kyaba kyonse kya mwakeba. Mone nene amubi nane masigi gonse. 8 Gûdjû mwanamukasi wanongela gûlya gwenyonghwene kûlonga. Wakûnkwêla mubêlê gwane makita kûbêka djambûla mashêko gane. 9 Sitê nanimilombola, kûntû konkonse kwê kasahûlwa mwanda gûsoga mukandje, kilongwakiki gyalongile gûdjû mwanamukasi kikesambwa kwa kumwidjûkana."

10 Kûwa Yuda Esikaliota, gûmo mu balya baana babûganga kumi no babêlê, wêbaikêle bakûlû ba balambwili kûba amuane Yesû kwabalê. 11 Nobo balogelelwe biiko balagêlêle kumua lûheto. Kwanansho Yuda ûkebile kyaba kiyenene kya kumuana Yesû.

12 Sigi litangi lya kikwe kya mikate gisigibêkwe kidjûsho, usigi lyababele basêndja mwana mukoko uimibwe mulambû kibalo kya pasaka,* baana babûganga bage bamubulishe: "Wakeba tûgye kwê kûba tûkûlongele djambûla hantû akûlya pasaka?"*

13 Nansho Yesû wêbatumine babêlê mubalya baana babûganga bage, wêbalombwele: "Mugye mu kibûndê, mumo mwakakuminkana no mwana mulûme mutwale kibêndê kya madjê. Mumulonde, 14 kuikêla mu nsese gilya gyene katwela, mukamulombole mwine nsese: ‘Mulangi wabûsha, ninkwê kwê kyûmba kikata kyakûlêla pasaka* no baana babûganga bage?’ 15 Noge shaemilangêshe kyûmba kikata kya egûlû, kilêngûlwe no kibikilwe djambûla. Ûkûko kosha wêtûtekele kya kulya."

16 Baana babûganga basemukile, bagêle mukibûndê, basangene bintû byonse nagwe nansilya Yesû byalibalombwele; nobo balongishe kikwe kya Pasaka.*

17 Alishabele lêngolo, Yesû ûgêle amo no balya kumi no babêlê. 18 ✝Lwababele kumutalako mukûlya, Yesû wêsambile: "Sitêê nanimilombola gûmo wenyu wakûlya amo nane wakampana."

19 Baana babûganga bage bahûngêlwe, bamubulishe, gûmo gûmo: "Ntêê! Ni nene?"

20 Yesû wêbaêndwêle; "Gûmo mubûkata bwenyu kumi no babêlê, wêkakunya amo no nene mukikobwa. 21 Sitê, Mwana wa Muntû wagya eyagwe nagwe Lusinto Lûlûmbûlûke bya lûlê lwêsambe kibalo kyage, mone musibo gwage muntû gûlya wêka muana Mwana wa Muntû! Kyaswakûba kyalyese kwa muntû gûlya wasi mubyalwe!"

22 Nobo lwababele mukûlya, Yesû ûtwalile mukate, no kufwisha Kabesha Mpûngû, wêgutimwine. "Wêbaele no kwêsamba," mutwale, "gûgû umubêlê gwane."

23 Kûwa ûtwalile kikobwa, gee kufwisha Kabesha Mpûngû, wêbaele; bekubile bonse. 24 ✝ wêbalombwele: "Gano ûmasi ga kilageno, gakwêsêka kibalo kya bantû bonse. 25 Sitê, nani milombola, nsikekûbêla byonka difai lya bihelo bya misabibu kuikêla sigi lilya lya ndêkekûbêla difai liya mubûkolo bwa Kabesha Mpûngû."

26 Kûwa bembile lwêmbo basemukile bagêle kûlûgûlû lwa Maasi.

27 ✝Yesû wêbalombwele baana babûganga bage: "Benywe bonse mwikansiga bugima bwane, kibalo Lusinto Lûlûmbûlûke lwalisamba, ‘nikamuhûla muempi, nogyo mikoko gikasangalala.’ 28 ✝Kyaba kyandê kashûka, nikemitangêlêla kû Galilaya."

29 Petelo umulombwele: "Nontê bonse bokukusiga, nene nsikakusigi noeneasho!"

30 Yesû umuêndwêle Petelo: "Sitê, nankûlombola busigi bûno, kûgêbwa kwa kadjendje kûbêlêkêla lûkwe lwa bûbêlê, shaunitune nko gisatû."

31 Mone Petelo ûkonkomekile: "Nontê kiyenene nkye amo nogwe, nkiso kûkûbenga mbeela!"

No bonse besambile byonka nansho.

32 Nfulo, baikile mu lûbanda lwitilwe Getesemani, wêbalombwele baana babûganga bage: "Mwikane ano kyaba kyandê mukûlomba." 33 Kûwa wêbatwalile Petelo, Shake,* no Yoano. Ûbambile kûdjemba biiko no kûtegelela mwenyo. 34 Wêbalombwele: "Nimuhûngêlwe biiko kûmutêma abûsho kûkya. Mwikane ano no kûkelwa."

35 Yesû ûgêle kûgebwa bisho, ukutamine ansê kûlomba Kabesha Mpûngû kwana, ntê kyokûnyonghokela, kyaba kino kya masûsû kimpête. 36 "Wêsambile Tata," ntê kyokûnyonghokela, "Nsindwêle masûsû gano! Mone nabikabi byandê mukampêlwe nene. Nambo, molê mukampêlwe gwee."

37 Kûwa wêbwêlêle kwêbaana babûganga balya basatû wêbasangene mutûlo. Umulombwele Petelo: "Simo wêmutûlo? Awêmunyonghone kûkelwa nokine kyaba kimo!" 38 No wêbalombwele: "Mukelwe no kûlomba, kûba namukasi kûtwela mu bitompibwa. Mutêma gwi ndii, mone mubêlê gwawa kûkêma."

39 Ugêle kûlomba byonka, wêbwêlêlêle mianda gyonka gilya. 40 Kûwa wêbwêlêle byonka; wêbasangene bemutûlo meso gabo gabele ganyemenwe notûlo. Habamanyine kya kumuêndûla.

41 Wêbaikêle lûkwe lwa bûsatû, wêbalombwele: "Mwalala byonka nokwêtûsha? Byawa! Kyaba kyaikêla Mwana wa Muntû wabêkwa mumaboko ga bantû babê. 42 Mubyûke, tûgye lwetû. Mulole, gûlya wakampana washena!"

43 Yesû lwabele onka mukwêsamba, Yuda gûmo wabalya kumi no babêlê, uwikile amo no kibungo kya bantû bamo no bipanga, baange no tûbonge, bantû babo babele batumwe no balambwili bakûlû, balangi babisila, no batata nkûlû. 44 No gûlya umuanine wêbaele kabandêlêlo: "Gûlya wansha ntomone,* gûdjo ûge mumukwate mugyate nage mumulwegelele biiko."

45 Yuda aikile, lûkwe lûmo ûgêle kwê Yesû no kwêsamba: "Mulangi!" Kûwa umutomwene.* 46 Nfulo babo bantû bolwele maboko gabo no kumukwata Yesû. 47 Gûmo wa baana babûganga ba Yesû ûsangenwe ao ulumwine lûpanga no kumukala kûtwê mwingili wa mulambwili mukûlû. 48 Yesû wêbalombwele: "Mwasha kûntwala nene mwalê no bipanga no tûbonge, nagwe ni ntomboki? 49 ✝Masigi gonse mbele nenyu amo mukûlanga mukisakyê kyakitotelo,* no hamunkwatile. Mone mianda gino gyaikêla kûba lwandêko lûgwanine."

50 Ûao baana babûganga bonse bamulekele batinine.

51 Kûbele musongwa lûme gûmo, ûbele wamulonda Yesû, mushale lûbega kumubêlê gwage, bamukwatile, 52 noge wilusigile lûlya lûbega, utinine mutaka.

53 Nfulo bamutwalile Yesû kumwila kwê mulambwili mukûlû, kukuminkene bakûlû ba balambwili no batata nkûlû no basinti babisila. 54 Noge Petelo ûbele wamulonda Yesû katwe kala no kehê, no ûtwelile mukisakyê kya nsese gya mulambwili mukûlû. Ûbele mwikane amo no baempi mukonta kaya. 55 Nfulo bakûlû ba balambwili no kilye kyonse kikebile kusitêkêkya kwana Yesû mubê bamwiyage, mone habamwene. 56 Mwanda bangêê bamusitêkêkye Yesû bumpi, mone kusitêkêkya kwabo hakûkwelenkene.

57 No bange bemene bamusitêkêkye bumpi banine: 58 ✝"Betwe tumutegelele muntû gûdjû wakwêsamba kwana: ‘Nene nankaongola kitotelo* kino kiimpilwe kumaboko ga bantû, no mumasigi gasatû nankaimpa kiinge kisikaimpwa kumaboko ga bantû.’" 59 No nansho, kusitêkêkya kwabo hakûkwelenkene.

60 Nghimba mulambwili mukûlû wêmene abûkata bwa bantû no umubulishe Yesû: "Onokwêndûla byonse byaba kukusitêkêkya?"

61 Mone wêkene talala, no haêndwêle mwanda. Mulambwili mukûlû umubulishe byonka, umulombwele: "Gwee ûge Kilisitu, Mwana wa Kabesha Mpûngû muyenene kûtûmbêkwa?"

62 ✝"Yesû umuindwêle," ninene no mwikamona Mwana wa Muntû, "mwikane kûboko kûlûme kwa Kabesha Mpûngû wêno bûkome no wêkasha mu malesigûlû ga mwigûlû!"

63 Mulambwili mukûlû ûsanine kishandê kyage wêsambile: "Twêno kibalo kê byonka kya kamoni! 64 ✝Mwategelela nansilya byana kûtûka Kabesha Mpûngû. Mwamona ntê?"

Bonse bakalile nsambû kwana: muyenene eyagwa.

65 Bange babambile kumushêlêla mata, bamuutile kûlûkebo no kumuhûla bikoni. Bamulombwele. "Lagûla!" Nani wakûlonga nansino, nobo bengili bamubatile mahê.

66 No kyaba Petelo ûbele ansê mukisakyê, kusile mwingili mwana mukasi gûmo wa mulambwili mukûlû. 67 Ûmumwene Petelo wakonta kaya, umulwele soo umulombwele: "Nogwe, ûbele amo no Yesû gûlya Munasaleti."

68 Mone Petelo witunine: "Nsidjê no nsha kusinghûlûla byono kwêsamba." Kûwa wimine andje akûtwelela mukisakyê, no kadjendje kabêlêkêle.

69 No gûlya mwingili mwana mukasi umumwene byonka ubambile kwêbalombola babele bemane alya: "Gûdjû ûgûmo wabo!" 70 Petelo witunine byonka.

Kyaba kisho balya babele alya bamulombwele byonka Petelo: "Sitê gwee wêgûmo wabo, kibalo nogwe wê Mugalilaya."

71 "Kûwa Petelo wêsambile: Kabesha Mpûngû nontê mulago ntê nambea! Nanidjêgêla nsidjê muntû gûdjo wamwa kwêsamba!"

72 Lwendo lûmo kadjendje kabêlêkêle lûkwe lwa bûbêlê, Petelo wêdjûkene kilya kinia kye lombwelwe no Yesû: "Kadjendje byakasha libêlêkêle lûkwe lwa bûbêlê, shaunitune nko gisatû." No eningile, ulilile.