1 ✝Yesû ûbambile kûlanga byonka kûnkondo gya kisiba lya Galilaya. Kibûngo kikata kya bantû ki mwalagele, noge ûbandile mu bwato wêkene mumo, kibûngo kyonse kibele kûntala kûkondo gya siba. 2 Wê balangile mianda gingê kûnkêndê, wê balombwele mu milango gyage, wêsambile:

3 "Mu tegelele! Mukuni ûgêle kukuna nkunwa. 4 Kyaba kyabele wakusa nkunwa, ginge nkunwa gi gwêlêle kûnkondo gya ndjêla: kusile toni twi gilêle. 5 Ginge gi gwêlêle alwala, asibele no bûlongo bûnge. Gi menine lûkwe lûmo, kwa kûba ha kûbele bûlongo bûgê. 6 Mone djûba aliselile gi humine, kwakûba ha gibele no misi gi twele gihumine. 7 Ginge gigwêlêle mu miba, kyaba miba agimenine gi ininikile gilya nkunwa, no hagiiminie kantû. 8 Ginge gi gwêlêle mu bûlongo bûsoga, gimenine no kûkûla no kûwaa bihelo: Gimo makumi gasatu, ginge makumi mutanda, no ginge lûkama."

9 Kûwa Yesû wêsambile: "Wêno matwê ga kûtegelela, ategelele!"

10 Kyaba kyabele bugima bwage, baana babuganga bage no kibungo kya bantû bonse, bamugêlêle no bamubulishe kibalo kya gigyo nkêndê. 11 Mone Yesû wêbaêndwele: "Benywe mwibalagêlêlwe kûmanya kibiso kya Bûkolo bwa Kabesha Mpûngû, mone balya beandje, bakûtegelela mianda gyonse kûnkêndê 12 ✝kûba

‘Bebûnyonghona kûlola,

No habamoni;

No Bebûnyonghona kûtegelela,

No habasingûlûli;

Ntêê hanansho bekamwibwêlêlêla Kabesha Mpûngû,

No Kabesha Mpûngû wêkebalekelela.’"

13 Nfulo Yesû wêbalombwele: "Lûlo lûkêndê amwibelûmanye? Musha mwigisingûlûle ntêê nkêndê ginge? 14 Nkunwa gilya gikusilwe ûmwanda gwa Kabesha Mpûngû. 15 Ndjee gigwelêle kûnkondo gya ndjêla; ûbantû bakwêgûtegelela mwanda gwa Kabesha Mpûngû, onkao Satana washa no kusindûla gûlya mwanda gubikilwe munda gyabo. 16 Ndjee gigwêlile egûlû lya lwala. Hûbantû balya bakûtegelela mwanda gwa Kabesha Mpûngû, lûkwe lûmo baligûtambûla kwa mulogo. 17 Mone gûlya mwanda gwênghe misi gya kûshama, bakwêgûkwatêsha kwa kyaba kisho. Kyaba kya mudjembo no masûsû kyokwêbaikêla kibalo kya mwanda gwa Kabesha Mpûngû, lûkwe lûmo bagwêla. 18 Ndjee gigwêlêle mumiba. Lûkêndê lwa bantû balya bakûtegelela Mwanda gwa Kabesha Mpûngû, 19 mone mudjembo gwa kandje, no bûkampwe bwa lûheto, no kitêma kya mianda ginge gyo kûtwela no kuininika gûlya mwanda, no kûbûla kûwaa bihelo. 20 Ndjee gigwêlêle mu bûlongo bûsoga. Lûkêndê lwa bantû bakwêgûtegelela mwanda gwa Kabesha Mpûngû, no kwêgûtambûla, no kûwaa bihelo: Gimo bihelo makumi gasatû, no ginge bihelo makumi mutanda, no ginge lûkama."

21 ✝Yesû wêbalombwele byonka: "Nani wêbûkûnkya kimuni kyage kûhûta no kitala ao kûbeka nkûnsê bûtanda? Nantê kûbêka egûlû lya lwagê? 22 ✝Byonka nansho, bilya byonse bibisikilwe byakamanyinkana, no kibiso kyonse kyakabêkwa epee. 23 Muntû wêno matwê ga kûtegelela no ategelele!"

24 ✝Yesû wêbalombwele byonka kwana: "Mube meso no mianda gyamulê mukûtegelelela! Kilêko kyamwa kûtûngêla bange, kyonka kilya kya balêkemitûngêla no benywe, no kwêmibilêsha mbeela. 25 ✝Kibalo gûlya wêno kintû wêkaebwa kinge no tenteko, gûlya usino kantû no kalya kasho kelênako wêkaswinibwa."

26 Yesû wêsambile byonka: Bûkolo bwa Kabesha Mpûngû bwêê gûlane. No muntû gûmo wakukusa nkunwa mwibala lyage. 27 Busigi ao djûba, ntêê gûlya muntû gee kona tûlo ao gee kûbyûka, gilya nkunwa shagikûlêle hakûmanya mwagilê mukûkûlêla 28 Bûlongo bwêne bwamenia nkunwa, kûbambêla muntê, maani, kûlonda bihelo, nfulo nkunwa gyo kûkomena munda gya miewe. 29 Mone bimbûlwa abyawa kû gwanina lûkwe lûmo mulimi kûtwela mwi bala no kahêlû kakwêmbûla, kibalo bimbûlwa abidjambûla.

30 Yesû wêsambile byonka: "Twêbwêgûshe no kêê Bûkolo bwa Kabesha Mpûngû?" Ao "Twêbûbêke mu lûnkêndê kêê? 31 Bûkolo bwa mwigûlû bwênagwe ni ndjee gya kilanga. Gikuninwe mu bûlongo, nogyo gike kûlêmba ndjee gyonse gya kandje. 32 Mone gyo kûwa kukunwa no kûkûla, gikaba gikata kûlêmba nkunwa gyonse. Gikaimia matabê gakata no toni twaegûlû twêbûnyonghona kuimpa binswa byabo."

33 Yesû ûbele walibalanga kûnkêndê giingê gya miswelo gûgo, kwa kûlanga mwanda gwa Kabesha Mpûngû; kwa kilêko kyabalê bûtegelela. 34 Yesû hesambile nabo kintû kyokyonse no hakûbûla kûbêka lûkêndê, mone abele bugima no baana babûganga bage, wêbasintûlwele bintû ûtû ûtû.

35 Sigi lilya, kyaba kya lêngolo, Yesû wêbalombwele baana ba bûganga bage: "Tûdjabûke bwala bwabûbê bwa siba." 36 Kwanansho bekisigile kibûngo; batwelile mu bwato mubele Yesû, no kûsemuka amo nage. No maato gaange gebasindêkêle. 37 Munyaga gûkata guumpile mwisiba, mabêmbê gakata gaumpile bwato, bwato bûbambile kûdjûla madje. 38 No Yesû ûbele kunghimba gya bwato mulale tûlo, wale mubêke twee lyage kumusego. Baana babûganga bage bamubyulile Yesû mukûbûlûla: "Mulangi, twa kyaa, hakintû kole ntêê twa tobêla?"

39 Yesû ubyukile, wêgûkankele munyaga: "Talala!" No kulombola siba "Kokela!" Munyaga gûwêle akûbele talala nya. 40 Yesû wêbalombwele baana babûganga bage: "Kibalo kya kêê mwatûdjûka? Amwalibe no lwêtabêsho?"

41 Batûdjûkile biiko besongenie: "Gûdjû noge nani! Watalasha munyaga no siba lya mukokela!"