1 Bafalisayo no bamo balangi babisila bahimine Yelusalema ba bûngakene mbelê gya Yesû. 2 Ba mwene kwana bange mu bûkata bwa baana babûganga ba Yesû, ba kûlya kya kûlya hakoga kû maboko.

3 Bafalisayo no Bayuda bonse, ha banyonghoni kûlya kûbûla kooga kû maboko bisoga. Kibalo balamine bisila bya ba tambwêle kû batata nkûlû babo. 4 Kyaba bokuima kwêbûlû, habanyonghoni kûlya ntêê abemunkye kwa madjê. Kûbele binge bisila bya babele balame kuima kû batata nkûlû, nagwe nansilya kukila mpênde, bifulia no ngeso gya mikûba.

5 Nfulo, balya Bafalisayo no balangi babisila bamubulishe Yesû: "Kibalo kyakê baana babûganga bobe habakokele mugêlêle milango gya batata nkûlû, bakûlya kyakûlya kûmaboko tamatama?"

6 ✝Yesû wêbaêndwêle: "Isaya ûbele no sitêê kyaba kyalagwêle kibalo kyenyu, benywe beno nfika, nagwe nansilya byabisintilwe:

‘Kabesha Mpûngû wêsambile, bantû bano bakûnyemeka kwa milomo yaa,

Mone mitêma gyabo gikûla no nene.

7 Nobo bakûntota sile,

Bakûsahûla milango

Gilagilwe no bantû!’

8 "Mwabêka bisila bya Kabesha Mpûngû ankondo kibalo mulonde milango gya bantû."

9 Wêsambile nabo byonka: "Mwakûbenga bisila bya Kabesha Mpûngû no mwalonda milango gya batata nkûlû. 10 ✝Kibalo Musa wêsambile, ‘Wêbanyemeke bashobe no nyobe,’ no, ‘Gûlya wêkata mulago shage ao nyage muyenene kûkya.’ 11 Mone benywe, mwakûlanga kwana: ‘Ntêê muntû gûmo kwêsamba kwê shage ao nyage: kilya kyanamba nankeba kûkûkwasha shanikiimie nagwe mulambû kwê Kabesha Mpûngû, 12 akino kyokyonse kyakûmukwasha shage no nyage, no mwamutakêsha alonge nansho.’ 13 Nansilya bya mulê mukûbedja mwanda gwa Kabesha Mpûngû, kibalo kya mianda gya muwêle kûtambûla kûbatata nkûlû, byonka mwakûlonga mianda ginge gingê gigûlange no gigyo."

14 Nfulo Yesû witile byonka kikyo kibûngo no kwêkilombola kwana, "Muntegelele, benywe bonse, no musingûlûle mianda gino. 15 Hakûle kintû kya andje kyakumutwela muntû munda kimulonge abe no bûbê, mone mianda gya kuima munda gya muntû ûgyakumulonga kûba no bûbê." 16 [Muntû gûlya wêno matwê gakûtegelela no ategelele.]

17 Kyaba Yesû lwesigene no kibûngo no kûtwela munda gya nsese, baana babûganga bage bamubulishe nsintwe gya gilya nkêndê. 18 Wêbalombwele: "No bene benywe hamwakusingûlûla? Hamwibamanye kwana kintû kya kumutwela muntû munda hakimulongi bûbê mone kyakuima munda ûkyakumulonga muntû bûbê, 19 kibalo bintû bibyo habimutweli mu mutêma, nambo munda, no nghimba byakuima mumubêle gwage no kûtebwa kioloni.*" kwanansho, Yesû umukinshe bilêbwa byonse.

20 Yesû ûgêlêlêle kwêsamba: "Kyakuima munda gya muntû ûkya kumulonga bûbê. 21 Kibalo munda gya mitema gya bantû, mwakuima maninga gabê, bûseki, lwêbo, no bûngyagani, 22 kosikosi, bwêma, bûbê; bûbembani, bûkosoke, bûkwa, malûmbû, kahûni no bûbidje. 23 Bibyo byonse bibê ûbyakuima munda gya muntû nobyo ûbyakumulonga muntû bûbê."

24 Kûwa, Yesû ûsemukile kûko ûgêle lwege kûmwalo gwa Tilo. Ûtwelile mu nsese gimo hakampilwe muntû kûmanya kwana wêmulya, no wandilwe kwibisêka. 25 Ao abele mwana mukasi gûmo, ûbele no nsongwa kasi wage ûbele no munyaga gûbe, lwategelele musahû gwa Yesû lûkwe lûmo gûlya madjû usile kûgwêla kûmagûlû gage. 26 Mwana mukasi gûlya ûbele Mugiliki, ûbele mbyalwa wansê gya Suliya. Gee umulombile Yesû akûmbe gûlya munyaga gûbe guime munda gya nsongwa kasi wage. 27 Mone Yesû umuêndwêle: "Lekela bêle baana bamunsese balye bekûte, hakiyenene kûtwala bilêbwa bya baana kûtela mikelekese."

28 "Mwana mukasi," gûlya umuêndwêle: "Kolo, ni sitêê, mone nogine mikelekese gikûtola bilya bikûgwêsha baana ansê gya mutalako!"

29 Nfulo Yesû umulombwele mwana mukasi, "Kibalo kya mianda gyonolisamba, wêbûnyonghona kwêbwêlêla kû nsese gyobe, munyaga gwaima munda gya nsongwa kasi obe!"

30 Kyaba kyagibwêlêle kû nsese gyage, ûsangene mwana mulale kûbûtanda; no munyaga gûbê gwawa kumuima.

31 Yesû uimine byonka kûmwalo gwa Tilo, uitile ku Sidona, ûgêle kwisiba lya Galilaya, kwêtêla mu mwalo gwa bibûndû kumi.* 32 Bamuêlêle muntû gûmo ûsha kwêsamba no kûtegelela, bamulombile no kumwisasa amutenteke kûboko egûlû lyage. 33 Onkao Yesû umwitolishe gûdjo muntû no kibûngo, wêtolile nage asho, ûtwelishe minie mu matwe gage, kûwa ukumine lulimi lwege no minie gitome mataa gage. 34 Yesû ûlwele mwigûlû, ûhemwine no kwê samba: "Efata," nsintwe kwage, "Sikûka!"

35 Lûkwe lûmo matwê gage gasikukile, no lûlimi lusikukile ûbambile kwêsamba bisoga. 36 Yesû wêbalagêlêle nabakalomboli muntû, monka mwelibakandêle, mone boo bagêlêlêle kûtûmbya musahû. 37 Bantû begalagenie biiko no kûbamba kwêsamba: "Walonga bilongwa byonse gisoga, wanyonghonia mpokoto kûtegelela no kameme kwêsamba!"