1 Nghimba gya masigi gasho Yesû wêbwêlêle byonka Kapelenaumu. Kyaba bantû lwa bategelele kwana wimunsese, 2 babûngakene bantû bengê hao, no hakûbele byonka antû noene mbelê gya mushango. Yesû ebele walibasawêla mwanda gwa Kabesha Mpûngû. 3 Bantû bamo basile, kumuêla muntongi wabûlebe mutwalwe no bantû bana. 4 Mone bandilwe kumushena Yesû kibalo kya kibûngo, baselile nage egûlû lya nsese basamwine nsansagûlu bûlûlê no abele Yesû. No abawêle kûsamuna batukishe mukabo gwabele mulalêle gûlya wabûlebe. 5 Noge Yesû lwemwene lwêtabêsho lwabo, umulombwele gûlya wa bûlebe: "Mwanane, walekelelwa bûbê bobe."

6 No bamo balangi babisila babele bekane kûko, babambile kwêbûsha mumitema gyabo: 7 "Kibalo kyakêê muntû gûno wakwêsamba nansino? Wabedja Kabesha Mpûngû! Nani wêbûnyonghona kûlekelela bûbê? Nambo Kabesha Mpûngû bugima bwage!"

8 Yesû usingûlwêle onkalya bya babele baninga mu mitêma gyabo, wêbalombwele: "Kibalo kya kêê mwino gago maninga mu mitêma gyenyu? 9 Kikê kiele mbeela kumulombola muntû wêno bûlebe: ‘Walekelelwa bûbê bobe,’ ao kwêsamba, ‘Gimana ûtwale kisalo kyobe, ûbagale?’ 10 Mone nankampwa mumanye kwana Mwana wa Muntû wêno kitenta mukandje kwa kûlekelela bûbê," kwa nansho umulombwele gûlya wêno bûlebe: 11 "Nankûlombola gimana, ûtwale kisalo kyobe, ûgyate kû nsese gyobe!"

12 Onkao, wêmene mbelê gya bantû bonse kûtwala kisalo gyage, uimine kûgêbwa kwabo bonse. No bantû bonse begalagenie, bamutumbikile Kabesha Mpûngû, banine: "Atwalimone mbeela mwanda bigûno!"

13 Yesû wêbwêlêle byonka kûnkondo gya siba lya Galilaya. Kibûngo kikata kya bantû kimugêlêle, noge ûbambile kwêbalanga. 14 No ebele waêta, umumwene Lefi mwana wa Alufayo, ûbele wagikana mu nsese gya mingêlo gya kusonkesha musonko. Yesû umulombwele: "Nonde." Onkao Lefi wêmene umulondile.

15 Byonka nansilya Yesû lwebele mwikane mukûlya kya kûlya mu nsese gya Lefi Basonkesha musonko no bangêla bibê beengê bekene kûlya kyakûlya amo no Yesû, no baana babuganga bage, kibalo bantû bangê bamuswelo gûgo babele bakumulonda. 16 No kyaba balangi babisila, no Bafalisayo, lwabamumwene Yesû wakûlya amo no basonkesha musonko no beno bûbê, bebabulishe baana ba bûganga bage: "Kibalo kyakêê wakûlya amo no basonkya misonko no babûbê?"

17 Yesû lwategelele mianda gilya gyabesambile wêbalombwele: "Bepoo habekûkeba mundahi, nambo balya bakusumwa no mutongo ûbekûkeba mundahi. Simushe kûkeba beno site mambo beno bûbê."

18 Sigi limo baana babûganga ba Yoane mu batisha no bafalisayo babele baligima kya kûlya. Nfulo bantû bamo basile kwê Yesû ba mubulishe: "Kibalo kyakêê baana babûganga ba Yoane mu batisha no balya baba falisayo ba kwigima kya kûlya, mone baana ba bûganga bobe haba kwigima kya kûlya?"

19 Yesû wê baêndwêle: "Mwaninga kwana balya betilwe kû bûlûgo be bûnyonghona kûleke kya kûlya kya bûlûgo kyaba mwine bûlûgo ukiamo nabo? Ubisibyo! Kyaba kya bakii no mwine bûlûngo amo ha banyonghoni kûlekela kûlya. 20 Mone kyaba kikaika sigi kwana mulûme wa bûlûgo alê kasindûlwa, usigi lya balê kalekela kûlya kya kûlya.

21 "Hakûlê muntû wêbûlamika kiba kya kilêba kiya kukilêba kikûlûkûlû, ge kûlonga nansho kilya kiba kiya kibikilwe shakyone kilêba kikûlûkûlû, no alya asanikile shaagêlêlêle kûsanika. 22 No kwênghe muntû wêbûbêka difai liya munengo gikûlûkûlû, gekûba walonga nansho, lilya difai liya likaata nengo gilya. Lilya difai lyakesêka no gilya nengo gikoneka, nambo kûbêka difai liya munengo giya."

23 ✝ Sigi limo lya kwêtûsha lya Bayuda*, Yesû ebele wakalûlûla mu mabala ga ngano, baana babûganga bage babambile kûolola miewe gya ngano. 24 Bafalisayo bamubulishe Yesû: "Lola! Kibalo kyakê baana babûganga bobe balonga kisi kiyenene sigi lya kwêtûsha lya Bayuda?"*

25 ✝Yesû wêbaêndwêle: "Benywe hamusomine bilongile Daudi no bantu bange kyaba kyakebile kya kûlya? Kibalo gee mwine no bantû bage bategelele ndjala, 26 ✝ûtwelile mu nsese gya Kabesha Mpûngû. Kyaba kya mulambwili mukûlû Abiatali wigilêle mikate gilûmbûlûke. Giimibwe kibalo kya Kabesha Mpûngû kwana hagiyenene kûlêbwa nambo balambwiliyaa wêbaele no bantû bage byonka nansilya."

27 Yesû wêbalombwele byonka: "Sigi lya kwetûsha lya Bayuda* lilongilwe kibalo kya muntû; hamuntû kibalo kya sigi lya kwetûsha lya Bayuda*. 28 Kibalo kiki Mwana wa Muntû ûge Kolo wasigi lya kwetûsha lya Bayuda."*