1 Yesû ûsemukile kûko, kuika kûmwalo gwa Bayuda, bwala bwa Yolodani. Kibûngo kibûngakene no ûbambile kûsahûla, bibele kidjibisi kyage.

2 Nfulo Bafalisayo bamo bamugêlêle kwa kumutompa no bamubulishe wêtûlombole: "Bisila byetû bitakêshe mulûme kûkûmba mukasha gêê?"

3 Yesû wêbaêndwêle kwa bûsho lili: "Musa wêmilagêlêle kêê?"

4 ✝Besambile: "Musa ûtakêshe kwê mulûme kusinta lûpapûlo lwa kûkûmba mukasi."

5 Yesû wêbalombwele: "Kibalo kya mitema gyenyu gibumu Musa wemisintêle bisila bibyo." 6 ✝Mone mubambo gwa Kûhangwa kandje: Kabesha Mpûngûkwa hûhangile mwana mulûme no mwana mukasi, nagwe lusinto byalûle lwêsambe. 7 ✝‘Akibalo kikyo, muntû wakasiga shage no nyage no bekalaminkana no mukashage, 8 no babo babêlê bekaba mubêlê gumo.’ Habakabi byonka babêlê, nambo mubêle gûmo. 9 Nfulo kikuminkenie Kabesha Mpûngû, muntû nekasi kûlekenkania.

10 Kyaba kya bebwêlêle mu nsese, baana babûganga bage bamubulishe byonka kibalo kya mwanda gûlya. 11 ✝Yesû wêbaêndwêle, "Muntû gense wakamuleka mukashage no kûkwela gûnge walonga bûseki mbelê gya mukasi mutangi. 12 Byonka nansilya, no mukasi kumutêna mulûme wage no kûkwelwa no mulûme gûnge walonga bûseki."

13 Bantû bamo bamuêlêle Yesû baana bakitûtû kibalo ebatenteke maboko, mone baana babûganga bage bebakankêle. 14 No Yesû lwamwene nansho, ûkolelwe biiko no wêbalombwele: "Mwibalekele baana bakitûtû bashe kwandê, namukebasibili, kibalo Bûkolo bwa Kabesha Mpûngû bwa bantû benagwe bano baana. 15 ✝Nanimilombola sitêê, ntêê muntû usimutambûle Bûkolo bwa Kabesha Mpûngû nagwe mwana wakitûtû hakatweli mbeela." 16 Nfulo, wêbakûmbatêle baana balya, wêbatentekile maboko gage kûmatwe gabo, wêbesele malyese.

17 Kyaba Yesû kyegêlêlêle no lwendo lwege, muntû gûmo usile lûbêlo no kukutama kûgêbwa kwage, no kumubûsha: "Mulangi musoga, nonge ntêê mone kûbêkala bûkome bwa milembambagala?"

18 "Yesû umulombwele mwanda gwa kêê wangita musoga?" Hakûle muntû musoga. "Nambo Kabesha Mpûngû bugima bwage. 19 ✝Wêmumanye bisila bibyo: ‘No keyagi; no kalongi bûseki; no keebi; no kasitêkêkya buumpi kwa muntû; no katwali kintû kwa muntû kwa kumubemba, wêbanyemeke ba shobe no nyobe.’"

20 "Gûlya muntû umuêndwêle Mulangi," bibi byonse nimwibikwatêshe, "kûbambêla bwanike bwane."

21 Yesû umulwele no kumukampwa biiko umulombwele, "Wêmutaûkêlwe no kintû kimo yaa. Gyata ûshe byonse byolê nabyo no wêbahe balanda, nogwe shaûbe no bûkûsa mwigûlû; kûwa gibwêlêla ûnonde." 22 Mone gûlya muntû lwategelele mwanda gûlya, ûgêle walê mukolelwe biiko, kibalo ûbele mpeta.

23 Yesû ûlwele kokonse, wêbalombwele baana babûganga bage: "Kibumu kwa mpeta kûtwela mubûkolo bwa Kabesha Mpûngû!"

24 Baana babûganga begalagenie no mianda gyage, wêbalombwele byonka: "Benywe baana bane, kilûma biiko kûtwela mubûkolo bwa Kabesha Mpûngû! 25 Kiele ngamia kûûlûka mwilolo lya lusinge, kûlêmba mpeta kûtwela mubûkolo bwa Kabesha Mpûngû."

26 Baana babûganga bage, lwabategelele mianda gigyo, begalagenie biiko kwanansho bebûsenie bobene: "Nani wêbûnyonghona kûhanda?"

27 Yesû wêbalwele no wêbalombwele: "Kûbantû hakinyonghokeli, mone kwê Kabesha Mpûngû byonse byanyonghokela."

28 Kûwa Petelo umulombwele: "Lola, betwe twasiga byonse no kûkûlonda gwee."

29 Yesû wêndwêle "Sitêê," Namilombola, muntû gegense wêkasiga nsese gyage, "no mwanabo mwana mulûme ao mwanabo mwana mukasi ao nyage ao shage ao baana, ao mabala kibalo kyane no musahû gûsoga, 30 wêkaebwa nghendo mia kyaba kino: wakatambûla nsese, no ba mwanabo baana balûme, no ba mwanabo baana bakasi, noba nyage no baana no mabala. No bilya byonse wakatambûla kwa masûsû, no kyaba kyakasha bûkome bwa milembambagala. 31 ✝Mone balya babele batangi, bekaba ba nfulo, no balya babele banfulo bekaba batangi."

32 Yesû no baana babûganga bage kyaba kya babele bagyata Yelusalema, Yesû ûbele kûgêbwa kwabo, baana babûganga babele no kininga mumitêma; no bantû babele bamulonda batwelilwe no kaaga. Nfulo gyage ûtwalile byonka balya kumi no babêlê ûbambile kwêbalombola musahû gwa mianda gika mukuma. 33 Yesû wêbalombwele, "Mutegelele," "twagya Yelusalema kûlya Mwana wa Muntû wêkabêkwa mumaboko ga bakûlû ba balambwili no balangi babisila. Nobo bekamukalêla nsambû eyagwe bekamubêka mumaboko gabashantaila. 34 Nobo bashantaila bekamufutulula, no kumushêlêla mata, no bakamuûla nswii, no kumwiyaga; no nghimba gya masigi gasatû wakashûka."

35 Byonka Shake* no Yohane, baana ba Sebedayo, ba mugêlêle Yesû. "No kumulombola," "Mulangi, twakeba wetû longele kyokyonse kya tûshatûkûlombe." 36 Yesû wê babulishe: "Mwakeba nimilongele kêê?"

37 Nobo bamuêndwêle: "Wê tûtakêshe twêkane, gûmo kûboko kobe kûlûme, no gûnge kûboko kobe kûso kyaba kyolê kasha mu ntumbo gyobe."

38 ✝Mone Yesû wê balombwele: "Ha mwidjê kya mulê mukûlomba. Mwi bûnyonghona kwê kûbêla lûhêndê lwandê kekûbêla nene? Ao kû batisibwa lûbatisho lwandê kabatisibwa nene?"

39 Bamuêndwêle: "Twê bûnyonghona"

Yesû ûgêlêlêle kwê balombola: "Sitêê mwa kekûbêla lûhêndê lwandê kekûbêla, no mwi kabatisibwa lûbatisho lwandê kabatisibwa. 40 Mone nsina bûkome bwa kûbêka muntû kûboko kwane kûlûme ao kûboko kwane kûso. Antû alya abantû Kabesha Mpûngû ebalongele."

41 No balya kumi lwa bategelele mianda gigyo, babambile kwê basumininwa ba Shake* no Yoane. 42 ✝Yesû wê betile bonse no kwê balombola: "Mwi bamanye kwana balya babalwe kûba bakûlû babantû bakwimibêkala kwabumu, no bantû babo banyeme kwê bakomena. 43 ✝Mone, nabikabi nansho mu bûkata bwenyu, ntêê muntû gee kûkeba kûba mukûlû kwamulê, no abe mwingili wenyu; 44 no muntû wakeba kûba mutangi kwamulê, no abe mugya wabonse. 45 Kibalo Mwana wa Muntû hamushe kwê ngêlelwa; usile kibalo kya kwê ngêlêlana bantû no kuimia ngikeno gyage kûba alêpe bwikuli bwa bantû bangê."

46 Yesû no baana babûganga bage lwa baikile mu kibûndê kya Yeliko, kyaba kya babambile kuima Yeliko, no baana babûganga bage, amo no kibûngo kikata kya bantû. Muntû gûmo mpoki witilwe Batolomayo mwana wa Timayo ûbele mwikane kûnkondo gya ndjêla mu kûlomba lomba. 47 Noge lwe tegelele kwana ni Yesû Munasaleti wakuêta, ubambile kûta kahûndû no kwêsamba: "Yesû Mwana wa Daudi, nkyêlê lûsa!"

48 Bantû bangê bamukankêle kûba atalale. Mone ûgêlêlêle kûta kahûndû wêsambile: "Yesû Mwana wa Daudi, nkyêle lûsa!"

49 Yesû wêmene no kwêsamba: "Mumwite."

Nfulo bamwitile gûlya mpoki no kumulombola: "Wêhee mutêma! Gimana, wa kwêta."

50 Kyaba kye tegelele gilya mianda, ûtele kishandê kya mpeho, wêmene ûshenine kûbwêhê no Yesû.

51 Yesû umubulishe: "Wakeba nkulongele kêê?" Gûlya mpoki umuêndwêle:

"Mulangi, nankampwa mone byonka."

52 Yesû umulombwele: "Bagala lobe, lwêtabêsho lobe lwakûwandia."

Lwendo lûmo ûmwene byonka, umulondile Yesû mundjêla.