1 Yesû no baana babûganga bage lwa bashenine Yelusalema, kûbwêhê no ka kibûndê ka Betefage no ka Betania, kuikêla kû bwûhê no lûgûlû lwa Mpasi. Wêbatumine babêlê mu balya baana babûganga bage 2 wê balombwele: "Mugyate mu kalya ka kibûndê ke kûgêbwa kwenyu. No kyaba kyamulê kaika mulya, mwikamona mwana mpûnda mu kwêkwe, hûshalibandwe no muntû. Mumusokone mumpêle. 3 No ntêê muntû gee kwêmibûsha, kibalo kyakê mwalonga nansho? Mumulombole Kolo wakumukeba no byonka saamwibwêlêshe onkano."

4 Bagêle kûtana mwana mpûnda mu kwêkwe andje ankondo gya mushango gwa sense. Ba musokwene, 5 bantû bange babele bemane kûko be babulishe: "Kibalo kya kêê mwakumusokona mwana wa mpûnda?"

6 Nobo baana babûganga bage bebaêndwêle monka Yesû mwelibalagêlêle, nobo bantû balya bebalekele babagale. 7 Bamuêlêle Yesû gûlya mwana wa mpûnda, bandjile bisandê byabo kwêgûlû lyage, no Yesû wêkene egûlû lyage. 8 Bantû bangê bandjile bisandê byabo mundjêla, no bange matabê ga bakalile kûmabala. 9 ✝Bantû babele kûgêbwa no babele nghimba batele kahûndû besambile: "Hosana! Eselwe malyese gûlya wakûsha musina lya Kolo! 10 Bwêsêlwe malyese bûkolo bwakûsha ûbo bûkolo bwa shetû Daudi, hosana! Ntûmbo kwê Kabesha Mpûngû wi mwigûlû!"

11 Yesû ûtwelile Yelusalema, no kûgya mukitotelo,* no ebidjile kûlola bintû byonse mugela gonse. Alishabele nghimba usemukile kûgya Betania amo no balya kumi no babêlê.

12 No lukindwe, lwege Yesû no baana babûganga bage baimine Betania. Ûtegelele ndjala. 13 Ûmwene kwakûla mutê gwa kikûdjû gwêno mani gangê, nfulo ûgêle kûlola ange wêbumona bihelo kumutê gûlya. Mone aikile kubwêê no gûlya mutê, hamwene kintû nambo mani yaa, kibalo hakibele kyaba kyage kya kûa bihelo. 14 Kûwa Yesû wêsambile gûlya mutê: "Kûbamba lêno muntû hakali byonka bihelo byobe!"

Baana babûganga bage bategelele mwanda gûgo gwalisambile.

15 Yesû no baana babûganga bage lwabaikile Yelusalema, noge utwelile munda gya kisakye kya kitotelo* ûbambile kwêbakûmba bantû balya babele bagûsha no kûûla bintû byabo munda gya kisakye kya kitotelo*. Walabwêle mitalako gya basintya ba lûheto no bikoma byabo bya babele bagûsha nkûnda. 16 No hatakêshe muntû kûtwala kintû munda gya kisakye kya kitotelo.* 17 ✝Yesû ûbambile kwêbalanga no kwêbalombola: "Kisintwe mulûsinto lûlûmbûlûke: ‘Nsese gyane giketwa nsese gya milombelo kumiso gyonse.’ Mone benywe mwalikilonga kûba kisakyê kya baswinania!"

18 Bakûlû ba balambwili no balangi babisila lwabategelele musahû gûgo, bakebile bûlûle bwa kumutobesha Yesû. Mone bamutudjukile, kibalo kibûngo kyonse kigalagenie kwa milango gyage.

19 Akiikile kyaba kyalêngolo, Yesû no baana babûganga bage baimine andje gya kibûndê.

20 Lukindwe lwege, kyaba Yesû no baana babûganga bage babele bahêta mundjêla, bamwene gûlya mutê gwa kikûdjû gwa kûhûmba. Kûbambêla kûmatabê kwikêla kumisi. 21 Petelo wêdjûkene gilya mianda giitile, kûwa umulombwele Yesû: "Mulangi, lola, kikûdjû kyotele mulago gyahûmba!"

22 Kûwa Yesû wêbalombwele bana babûganga bage: "Mube no lwetabêsho kwê Kabesha Mpûngû. 23 ✝Sitêê nanimilombola, muntû gense wêkalombola lûgûlû lûlû kwana: Tekuka ûkete mwisiba no ntêê wenghe kaaga mumutêma gwage, mone wagitabêsha kwana bibyo byalê kesamba bikalongeka sitêê. 24 Kibalo kikyo namilombola, kyo kyonse kyamulê kalomba mumilombelo gyenyu, mwitabêshe kwana muwêle kûtambûla, no mwikamona. 25 ✝No kyaba kyamulê beemane kûlomba, ntêê wêno mwanda no muntû mulekelele, kibalo Tata wenyu wamwigûlû wêkemilekelela byonka nansho no benywe bûbê bwenyu." 26 Mone ntêê hamwiba lekelele bange, no Tata wenyu wêmwigûlû hemilekeleli benywe bûbê bwenyu byonka nansilya.

27 Yesû no baana babûganga bage baikile Yelusalema byonka. Yesû lwabele mukûtamba mukisakye kya kitotelo,* bakûlû ba balambwili, balangi babisila, no batata nkûlû , bamuikêle Yesû 28 bamubulishe: "Kwa kitenta kêê kyonokûlonga mianda gino? Noge nani ûkûele kitenta kino?"

29 Yesû wêbaêndwêle: "No nene shanimibûshe bûûsho limo, ntêê mwampêndûla, no nene byonka nansho shanimilombole kwa kitenta kêê kya nankûlonga mianda gino. 30 Munombole, Yoano ûmwene kitenta kyakûbatisha kuima kwinii: Kwê Kabesha Mpûngû ao kû bantû?"

31 Kûwa besongenie bo bene kwabo bene besambile: "Ntêê betwe kuêndûla, kwana kitenta kyage kiimine kwê Kabesha Mpûngû", shaetûbûshe: "Mwanda gwa kêê hamwibamwitabêshe?" 32 Mone betwe kwêsamba kwana: "Kiimine kûbantû." Batudjukile bantû, kibalo bantû bonse betabêshe Yoano kûba mumoni wasitê. 33 Kûwa bamuêndwêle Yesû: "Hatwêdje."

Yesû wêbalombwele: "No mwine nene nsimilomboli benywe, kwa kitenta kêê kyandê mukûlonga bino."