1 Nghimba gya sigi lya kwêtûsha lya Bayuda,* Malia Mandalena, Malia nyage wa Shake,* Salome, bolile makita gabusiko bûsoga kûba begunsinge mubêlê gwa Yesû. 2 Lukindwe bwee sigi ya djênga, djûba alibambile kuima, bagêle kukilêbû. 3,4 Nobo babele balibûsenia: "Nani wêketwiminia lilya bwee likata kumushango gwa kilebû?" Mone lwabalwele, bamwene bwee lyawa kulundumunwa ankondo; nolyo libele likata biiko. 5 Lwabatwelile mukilêbû, bamwene nsongwa lûme mwikane mugela gwa kûboko kûlûme, mushale bishandê bimunke nobo batudjukile biiko. 6 Mone nsongwa gûdjo wêbalombwele: "Namukatudjuki, mwakumukeba Yesû Munasaleti ûkolekilwe kumutê gwa mpêngampêtya, gee washûka mulolo antû abele mubêkwe ûano. 7 ✝Nfulo mugyate mukebalombole baana babûganga, no Petelo kwana: ‘Walimitangêlêla kûgya Galilaya kûko mwakamumona monka mwelimilombwelele.’"

8 Kûwa baimine kûkilêbû, no kûbamba lûbêlo babele mukukwaka no kwêgalagania biiko. No habalombwele muntû mwanda, kibalo batudjukile biiko.

9 Yesû lwawêle kûshûka lukindwe kusigi litangi lya djênga, umuimine bêlê Malia Mandalena, kwana uwimibwe minyaga gibê munda gyage. 10 Ûbambwêle ndjêla, wêbaele musahû balya babele amo nage Yesû, kyaba kikyo babele ba tompola no kûlêla. 11 Mone lwabamutegelele walisamba kwana Yesû wêpo noge umumwene, habamwitabêshe.

12 Nghimba gya ao, Yesû wêbaimine babêlê mubalya baana babûganga ûmonekile muswelo gûnge kyaba kya babele bagya kwêbala. 13 Lwabebwêlêle kwêbahêla musahû balya baange, nobo habebetabêshe.

14 Nghimba ûbaimine balya kumi no gûmo ababele balya. Wêbakankêle kwakûbûla lwêtabêsho lwabo, no lûma lwa mitêma gyabo kwakûba abebetabêshe balya bamumwene nghimba gya kushûka kwage. 15 ✝Kûwa wêbalombwele: "Mugyate mu kandje konse, mukasahûle musahû gûsoga kû bantû bonse. 16 Wakwêtabêsha no kûbatisibwa wakahanda. Mone usiketabêsha wakamona bûkalabale. 17 Mulole tûbandêlêlo tûno twakalondana no balya beketabêsha: kusina lyane bakaimya minyaga gibe, bekesamba kwalulimi lûya, 18 be kakwata ndjoka nontê bo kwêkûbêla bûlembe bobonse bwa kwêyaga, ha bûkemidjembya mbeela; be katenteka maboko gabo kûbatongi, nobo bekaanda."

19 ✝Kolo Yesû lwabidjile kwêsamba nabo, ûtekwinwe mwigûlû, no kwêkana kûboko kûlûme kwa Kabesha Mpûngû. 20 Nobo baana babûganga bagêle mu kûsahûla mpenga gyonse, Kolo wêngêle nabo amo, no kûkonkomeka musahû gwage kû ndjêla gya tûbandêlêlo tûlondene nabo.