1 Yesû wêbalombwele byonka: "Sitêê nanimilombola, mubûkata bwa bano beano kwêbamo habakantompi luki ntêê abalimone Bûkolo bwa Kabesha Mpûngû bwakûsha kwa bûkome."

2 ✝Nghimba gya masigi mutanda, Yesû ûtwalile Petelo, Shake,* no Yoano, ûgêle nabo kûlûgûlû lûla bugima bwabo. Kûko ûkenkile lûkebo lwege kûgêbwa kwabo, 3 bishandê byage bikenkile no bibele bimunke biiko, bisinyonghoni mufuli wa kandje kwibimunkya nansilya byabibele. 4 Ûao baana babûganga basatu bamwene Elia amo no Musa bakûbanga no Yesû. 5 Nfulo Petelo umulombwele Yesû: "Mulangi, kisoga betwe kûba ano! No tûlongye bitanda bisatû, kimo kyobe, kimo kya Musa, no kinge kya Elia." 6 Kibalo hamanyine kya kwêsamba, mwanda boonse batwelilwe no kyobi kiingê.

7 ✝Nfulo kile kisile kwêbaûta no bûlelo bwage, djûê liimine mu kilya kile: "Gûdjû ûmwanane wandê mukampwe mumutegelele gee!" 8 Lûkwe lûmo, baana babûganga bage balwele kûkû no kûkû; habamwene muntû gûnge, nambo Yesû bugima bwage amonobo.

9 No lwababele batûka kûlûgûlû, Yesû wêbakandile kwana: "Naba kalomboli muntû gegense mianda gyabamwene, kuikêla Mwana wa muntû ene kashûka kuima kûbaki."

10 Nobo bakwatêshe milago gigyo, mone babambile kwêbûsenia bobene kwa bobene: "Kûko kûshûka mubaki kwêno nsintwe kêê?" 11 ✝Bamubulishe Yesû banine: "Kibalo kyakêê balangi babisila bakwêsamba kwana kiyenene Elia ashebêlê?"

12 Yesû wêbaêndwêle: "Nisitêê, Elia muyenene kûshabêle, no kûbadjambûla bintû byonse. Kibalo kyakêê kisintilwe kwana Mwana wa muntû wêkasûsûlwa no kûbedjwa? 13 Mone nanimilombola kwana, Elia wawakûsha, no bantû bamulongele byonse byababele bakampwe, nagwe nansilya bisintilwe kibalo kyage."

14 No lwabaikile bange baana babûganga, bamwene kibûngo kikata kya bantû kibalagale no balangi babisila bakwakanania nabo. 15 Lûkwe lûmo, kibûngo kyonse akimumwene Yesû, kigalagenie biiko, kimugêlêle lûbelo kumwimuna. 16 Yesû wêbabulishe baana babûganga bage: "Mwakwêakanenia nabo kibalo kya kêê?"

17 Muntû gûmo mukibûngo umuêndwêle: "Mulangi, namusisha mwanane kolê, wakûdjembibwa no minyaga gibê no gyakumusibêla kwêsamba. 18 No kyaba kyonse gilya minyaga gya kumutubigania no kumuta ansê, noge wakuimwa no fuluu, nokwêhela meno, no kuumibwa. Nibalombile baana babûganga bobe bamuimie gilya minyaga gibê mone habanyonghwene."

19 Yesû wêbalombwele: "Benywe bantû balûbyalo lusi no lwêtabêsho! Kuikêla kyaba kêê kyandê kaba nenyu? Kuikêla kyaba kêê kyandê kemilêndêla? Mumusishe gûdjo nsongwa lûme ano andê!" 20 Nobo bamwilile gûlya mwana kwê Yesû.

No lwendo lûmo, gûlya mwana lwamumwene Yesû, gilya minyanga gibê gimudjugumbishe gûlya nsongwa lûme gumutele ansê, no mwana ûbambile kwêgalamuna galamuna, no kuimimwa no fuluu. 21 Yesû umubulishe shage wa mwana, "Emulû! Bino bimubambile kyaba kêê? Shage umuêndwêle.

"Ubambile kûlongeka nansino kûbambêla bwanike bwage." 22 "No makwe gangê minyaga gya kumugwêsha mukaya no mumadjê, kibalo gimutobeshe. Ntêê wêbûnyonghona kûlonga kintû, wêtûkyêle lûsa no kwêtûkwasha!"

23 Yesû umuêndwêle walisamba kêê, "Kuana wêbûnyonghona! Byonse byanyonghokela kwa gûlya wakwêtabêsha."

24 Lwendo lûmo, shage no gûlya nsongwa lûme ûtele kahundû wêsambile: "Nangitabêsha, mone lwêtabêsho lwane alûgwane, nkwashe kwakûbûla kwêtabêsha kwane!"

25 Noge Yesû lwamwene kûba kibûngo kyabûngakana bûkêlê, wêgikankêle minyaga gibêê. Wenine: "Ginywee minyaga gya bûmeme no gyampokoto, nene namitakêsha mumuime gûdjo nsongwa lûme namukamutweli byonka!"

26 Gilya minyaga gibûlwêle, no gimudjugumbishe gûndjo musongwa lûme byonka, no gimwimine. Gûdjo nsogwalûme umonekile nagwe mukye, no bange besambile: "Wakya!" 27 Mone Yesû umukwatile kûkûboko umwimikile, noge wêmene.

28 Kyaba Yesû kyatwelile mu nsese, baana babûganga bage bamubulishe kûkondo: "Kibalo kyakêê betwe atwêbanyonghone kuimia gilya minyaga gibê?"

29 Yesû wêbaêndwêle kwana: "Minyaga bigigi haginyonghokeli kuima, nambo, kwa kûlomba."

30 Yesû no baana babûganga bage baimine ao no kûkalûlûla kibûndê kya Galilaya. Noge Yesû hakebile muntû kûmanya antû abele, 31 Lola, byebalangile baana babûganga bage, wêbalombwele: "Mwana wa Muntû wagya kûbêkwa mu maboko ga bantû. Nobo beka mwiyaga, nghimba gya masigi gasatû, wakashûka."

32 Mone baana babûganga bage habegusingûlwêle gûlya mwanda, batudjukile kumubûsha.

33 Kyaba Yesû no baana babûganga bage lwabaikile Kapelenaumu, wêbabulishe: "Mubele mwaliakanenia mwanda kêê mundjêla?"

34 ✝Mone batalele, mwanda mundjêla beakanenie kwana nani muyenene mubûkata bwabo. 35 ✝Nfulo Yesû wêkene, wêbetile balya kumi no babêlê no kwêbalombola: "Muntû wakûkeba kûba mutangi kûbonse, muyenene kûba wanfulo kubonse no kûba mwingili wabonse." 36 Ûtwalile mwana wakitûtû no kumwimika abûkata bwabo. Umukumbatêle no kwêbalombola: 37 ✝"Muntû kûtambûla mwana gûmo wamuswelo gûgû kusina lyane, wantambûla nene; no muntû wakankûnka nene, hamunkûnke nene ya naambo gûlya untumine."

38 Yoano umulombwele Yesû: "Mulangi, tûmwene muntû gûmo ukumbile minyaga gibê musina lyobe, no betwe tumukandile, kibalo gee hagûmo netû."

39 Yesû wêbaêndwêle: "Namukamukandi, kibalo hakûle muntû wêkalonga byesha kusina lyane no kûnyonghona lwendo lûmo kunisambêla mabêhe." 40 ✝Kibalo ûshakwakanania netû, wêmugela gwetû. 41 ✝Sitêê nanimilombola, kwakûba gegense wêkemia madjê gakwêkûbêla, kibalo benywe mwi bantû ba Kilisitu, muntû gûdjo hekabûla kûebwa katolwa kage.

42 "Gûlya wêkagwêsha mwana gûmo mubûbê gûlya mungitabêshe, muyenene akwêkwe bwee likata munkingo gyage no kûtebwa mwisiba." 43 ✝Ntêê kibalo kya kûboko kobe kwakûgwêsha mubûbê, wêkûkale! Kiyenene kole kûtwela mu bûkome walê no kûboko kûmo, kûbûla kûba no maboko gabêlê, no kûtebwa mulûbêmbê lwakaya kasikusimika. 44 [Kuana mumo mwi byolo bisi kûkya, no kaya kasikusimika.] 45 Ntêê kibalo kya kûgûlû kobe kwakûgwêsha mubûbê, wêkûkale! Kiyenene kole kûtwela mu bûkome walê no kûgûlû kûmo, kûbûla kûba no magûlû gabêlê, no kûtebwa mulûbêmbê lwakaya kasikusimika. 46 [Kuana mumo mwi byolo bisi kûkya, no kaya kasikusimika.] 47 ✝Ntêê kibalo liiso lyobe lyakûgwêsha mubûbê, wilitukune! Kiyenene kolê kûtwela mu Bûkolo bwa Kabesha Mpûngû walê no liiso limo, kûbûla kûba no meeso gabêlê, no kûtebwa mulûbêmbê lwakaya kasikusimika. 48 ✝Kuana mumo mwi byolo bisi kûkya, no kaya kasikusimika.

49 Lûkwe lûmo muntû gense wêkabêkwa mukele kûkaya.

50 ✝Mukele kintû kisoga; mone ntêê mukele gwa siminia ntobo gyage, shamubêke kêê gûbe ntobo byonka?

"Mube no mukele munda gyenyu, mukekane angalê benywe kwa benywe."