1 Yesû ûtwelile byonka mu nsese gya milombelo gya Bayuda*, mubele no muntû gûmo ûbele no kûboko kwa bûlebe. 2 Bafalisayo bamulwele soo Yesû, bamone ntêê shaandye sigi lya kwêtûsha lya Bayuda*, kibalo bamone kumusongela. 3 Yesû umulombwele gûlya muntû wêno kûboko kwa bûlebe: "Gimana kûgêbwa kwa bantû bonse." 4 Yesû wêbabulishe: "Kikêê kitakisibwe kûlonga sigi lya kwêtûsha lya Bayuda*? Kûlonga bisoga ao kûlonga bibêê? Kûhandya ao kweyaga?"

Bonse bekene talala. 5 Yesû wêbalwele kwansûngû, ûkolelwe biiko kibalo kya lûûma lwa mitêma gyabo. Yesû umulombwele gûlya muntû: "Golola kûboko kobe." Noge olwele, kûboko kwage kwandile onka alya. 6 Onkao Bafalisayo baimine andje bebagêlêle bantû ba Helode, kûlonga sondjelo kibalo kyage bamone ndjêla gya kumwiyaga.

7 Yesû ûgele no baana babûganga bage kû nkondo gya siba lya Galilaya, kibûngo kikata kya bantû ki mulondile. Kuima Galilaya, no Yudea, 8 no Yelusalema, no Idumaya, no bwala bwa Yolodano, no mugela gwa Tilo no Sidona. Kibûngo kikata lwa kitegelele musahû gwa mianda gyabele walonga ba mugêlêle. 9 ✝Kibalo kya bûngê bwa bantû, Yesû wê balombwele baana babûganga bage kwana mu mbêkêle bwato, kibalo kya kibungo na kikasi ku mpininika. 10 Nagwe nansilya byahandishe bantû bangê, bonse babele no mitongo babêngêle kwalê kibalo bamukume. 11 Kyaba bantû babele no minyaga gibe lwa bamumwene Yesû ba mukutamine kûgebwa kwage, no batele kahûndû besambile: "Gwe ûmwana wa Kabesha Mpûngû!"

12 Mone Yesû wê bakandile kwa busi na baka mu singûlûsha kû bantû.

13 Kûwa Yesû ûselile kûlûgûlû wê betile balya be kampilwe gee mwine. Bamugêlêle, 14 mu bûkata mwabalya bagitile ûsolwele bantû kumi no babêlê, bagitile bikûla, bekane amo nage, kibalo abe wa libatuma kûsahûla, 15 byonka kwê batanga bûkome bwa kûkûmba minyaga gibê.

16 Lola bikûla kûmi no bibêlê ûbino: Simo, ûwelwe sina lya Petelo no Yesû, 17 Shake mwana wa Sebedayo no Yoane mwanabo, Yesû wê benikile sina lya Boanege, nsitwe gyage: "Baana ba mukuma gwa nkûba" 18 Andele, Filipo, Batolomayo, Mateo, Toma, Shake* mwana wa Alufayo, Tadeo, Simo wa mumulongo gwa Baseloti, 19 Yuda Isikaliota, ûge gûlya umuiminie Yesû.

20 Kyaba Yesû lwa gibwêlêle mu nsese, kibûngo kikata kibûngakene byonka. Kûba Yesû no baana babûganga bage ha banyonghwene no kwêne kûlya kya kûlya. 21 Kyaba ba mbyalwa nage lwa bategelele mwanda gûlya, baimine kûgya ku mutwala Yesû kwabumu, kibalo bantû besambile: "Wa tumuka bûlûbê!"

22 ✝Nobo balangi babisila batukile kuima Yelusalema besambile nansino: "Wêno minyaga gya Belesebuli munda gyage! No kwa bûkome bwa mukûlû wa minyaga gibe wa kûkûmba minyaga."

23 Onkao Yesû wêbetile wê balombwele kwa nkêndê wê sambile: Mu nombole Satana wê bûnyonghona ku mukumba Satana? 24 Ntêê ba bûkolo bûmo bo kûsansûlûka, bûkolo bûbo abugililili. 25 Byonka bantû ba nsese gimo bo kûsansûlûka, nsese gigyo agigililili. 26 Ntêê Satana gee kwê lwêsha gee mwine, no ntêê wa sansûlûka, bûkome bwage abugililili nambo sabuike nfulo.

27 "Byonka hakûle muntû wê bûnyonghona kûtwela munda gya nsese gya muntû wêno bûkome, no kuswinia bintû byage ha kumuganga bêlê muntû gûdjo migosi, nambo saa mugange bêlê gûlya wêno bûkome; ao ûalê ka muswinia bintû byage bya mu nsese.

28 "Sitêê na nimilombola, baana ba bantû beka lekelelwa bûbe bwabo bonse. No kûbedja kwabo konse kwa besambile kibalo kya Kabesha Mpûngû. 29 ✝Mone ntêê muntû wa bedja Mutêma Gûlûmbûlûke ha kalekelelwa. Wêno bûbê bwa miaka." 30 Yesû wê balombwele nansho kibalo besambile: "Kwana wêno minyaga gibê."

31 Kyaba kisile nyage wa Yesû no bamwanabo, bemene andje, batumine muntû ku mwita. 32 No bibûngo bya bantû bangê bibele bi mwalagale Yesû, ba mulombwele: "Lola, nyobe no bakwa nyobe beandje, ba kûkûkeba."

33 Yesû ûêndwêle: "Nani madjû wane? No bambyalwa nane bani?" 34 Wê balwele balya babele ba mwalagale, wêsambile: "Lola! Madjû wane no bambyalwa nane! 35 Muntû gegense wê kalonga kiswa mutêma kya Kabesha Mpûngû, gûdjo ûmwanetû, no nkasibyala gyane, no hû madjû wane."