1 Nfulo Yesû lwabele waima mu nsese gya kitotelo,* gûmo wa baana babûganga bage umulombwele: "Mulangi! Lola, bûlûlê mabwe gaga no mpimpêlo gigi bya gilê gya bitûdjûdjû!"

2 Umuêndwêle: "Wamona mpimpêlo gigi gikata? Hakûle noline bwee limo likasigala egûlû lya linge; kintû kyonse kiongolwa."

3 Yesû kyaba kyabele mwikane kûlûgûlû lwa Mpasi, mubûlûlê bwa kitotelo,* Petelo, Shake,* Yoano no Andele, bamubulishe kûnkondo: 4 "Wêtûlombole, mianda gino gikaba kyaba kêê? Byesha kêê bikalangêsha kwana mianda gino agikûbwêê kûgwanibwa?"

5 Yesû ûbambile kwêbalombola: "Mube meso muntû nakasi kwimibemba. 6 Kibalo bangê bekasha kusina lyane, no kwêsamba: ‘Ninene ûge Kilisitu!’ Nobo bekabemba bantû bangê. 7 Kyaba kyamulê kategelela musahû gwa lûgosi no nganingani gya lûgosi, namukadjembi. Kiyenene mianda gigyo giimine, mone nfulo hagyaliike. 8 Kuana musoo gûmo gwêkalwa no musoo gûûnge; bûkolo bûmo bwêkalwa no bûkolo bûnge. Kwêkaimina haanda mu kandje hantû ala ala, kwêkaba lûûma lwa bya kûlya. Mianda gigi aginagwe mubambo gwa mûsûsû gatangi ga mwanamukasi wakûbyala mwana.

9 ✝"Mone benywe mu tegelele bilya bya kemiikêla! Bantû bekemiila kûbangabanga. Be kemiûla mu nsese gya milombelo gya Bayuda,* bekemiila kûgêbwa kwa bakûlu ba bitenta no kwê babêkali kibalo kyane. Mwanda mu kansitêkêkye kûgêbwa kwabo. 10 Kiyenene bêlê mwanda gûsoga gûsahûlwe kumisoo gyonse. 11 Kyaba kyabalê kemikwata no kwimiila kûbangabanga, na mukabi mpewampewa namukakebi bilya byamulê kesamba, mone mwisambe gilya gyamulêkaebwa kyaba kyonka kilya, kwakûba habenywe bakwêsamba; nambo, Mutêma Gûlûmbûlûke. 12 Mwanabo wakamuana mwanabo nage eyagwe, shage wakamuana mwanage eyagwe. Baana bekaba bamangi ba babyali babo nobo bekebeyagya. 13 ✝No benywe mwakasikibwa no bantû bonse kibalo kya sina lyane. Mone gegense wêkalêndêla kuikêla nfulo, ûge wêkaanda.

14 ✝"Kyaba kyamulê kamona Kûûngêsha kwa bonenkania kwagimana antû alûmbûlûke." Musomi no asingûlûle kibalo kyage, babo beku Bayuda batinine kûngûlû. 15 ✝No muntû gense wêkaba mukidjendje kya nsese nekatweli munda kûtwala mo kintû. 16 Gûlya noge wêkaba kwêbala nekebwilili kwage kûtwala kishandê kya mpeho kyage. 17 Musibo gwabo ba madjû bemite no bakonkya mu sigi lilyo! 18 Mulombe Kabesha Mpûngû kibalo mianda gigyo nagikaimini kyaba kya mpeho!* 19 ✝Kibalo mumasigi gago kwêkaimina masûsû gakata gashalimweke kûbambêle sigi lilya Kabesha Mpûngû ehangile kandje kuikêla noano. No hakûkaimini byonka masûsû bigano. 20 Ntêê Kolo aswele kûtaûla masigi gago, hakûswele kûba muntû wakûhanda; mone wêgatawêle masigi gago kibalo kya basololwa bage. 21 "Kyaba kikyo muntû gee kwimilombola: ‘Mulole, Kilisitu!’ Wêano ao, ‘Wêkulya!’ Namuketabêsha. 22 Kibalo kwêkaimina ba Kilisitu no bamoni ba buumpi, nobo bekalonga kabandêlêlo kabyesha no bitudjûdjû, kibalo kya kûlûbya, ntêê byabilê binyonghokele, baswa kûlûbya no basololwa ba Kabesha Mpûngû. 23 Mone benywe mube meso! Kibalo nanimilombola mianda gyonse kûgêbwa agyaliikêle.

24 ✝"Kûwa masigi gago, masûsû agalê kawa, djûba lya kaba kidjo, no kwesi hakukankeki, 25 ✝no tûmbalambala twa egûlû twakagwêla, no bûkome bwa mwigûlû bwê katingina. 26 ✝Ao bekamumona Mwana wa Bantû, wakûsha mumalesigûlû no bûkome bûûngê no ntumbo. 27 Kyaba kilya wêkatuma bamasalagûlû no kukuminkania basololwa bage kuima mpenga gyonse gina gya kandje, kuima nfulo gya kandje no nfulo gya gûlû.

28 "No mwilange kuima kumutê gwa kikûdjû Kyaba matabê gage agesenene no mani gage gatintila, musingûlûle kwana kyaba kya bûdjogo kyaikêla. 29 No benywe kûmona mianda gigyo ntêê agyakwika, musingûlûle kwana Mwana wa Muntû wêkûbwêhê, no wêkumushango. 30 Sitêê nanimilombola benywe muso gûno hagûkaite ntêê mianda gigyo gyonse hagyaliimine. 31 Gûlû no kandje bikaêta, mone mianda gyane agikahiti mbeela.

32 ✝"Mone, hakûle muntû mumanye, sigi no kyaba kikyo; no gene masalagûlû gamwigûlû, no Mwana; nambo Tata bugima bwage umumanye. 33 Mube meso no mulombe, kibalo hamwidjê byakelêka kyaba kêê. 34 ✝Kikaba nagwe muntû wêmulwendo, usigile nsese gyage ûwele muntû gense mugêlo gwage no kûtakêsha muhempi wamushango abe meso. 35 Nfulo mube meso, kibalo hamwidjè mwine nsese kyaba kyalêkasha; ntêê lêngolo ao mumandê ga busigi ao akûbêlêkela kwa nkoko ao mugûndja. 36 Ntêê washa kimpûlû mpandja, nakasi kwêmitana mubêdjê. 37 No gûgo gwa nanimilombola benywe, nanimilombola bonse: mube meso!"