1 Mubambo gwa Musahû Gûsoga gwa Yesû Kilisitu, Mwana wa Kabesha Mpûngû, 2 ✝Monka mwa gusintêlwe mu bûkû lya mumoni Isaya:

"Lola nikamutuma, ‘Mukendi wane kû gêbwa kobe

Wê kalongya ndjêla kû gêbwa kobe.’

3 ✝Djûwê lya muntû wakûta kahûndû mu kianya:

‘Mwi gilongye ndjêla gya Kolo;

Molole maêto gage!’"

4 Yoane usile wa batisha kûko ku kianya, mu kûsahûla lû batisho, "Kibalo kya lû lekelelo lwa bûbê." 5 Bantû kuima mwalo gwa Bûyaudi bonse no kiba kyonse kya Yelusalema babele bamuikêla. Nobo besasile bûbê bwabo, wê babatishe mu lûdjê lwa Yolodani.

6 ✝Yoane ûshalile bi shalanwa bi longesibwe, no mabisi ga ngamia no ki kadja kya kiseba mû lûbûnda lwage, kya kûlya kyage lûbele lugige no bûkê bwalûngû. 7 Noge ûsawêle wê sambile: "Nghimba gyane wê kasha gee wêno bûkome kû nêmba nene. Kwana nsinyonghoni ku kutama no kû djogya migosi gya mi kalabanda gyage. 8 Nene na nimibatisha mu madjê, mone gee wêke mibatisha kwa Mutêma Gûlûmbûlûke."

9 No kyaba kilya Yesû uikile kuima Nasaleti kibûndê kya Galilaya, ûbatisibwe no Yoane mu lûdjê lwa Yolo dani. 10 Kyaba kyaimine mu madjê, ûmwene gûlû lya ûtûlwa no Mutêma gutukile egûlû lyage omwena nkûnda. 11 ✝No djûwê litegelelwe kuima mwigulu: "Gwee ûmwanane mu kampibwa. Wandê mulogêlelwe Nage." 12 Lûkwe lûmo ûlûlwêlwe no Mutêma kûgya mu kianya, 13 wêkene kûko masigi makumi gana, ûtompilwe no Lyabola. Ûbele kûko amo no banyama ba mwilungu, no masalagulu gabele gamuêla kya kûlya.

14 Kyaba Yoane lwa kwatilwe no kûbêkwa mu kikutu, Yesû ûgêle Galilaya ûsawêle Mwanda Gûsoga gwa Kabesha Mpûngû, wêsambile: 15 ✝ "Kyaba kya gwanina, no Bûkolo bwa Kabesha Mpûngû bwa shena! Mwisase no kwê tabêsha Mwanda Gûsoga!"

16 Sigi limo, Yesû ûbele waêta kû nkondo gya siba lya Galilaya, wê bamwene balobi babêlê Simo no Andele mwanabo, babele balaba makila gabo munda gya madjê mu kwela misha kibalo babele balobi. 17 Yesû wê balombwele: "Munonde no nene nsanimilonge kûba balobi ba bantu." 18 Lûkwe lûmo, basigile makila gabo ba mulondile.

19 Yesû lwa gêlêlêle no lwendo, umumwene Shake,* mwana wa Sebedayo, no Yoane mwanabo, babele munda gya bwato mu kûdjo bolola makila gabo. 20 Onkao, Yesû wêbetile, nobo ba musigile shabo Sebedayo mu bwato amo no bengili, ba mulondile.

21 Yesû no baana babuganga bage lwa batwelile mu kibûndê Kapelenaumu. Aliikile sigi lya kwêtûsha* Yesû ûtwelile mu nsese gya milombelo gya Bayuda*, ûbambile kûlanga. 22 ✝Bantû bonse bategelele begalagenie no milango gyage, kibalo wêbalangile nagwe nigee wêno kitenta, no anagwe balangi babisila.

23 No mukyaba kyonka kikyo, mu nsese gyabo gya milombelo gya Bayuda*, mubele muntû gûmo ubele no munyaga gûbê, ûtele kahûndû: 24 "Yesû Munasaleti, twênobe kibalo kee? Washa kwê tûtobesha? Nankûmanya gwee weni, gwee wê Mulûmbûlûke utuminwe no Kabesha Mpûngû."

25 Yesû wêgûkankêle gûlya munyaga gûbe kwabuusi, wêsambile: "Ûtakania no muime muntû gûdjû!"

26 Gûlya munyaga gûbê gûmuninghinie kwa bumu muntû gûdjo, gumuimine no gulilile kwa djûê likata. 27 Bonse begalagenie no babambile kwebûsenia besambile: "Mianda kêê gino? Milango giya gidjûle bûkome! Kibalo muntû gûdjû wagitakêsha minyaga gibê nogyo gya mukokela!"

28 Lwendo lûmo, mwanda gwage gûgwanine mwalo gugima gwa Galilaya.

29 Kyaba Yesû kyeimine mu nsese gya milombelo gya Bayuda*, bagêle amo no Shake* no Yoano mu nsese gya Simo no Andele. 30 Mone, nyage bûko wa Simo, ûbele mutongi wa kisûngû, lwendo lûmo bamulombwele Yesû mwannda gwa gûlya madjû. 31 Umuikêle gûdjo madjû, umukwatile kûkûboko no kumwimika. Kisûngû kimulekele, no ûbambile kwêbatekela kyakûla.

32 Alishabele lêngolo, djûba bya lyawa kûtwela, bamuêlêle Yesû batongi bonse no bantû babele no minyaga gibê. 33 Bantu bonse bakibûndê bebungile mbelê gya mushango. 34 Noge Yesû ûwandishe bantû bengê babele no mitongo ala ala, ukumbile minyaga gingê. No egilekele minyaga kûnenghena, kibalo gimusingûlwêle gee nani.

35 Djo lyage lukindwe nghimba gya kûkendûlûka, Yesû ubyukile kuima musense ûgele kûkabenga, no kûbamba kûlomba. 36 Simo no benage bagêle kumukeba. 37 Nobo lwabamumwene, bamulombwele: "Bantu bonse bakûkûkeba."

38 Mone Yesû wêbaêndwêle: "Tûbagale antû ange kûbibûnde bikûbwêê. Mwanda kasahûle kûko noko, kibalo kikyo ûkyanshêlêle."

39 ✝Ûgêle wasahûla mu nsese gyabo gya milombelo gya Bayuda*, mumwalo gonse gwa Galilaya, no kûkûmba minyaga gibê.

40 Kusile kwelê muntû wa bûsûngû, umwigadjile no kumukutamina, no kumulomba, "Gwe kûkampwa," "Wêbûnyonghona kumunkya."

41 Noge Yesû umukyêlêle lûsa holwele kûboko kwage, umukumine muntû gûdjo, umulombwele: "Nankampwa munkibwa." 42 Lwendo lûmo bûsûngû bwage bumwimine, no ûandile no kumunkibwa. 43 Onka alya Yesû umulombwele agyate bûkêle no kumulombola kwa kumukonkomeka, 44 ✝"Lola, no kalomboli muntû mwanda gogonse. Nambo bagala wêlangêshe kwê mulambwili; no ûkalambûle mulambû mulagêlêle Musa kwa kumunkibwa kobe, kabe kamoni kwa balê."

45 Mone gûdjo muntû lweimine ûbambile kûbanga mianda ûtû ûtû. No kutûmbya gûlya mwanda, no Yesû anyonghwene byonka kûtwela mukibûndê kwa ûtû ûtû. Yesû wêkene andje gya bibûnde mukabenga, bantû bamugêlêle kuima mugela gyonse.