1 Lukindwe bwee bakûlû ba balambwili balongile sondjelo, amo no batata nkûlû, balangi babisila, no kilye kikata. Lwabawêle kumukwêka migosi, bamuilile kwê Pilato. 2 Pilato umubulishe Yesû: "Gwe ûge Kolo lya Bayahudi?"

Yesû umuêndwêle: "Nigwe walisamba."

3 Nobo bakûlû ba balambwili babele bamusongela Yesû ku mianda gingê. 4 Kûwa Pilato umubulishe byonka: "Onokwêndûla mwanda? Wategelela byonse byaba kûsongela!"

5 Noge Yesû haêndwêle mwanda byonka, no mwine Pilato wêgalagenie.

6 Kyaba kyonse kya sigi likata lya Pasaka,* Pilato wêdjêbêle kwêbasokwena mukwêkwe gûmo gûlya wabasolwele bantû. 7 Kyaba kikyo, kûbele muntû gûmo sina lyage Balaba ûbele mutatwe amo no bantomboki beyagene kyaba kya fulugo. 8 Kibûngo kisile kûsense gya Pilato kumulomba ebalongele nansilya byebele mwidjêbêle. 9 Pilato wêbaêndwêle: "Mwakeba nimisokwene Kolo lya Bayahudi?" 10 Wêsambile nansilya kibalo usingûlwêle kwana bakûlû ba balabwili bamuanine Yesû kwa bûkwa.

11 Mone bakûlû babalambwili basomenkenie bantû kwana, Pilato ebasokwene Balaba. 12 Byonka Pilato wêbabulishe bantû: "Shatûlonge kê gûno wamwakwêta Kolo lya Bayuda?"

13 Babûlwêle byonka no besambile: "Akolekwe!"

14 Pilato wêbalombwele: "Bûbê kêê bwalongile?"

Mone bagêlêlêle kûbûlûla: "Akolekwe!"

15 Pilato ûkebile kûnenghesha kibûnago, wêbasokwene Balaba. Kûwa kumukusha Yesû nswi, no ûmwanine akolekwe.

16 Basilêkalê bamwilile Yesû mu bangabanga, munda gya sense gya mubêkali nobo betile kibûngo kya basilêkale kyonse kikuminkene. 17 Bamushikile Yesû kishandê kya mpeho kitêlêle, baotwele nkata gya miiba, bamubikile kwê twe. 18 Kûwa babambile kumwimuna no kwêsamba: "Lwimu Kolo lya Bayahudi!" 19 Bamukusile lûlenge kwêtwe, bamushêlêle mata, bamukutamine, no kumutota. 20 No lwabawêle kumusopwela, bamushulile kishandê kilya, bamushikile bishandê byage mwine. Bamuilile andje mwanda bamukoleke.

21 ✝Muntû gûmo sina lyage Simo wa Mukilene, shabo wa Isikanda no Lufo, ûbele waêta alya mukuima kûmabala; basilêkalê bamukonkeleshe atwale mutê gwa mpênga mpêtya gwa Yesû. 22 Bamuilile Yesû antû akwêtwa Gologota, sintwe gyage: "Antû akûdja lya twee." 23 Bamuele difai lisangelêlwe no mananange, mone gee ûbengile kwêkûbêla. 24 ✝Kûwa bamukolekile Yesû kumutê gwa mpêngampêtya, batele kishandê kyage bûbale, kibalo bamanye kintû kê kibûtwala gûmo mu bishandê bya Yesû. 25 Akigwanine kyaba kya djûba lya kyonta bakote nobo bamukolekile. 26 Abele no Lusinto lwa kûlangêsha kibalo kya kûkolekwa kwage, Lusintilwe kwana: "Kolo lya Bayuda." 27 ✝Amo no Yesû ûkolekilwe no baswinanya babêlê, gûmo kûboko kwage kûlûme no gûnge kûboko kwage kûkasi. 28 Kwanasho lûgwanine Lûsinto lwêsambilwe, "ûbalêlêlwe amo no baswinanya."

29 ✝Nobo babele baêta mundjêla bamutukile no kuukumia matwe gabo banine: "Aaah! Gwe ûkebile kubungula kitotelo* no kuimpa kinge mu masigi gasatû! 30 Wêhandie gwe mwine tûka kumutê gwa mpênga mpêtya!"

31 Byonka nansho bakûlû ba balambwili no balangi babisila, bamusompwele Yesû no kwêsongenia besambile: "Mulole ûhandishe bange, mone wagandwa kwê handya gemwine! 32 Kilisitu, Kolo lya Isilaeli, atûke anompe kumutê gwa mpêmgapêtya, ntêê twamona watûka shatûmwitabêshe!"

No bene balya bakolekilwee nage amo noobo bamutukile.

33 Kûbamba kyaba kya meeno kenene, kuikêla kyaba kya djûba lyahûla malelo, abele kidjo egûlû lya kandje konse. 34 ✝Djûba aliulile malelo, Yesû ûbûlwêle djûê likata: "Eloi, Eloi, lama sabakatani" kusintûla kwage: "Kabesha Mpûngû wane, Kabesha Mpûngû wane, mwanda gwakê wandekela?"

35 No bantû bamo babele alya bamutegelele, besambile: "Tegelela, wamwita Elia!" 36 ✝No gûmowabo ûgêle lûbelo, kûtwala musompo kûtomia mu difai lya bûsoswe, no kwêgûbêka kûlûlenge. Umuele ekûbêle, wêsambile: "Muleke tûmone ntêê Elia swaashe kumutûkya kumutê gwa mpêngampêtya!"

37 Mone Yesû wiminie djûê likata, no ukile.

38 ✝ Kikêngo kya kitotelo* kyatikile biba bibêlê, kûbamba egûlû kuika ansê. 39 Ntwasha wabasilêkale wa Baloma, ûbele mwimane alya lwamwene wakala Mutêma muswelo gûgo, wêsambile: "Sitê muntû gûdjû ûbele mwana wa Kabesha Mpûngû!"

40 ✝Abele no baana bakasi babêlê balwele kûlampee; mubûkata mwabo abele Malia Mandalena, Malia nyage wa Shake* mwanike, Yose no Salome. 41 Bano bamulondile Yesû abele Galilaya no kumukwasha. Kûbele no baana bakasi bange bengê basile Yelusalema amo nage.

42 Kyaba kya lêngolo akiikile. Lilyo libele sigi lya bûlongololi, kwana lya kûbyûkêla sigi lya kwetûsha kwa Bayuda.* 43 Ao asile Yosefu mwine wa Alimataya, ûbele muntû munyeme mukilye kya bakûlû, noge ûbele wahempa Bûkolo bwa Kabesha Mpûngû. Kwa nansho ûgêle kwa kûbûla mwenyo kwê Pilato, kwa kumulomba mubêlê gwa Yesû. 44 Pilato wêgalagenie biiko kibalo kyakûtegelela kwana Yesû wawa kûkya. Nfulo, umwitile gûlya ntwasha wabasilêkale wa Baloma no kumubûsha kwana Yesû ntêê wakyanga kala. 45 No awêle kûtegelela mpêndwe gya gûlya ntwasha wabasilêkale wa Baloma, Pilato umutakêshe Yosefu kûtwala mubêle gwage. 46 Noge Yosefu ulile malekani gamunke, usindwêle mubêlê gwa Yesû kumutê gwa mpêngampêtya, umuombile malekani, umubikile mukilêbû kisongwe mwibwe. Kûwa ulundumwine bwee likata kusika kumushango gwa kilêbû. 47 Nobo Malia Mandalena no Malia nyage wa Yose balwele antû abikilwe Yesû.