1 Munyemekwa Teofilo, bantû bangê balianinina kusinta ma bûkû kibalo kya mianda gilya gilongekile abûkata bwetû. 2 Basintile monka mwatûlombwelwe no balya bamwene mianda gigyo kûmeso gabo kuikêla mubambo batûmbêshe musahû gûgo. 3 Nene nonene, nghimba gya kusitêkêkya mianda gyogyonse, kûbambêla mubambo, mwene kisoga kukusintêla musahû gwa mianda gino, 4 kibalo ûnyonghone kûmanya sitê lya mianda gilya gyolangilwe.

5 ✝Kyaba Helode lwabele Mubêkali wa mu Yuda gûno mwanda gwa kwê djûkania mwalo gonse gwa Palesitina kûbele no mulambwili gûmo sina lyage Sakalia, wa bûmbû lya mulambwili Abiya; mukashage ûbele wagitwa Elisabeti, noge ûbele wa bûmbû lya mulambwili Haloni. 6 Bonse babêlê Sakalia no Elisabeti babele balûmbûlûke kûgêbwa kwa Kabesha Mpûngû bekene kwakûlonda bisila no milago gyonse gya Kolo kûbûla nsadjê. 7 Mone hababele no baana kibalo Elisabeti ûbele nghumba, nobo bonse babêlê babele bakote biiko.

8 Sigi limo kibele kyaba kya kwêmena kibûngo kya bûlambwili Sakalia gee ûbele mukwêngêla mu Kitotelo, kûgêbwa kwa Kabesha Mpûngû. 9 Sakalia ûsolwelwe kwa bûbale kûlondana no kisela, kya bûlambwili kûtwela mu Kitotelo. Kya Kolo kûba asigye nange, 10 bantû kibûngo kikata, babele babûngakane andje kûlomba kyaba kilya Sakalia abele mukusigya nange.

11 Masalagûlû ga Kolo gamwimine mumo munda, gemene mugela gwa kûlûme kwa kadjaba ka kusigêsha nange. 12 Kyaba Sakalia lwamumwene gûdjo masalagûlû, ûdjembile biiko kyobi kimutwelile. 13 Mone Masalagûlû ûmulombwele, "Sakalia, no katudjuki kibalo milombelo gyobe gyategelesibwa no Elisabeti! Mukashobe sha akûbyalêle, mwana wa mwanamulûme. Nogwe saumwinike sina Yoano. 14 Saûbe no mulogo gûkata no bantû bangê sabalogelelwe, kibalo kya kûbyalwa kwage! 15 ✝Kibalo wêkaba mukûlû kûgêbwa kwa Kolo. Hekekubili Bihênde no kintû kyokyonse kilya kikamukosha noge wakadjusibwa. Mutêma gûlûmbûlûke kûbambêla munda gya nyage, 16 wakebebwêlêsha bantû bangê ba Isilaeli kwê Kolo Kabesha Mpûngû wabo. 17 ✝Noge wêkatangêla kûgêbwa kwa Kolo, wêkaba no mutêma nagwe gwa Elia no bûkome. Kûba kwêgyalabûla mitema gya batata; kwêbwêlêlêla baana babo no balya basi bakokele bebwêlêle mu lweni lwa beno sitê; kûba kûbêka djambûla bantû babikilwe djambûla kwê Kolo."

18 Sakalia umubulishe gûdjo masalagûlû: "Nikamanyantê mianda gino? Nene ni mukote, no mukashane swa mukote biiko."

19 ✝"Masalagûlû umuêndwêle, nene ni Gabulieli," wêkwêmana kûgêbwa. "Kwa Kabesha Mpûngû, nene natumwa nisambe nogwe nkûlombole gûgû musahû gûsoga. 20 Tegelela, saûbe kameme kibalo hawêmwitabêshe gino mianda gyane gya kagwanina kwa kyaba kyage. Wê kanyonghona kwêsamba, kuikêla gigyo gya nkûlombwele; agilê kagwanina."

21 Kyaba kikyo balya bantû babele bamuempa Sakalia kûno begalankenie kibalo kya kwêsha kwage mu Kitotelo. 22 Kyaba Sakalia lwaimine andje, hanyonghwene kwêsamba nabo, basingûlwêle kwana ûbele wamona bimonwa munda gya Kitotelo. Kibalo ûbele walibalanga kwa malengania kûmaboko, mwanda ûbele kameme.

23 Kyaba kyage kya mugêlo akigwanine, wêbwêlêle kû nsese gyage. 24 Nghimba gyage Elisabeti mukashage wimitile limi wibisikile mu nsese gyage kyaba kya miesi gitano wêsambile. 25 "Nansino ûbyo byanongele Kolo," ûndwele no kunsindwêla nsoni. "Gya mbele nagyo kûmeso ga bantû!"

26 Elisabeti lwabele no limi lya miese mutanda Masalagûlû Gabulieli utuminwe no Kabesha Mpûngû abagale kukibûndê kya kwêtwa nasaleti kûko kû Galilaya. 27 ✝ kwa nsongwa kasi gûmo musike wakwêtwa Malia musongwe wa muntû gûmo sina lyage Yosefu, wa musoo gwa Daudi. 28 Noge Masalagûlû gamugêlêle Malia gamulombwele, "Lwimu gwe ûwelwe kya buntû! No Kabesha Mpûngû Kolo wêamo nobe!"

29 Mone Malia lwategelele mianda gigyo ûdjembile biiko mu mutêma gwage, wibulishe mianda gino gyalangêsha kêê. 30 Hûao Masalagûlû umulombwele, "Malia, Nokatudjuki; kibalo watambûla kya bûntû kya Kabesha Mpûngû. 31 ✝Lola ûsawimite limi no wakabyala mwana wa mwana mulûme, wêkamwinika sina lyage Yesu. 32 ✝Mwana gûdjo wêkaba mukûlû no wêketwa mwana wa wêmwigûlû biiko. Kolo Kabesha Mpûngû sha amuwe kikanwa, kya bûkolo bwa Tata nkûlû wage Daudi, 33 kwanansho wêkabêkala nsese gya Yakobo milemba mbagala; no bûkolo bwage habûkabi no nfulo!"

34 Malia umubulishe masalagulu, "Sagûbe ntêê. Mwanda gûno, Kûba nene, ni musike?"

35 Masalagûlû umuêndwêle, "Mutêma Gûlûmbûlûke, gwêkakûtûkêla no bûkome bwa Kabesha Mpûngû bwêkakuikêla nagwe kinsinsha. Kibalo kikyo mwana wêkabyalwa wêkaba Mulûmbûlûke no wêketwa Mwana wa Kabesha Mpûngû. 36 Manya swaa kwana no Elisabeti. Mbyalwa nobe, noge wagimita limi lya mwana wa mwana mulûme nanso ntêê mukote, no gûno mwesi gwage gwa kûlongolo gee bantû basingûlwêle kwana ni nghumba. 37 ✝Kibalo hakûle mwanda gusinyonghokeli kwê Kabesha Mpûngû."

38 "Malia wêndwêle lola nene," ni mwingili wa Kolo nongelwe monka; "molisambêle kûwa galya masalagûlû." Gagêle lwege.

39 Masigi gabalwa nghimba Malia ûsemukile ûgêle bûkêlê kuikêla kibûndê kimo kibele kûngûlû gya Yuda. 40 Kûko ûtwelile mu nsese gya Sakalia umwimwine Elisabeti. 41 Kyaba Elisabeti lwa tegelele lwimu lwa Malia, mwana ûbele mulûsho lwage Elisabeti uninghine. Noge Elisabeti udjusibwe Mutêma Gûlûmbûlûke 42 wêsambile djûwê likata, "Wagisêlwa malyese kûlêmba bana bakasi bonse, noge olê ka byala wagisêlwa malyese! 43 Kibalo kyakê nene na nkampikibwa nansino, no nyage wa Kolo wane haike kwandê? 44 Na nkulombola kyonka kilya kyaba kya ntegelele djûwê lya lwimu lobe alitwelile mu matwê gane, mwana witinginie kwa mulogo munda gya lusho lwane. 45 Kya lyese kolê gwe wa gitabêsha kwana; gwa kaikêla kolê gûlya Kolo gwa kûlombwele."

46 ✝ Noge Malia,

"Wêsambile; mutêma gwane gwa mu tûmbêka Kolo

47 No mutêma gwane gwa lo gelelwa biiko kibalo kya Kabesha Mpûngû muandia wane,

48 ✝Kwa kûba wamulola kwa lûsa mwingili wage mwitûkêshe.

Nansho kûbambêla ano bantû bonse be kangita wa malyese,

49 Mone Kabesha Mpûngû wêno bûkome wanongela bintû bikata.

No sina lyage lilûmbûlûke;

50 No lûsa lwege kû bantû bakumutûdjûka lwa kûgêlêlêla mbialo no mbialo

Kûbalya bakumutûdjûka kabesha Mungû.

51 Walonga bintû bikata kwa kûboko kwage walibasangalêka

Beno munsimbwe mumaninga ga mitêma gyabo.

52 ✝ Walibagwêsha babêkali kuima mu bikanwa byabo bya bûkolo,

mone walibasesha balya betûkêshe.

53 Beno ndjala walibekûtia bisoga,

mone bampeta walibasindûla minie samba.

54 Washa kumukwasha Isilaeli mwingili wage,

kûba edjûkane lûsa lwege.

55 ✝ Nansilya biali balagêlêle ba Tata nkûlû betû, Bûlaimu

no lûbyalo lwege!"

56 Malia wêkene no Elisabeti kilêko kya miesi gisatû, nfulo wêbwêlêle kû nsese gyage.

57 Kyaba kya kûbyala kwa Elisabeti kûgwanine, ûbyalile mwana wa mwana mulûme. 58 Bakuminkani bage no bantû bamusoo gwage lwabategelele musahû kwana Kolo wamumwena lûsa lûkata, balogelelwe amo nage.

59 ✝Mwana aikêshe kilêko kya masigi muganda baikile kumukala mwana balê, bakebile kumwinika sina lya shage Sakalia. 60 Mone nyage wêsamba: "Hanansho! Sina lyage saetwe Yoano."

61 Bamulombwele: "Mwanda gwakê hakûlê gegense mu musoo gwage wêno sina lilyo." 62 Nfulo, bamubulishe shage mubûmeme, bakebe kûmanya mwanage saebwe sina kê.

63 Noge ûlombile kibalê kya kusintêla, usintile nansino: "Yoano ûlyo sina lyage." Begalakenie bonse. 64 Onka hao Sakalia kania kaûtwêlwe no lulimi lûlekelelwe ûbambile kûbanga no kûtûmbêka Kabesha Mpûngû. 65 Kahaga kebatwelile bakuminkani bonse, no musahû gûgo gonse gûgwanine kûntû konse mungûlû gya mu yuda. 66 Bantû bonse bategelele mianda gigyo, bebulishe mumitêma gyabo banine, "Mwana gûdjû saabe wamuswelo kê?" Kibalo, bûkome bwa Kolo bûbele amo nage.

67 Sakalia shage wa Yoano udjulilwe no Mutêma Gûlûmbûlûke, ûsawêle bûmoni bûbo:

68 "Atûmbêkwe Kolo Kabesha Mpûngû wa Isilaeli!

Kwakûba walibashêla no kwêbahandia bantû bage.

69 Walitûêla muikuli ntwasha,

mbyalwa gya Daudi mwingili wage.

70 Monka mwalagêlêle ao akala kûndjêla gya bamoni bage balûmbûlûke,

71 kwana wêketûhandia kuima mumaboko gamangi gyetû,

no kuima mumaboko ga bonse betusikwe.

72 Wêsambile wakebalekelela bakûlû betû,

no kwêdjûkana kilageno kyage kilûmbulûke.

73,74 Kilageno kikyo kadjêgo kemulagêlêle

tata nkûlû wetû Bûlaimu, kwana: waketûa betwe tûandibwe mumaboko ga bamagi gyetû,

Tûmone kumwingêlêla kûbûla kahaga,

75 Tûbe balûmbûlûke no sitê kûgêbwa gwage

Masigi gonse gangikeno gyetû.

76 ✝ "Nogwe, mwanane, wêketwa mumoni wa Kabesha Mpûngû mukûlû wimwigûlû.

Wakamutangêlêla Kolo

no kumubêkêla djambûla madjêla gage,

77 Kwêbasawêla bantû kwana bekandibwa

Kwakwimibwa mubûbê bwabo.

78 Kabesha Mpûngû wetû wêno bûkampwe no lûsa lûngê.

Wêketuiminia mugenge gwa djûba kuima mwigûlû,

79 ✝mwanda wêbamunkêshe bonse bekane mu kidjo kikûlû kya luki abishe tankuko lyetû,

Alongamanie tankuko lyetû mu ndjêla gya angalê."

80 Gûlya mwana ukulile ûmwene bûkome mumutêma gwage. Wêkene mukihanya kuikêla sigi lilya lyalimwenie hûtû kûbantû ba Isilaeli.