1 ✝Sigi limo lya kwêtûsha, Yesû ûbele waêta mu mabala ga ngano, baana bage babûganga babambile kutimuna miewe gya ngano, babambile kutikiminia no maboko gabo no kûlya ndje. 2 Mone bamo Bama falisayo bebabulishe: "Mwanda gwakêê mwalonga mianda gikandwe kûlonga sigi lya kwêtûsha?"

3 ✝wêbaêndwêle: "Hamwalisome mianda gilongile Daudi, amo no benage kyaba kyabele no ndjala? 4 ✝Daudi ûtwelile mu nsese gya Kabesha Mpûngû, ûtwalile gilya mikate gibikilwe kûgêbwa kwa Kabesha Mpûngû, ûlêle no kwêbaa benage. Hakitakisibwe muntû kûlya mikate gigyo nambo balambwili ba Kabesha Mpûngû yaa."

5 Mone Yesû wê balombwele: "Mwana wa Muntû ûge Kolo wa kwêtûsha."*

6 Kûbele sigi linge lya kwêtûsha Yesû ûtwelile mu nsese gya milombelo gya Bayuda no ubambile kûlanga. Mulya munda mubele muntû kûboko kwage kûlûme kûbele kûlebele. 7 No balangi babisila no bafalisayo babele bakeba akumusongelela Yesû. No nansho, babele bamulwegelela ntê swa ahandie sigi lya kwêtûsha. 8 Mone Yesû umanyine maninga gabo umwanine gûlya wa kûboko kwabûlebe: "Tûlûka no wêmane kûgêbwa." Gûlya muntû ûgêle kwêmana kûgêbwa. 9 Hûao Yesû wêbalombwele balangi babisila no bafalisayo, nanimibûsha benywe, kikê kiyenene sigi lya kwêtûsha: "Kûlonga kilongwa kisoga ao kûlonga kilongwa kibê? Kûhandia ngikeno ao kwigitobesha?" 10 Yesû wêbalwele bantû bonse mugela gonse; umulombwele gûlya muntû golola kûboko; kobe, "Olwele. Kûboko kwage." No ûhandibwe.

11 Mone balangi babisila no bafalisayo basumininwe biiko, no babambile kwêbûsenia kintû kêê kyatûlê bumulongela Yesû.

12 Sigi limo Yesû ûgêle kûlûgûlû kûlomba ûkelishe kûko busigi bugima mukûlomba Kabesha Mpûngû. 13 Akûkendûlûka kwa bûsigi, Yesû wêbetile baana babûganga bage, noge wêbasolwele bantû kumi no babêlê, mubûbakata bwabo, kwana wêbetile babikûla: 14 Simo (kwana Yesû umuele sina lya Petelo) no Andele mwanabo, Yakobo no Yoano, no Filipo, Batolomayo, 15 Matayo, Toma, Yakobo wa Alufayo, Simo (witilwe selote muntû ûbele wakeba angalê gya nsê gyabo), 16 Yuda mwana wa Yakobo no Yuda Eskaliota, gûlya ûbele kasongakania kalwêsha.

17 Nghimba gya ao, Yesû utukile kûlûgûlû amo no baana ba bûganga bage, wêmene akibandabanda, hao abele no kibûngo kikata kya baana babûganga bage no bûngê bwa bantû baimine mpenga gyonse gya Bayuda, Yelusalema no kûnkondo gya Tilo no Sidona bonse baikile kumutegelela Yesû no kûhandibwa mitongo gyabo, 18 bantû bonse babele no bûbê basile kumutegelela no kûhandibwa mitongo gyabo. 19 Bantû bonse babele bakeba kumukuma, kibalo bûkome bwakûhandia bûbele bwaima munda gyage no wêbahandishe bonse.

20 Yesû wêbalwele baana babûganga bage, wêsambile:

"Mwisêlwe malyese benywe bananda,

Kibalo Bûkolo bwa Kabesha Mpûngû bwenyu!

21 Lyese benywe beno ndjala ano,

Kibalo samwikutisibwe!

Lyese benywe bakûlêla ano,

Kibalo samuseke kwamulogo!

22 ✝"Lyese lyenyu benywe basikibwe no bantû, bekemibeka kûkondo no kwi mitûka, no kwilibenga sina lyenyu kwana libê, kibalo kya Mwana wa Muntû! 23 ✝Mulogelelwe sigi lilyo no kûtûmbûka kwa nsankê, kibalo kya bûntû kyenyu kikata mwigûlû. Mwanda ba tata nkûlû benyu bebalongele bamoni byonka nansho.

24 "Mone musibo gwenyu benywe bampenta,

Kibalo muêle kûempûlwa!

25 Musibo gwenyu benywe bagikûta ano,

Nghimba gya ao samutegelele ndjala!

Musibo gwenyu benywe bakûseka kwa mulogo ano,

Nghimba gya ao mwa kûlêla no kûempûla!

26 "Musibo gwenyu benywe bantû bonse bakwimitûmbêka; kibalo ba tata nkûlû babo bebalongele bamoni ba bumpi byonka nansho.

27 "Mone nanimilombola benywe bakûtegelela, mwibakampwe bamangi benyu, mwibalongele bûntû balya bemisikwe, 28 mwibesele malyese balya ba kwêmita mulago, mwibalombelele balya bakwimilongela bibê. 29 Ntê Muntû ge kûkûûla kwêtama limo, mwalabwêle no lya bûbêlê; muntû ge kûkûswinia koti lyobe, musigêle no simisi. 30 Gegense wakûlomba mwabêle, no gûlya wakuswinia bintû byobe no kakampwa akwêbwêlêlêshe. 31 ✝Monka mwamutokele bantû bemilongele benywe mwibalongele byonka nansho.

32 "No ntê mwalibakampwa yaa balya bemikampwe benywe, mwakamona kyabûntû kê? No beno bûbê bebakampwe balya bebakampwe boo! 33 Byonka ntê mwalibalongela bisoga balya bakwimilongela bisoga, mwakamona kya bûntû kê? No bangêlabibê bakûlonga byonka nansho! 34 No ntê mwalibasendeka balya yaa bamulê bakûdjagêle kwimibwêlêlêsha, mwakamona kyabûntû kê? No beno bûbê bakwêbasendeka beno bûbê benabo, mukûkûdjagêla kwêbwêlisibwa lûheto lwabo lonse! 35 Mone mwibakampwe bamangi benyu no kwêbalongela bisoga, mwibasendeke no namukakûdjagili kwêbwilisibwa kyokyonse. Mone kyabûntû kyenyu kikaba kikata, no benywe mwikaba baana ba Kabesha Mpûngû wamwigûlû biiko, kibalo gee wa bûntû kûbalya ba kufwisha no balya babûbê. 36 Mube no lûsa, nagwe ni Shenyu byalê no lûsa

37 "Namukebai bûkalabale bange, no benywe namukasi kûebwa bûkalabale, namukasadji bange, no benywe hamukasandjwa; mulekelele bange, no benywe mwikalekelelwa. 38 Mwibae bange no benywe mwikaebwa, mwikatambûla mumaboko genyu kilêko kidjûle, kyakûkonkomekwa no kûotaota no kwêsêka, kibalo kilêko kyonka kilya kyamwakwêla kûbange, ûkyonka kyene kemilêla Kabesha Mpûngû kwamulê."

39 ✝Yesû wêbalombwele lûkêndê lûlû wêsambile: Mpoki wê bûnyonghona kûkûnkûsha mpoki nage? Ubisibyo, bonse babêlê nantê shabagwêlêle mukyêna. 40 ✝Mulangwa anyonghoni kûêta mulangi wage, mone mulangwa gense wakûkwatêsha milango gyage, wêkaba nagwe mulangi wage.

41 "Mwanda gwakê wamona komba muliso lya mulûnda obe, no ono kwêmona kiûta kimuliso lyobe? 42 Hao wê bûnyonghona ntê kûmulombola mbyalwa nobe: ‘Mbyalwa nane, mpempe nkuimie kibalê muliso lyobe,’ no kûno onokwêmona komba limuliso lyobe gwe mwine? Watûmbêkêlêsha gwee! Imia bêlê kibalê ki muliso lyobe, no hao saûmone binebishe kwisibêla kûnyonghona kuimia kibalê ki muliso lya mbyalwa nobe.

43 "Hakûlê mutê gûsoga gwêkûbyala bihelo bibê, no mutê gûbê gwêkûbyala bihelo bisoga. 44 ✝Mutê gogonse gwakûmanyikana kwa bihelo byage, kibalo bantû abasoboli bihelo bya kikûdjû ku mutê gwa miba no amunyonghoni kûsobola bihelo bya misabibu kû mitê gya migûnga. 45 ✝Byonka nasho muntû musoga wakuimia bilongwa bisoga, kuima mubûkûsa bûsoga bwê mumutêma gwage, no muntû mubê wakuimia bilongwa bibê kuima mumutêma gwage. Kibalo muntû wakwêsamba kûkania kage bilya ku mutêma gwage.

46 "Kibalo kyakê mwakungita: ‘Kolo, Kolo,’ no kûno hamwakûgwania gilya gyana nkwêsamba? 47 Shanimie lûkêndê lûyenene kûlangêsha byalê gegense gûlya wakûsha kwandê ûtegelele mianda gyane no kwigigwania: 48 gûdjû mwigûlane no muntû muimpe nsese, kwana ûdjabile ansê biiko, no kûbêka nsûlo gyage kûtandalwala. Kyaba mabêmbê agaimine, madjê gaûmpile nsese gilya, mone hagitingine kibalo gibele giimpwe bisoga. 49 Mone gegense wategelela mianda gyane no akwigilonga, mwigûlane no muntû uimpile nsese kwêgûlû lya musenga akûdjaba nsûlo. Mabêmbêmbê agaûmpile nsese gilya, lwendo lûmo nsese gilya gigwilile no koneka mbeela.