1 Sigi limo Yesû ûbele walibalanga bantû mukitotelo no kûsaûla mwanda gûsoga, Balambwili bakûlû, no Balangi babisila amo no bemeni babantû, baikile 2 bamubulishe: "Wêtûlombole, walonga mianda gino kwa kitenta kêê? Byonka nani ûkûele kitenta kino?"

3 Yesû wêbaêndwêle: "No nene shanimibûshe bûsho. Munombole, 4 kitenta kya Yoana kya kûbatisha kiimine kwê Kabesha Mpûngû ao kûbantû?"

5 Mone boo bebûsenie bobene kwa bobene, "Besambile ntê betwe kwêsamba, ‘Luimine kwê Kabesha Mpûngû,’ Gee shaetûbûshe: ‘Mwanda gwakêê hamwibamwitabêshe?’ 6 Mone betwe kwêsamba, ‘Luimine kwê muntû,’ bantû bonse shabetwase mabwe, kibalo bonse betabêshe kwana Yoano ûbele mumoni." 7 Kwanansio bamuêndwêle, "Hatwêdjê kitenta kikyo ntê kiimine kwêê."

8 Yesû wêbalombwele, "No mwine nene nsimilomboli, nanonga mwianda gino, kwa kitenta kêê."

9 ✝Yesû ûgêlêlêle kwêbalombola bantû lûkêndê lûlû: "Muntû gûmo ulimine bala lya misabibu, lwabawêle kûwana kûsigêlana no balimi bamo bekasigala munkûempa bala lyage, ûgêle kûnse giinge no kwêkana kûko kyaba kila. 10 Kyaba kya kwêmbûla akiikile, muntû gûdjo umutumine mwingili wage kûbalya balimi atwale kiba kya bimbûlwa bya bala lya misabibû. Mone balya balimi bamuhulile mwingili gûdjo bamukumbile wimine minie samba. 11 Gûlya mwine bala umutumine byonka mwingili gûnge; mone babo bamuhulile gûdjo byonka nansilya, bamulongele bintû bya nsoni, no kumwibwêlêsha minie samba. 12 Umutumine byonka wabûsatû; gûdjo noge, bamukomine, no kumukûmba minie samba. 13 Kûwa mwine bala lya misabibu wêsambile, ‘Sanonge ntêê? Samutume mwanane wamwana mulûme, ange sabamukokele gee!’ 14 Mone balimi lwabamumwene, besongenie, ‘Gûdjû umuyanii, nfulo. Tumwiyage kûba bûyana bwage bûbe bwetû!’ 15 Kwanansho bamutele andje gya lilya bala lya misabibu bamwiyagile.

"Yesû wêbabulishe, gûlya mwine bala, lya misabibu wêkebalonga ntê?" Balya balimi. 16 "Wakasha kwêbatobesha balimi babo, no kwêbaa balimi bange lilya bala lya misabibu."

Bantû lwabategelele mianda gigyo, besambile, "Nagikaimini no eneasho!"

17 ✝Mone Yesû wêbakwenenie meso no kwêbabûsha, "Lusinto, lûlû lûlûmbûlûke, lwêno nsintûlwe kê?

‘Bwe libengilwe no baimpi,

Alibwe liyenene lya mubambo.’

18 Muntû gegense kûgwêla egûlû lya bwee lilyo wakatimuka bihêndê bihêndê; nolyo kumugwêlêla muntû gegense, likamuhele."

19 Balangi babisila no Balambwili bakûlû bakebile kumukwata, onkao kibalo basingûlwêle kwana lûkêndê lûlo wêsambêle kibalo kyabo, mone batudjukile bantû.

20 Kwanasho babele bamukedja Yesû no kutuma bakedji. Belonge kûba basitê, kibalo bamutêgêle ku mianda gyalê mukwêsamba, kûba bamubêke ansê gya bûkome no kitenta kya babêkali. 21 Nansho babo bakedji bamubulishe, "Mulangi, twêdjê kwana wakwêsamba no kûlanga bya sitê. Twêdjê kwana gwee wênghe ndekeni, gwee walanga sitê kibalo kya ndjêla gya Kabesha Mpûngû. 22 Wêtûlombole, ntê bisoga no habisoga kuimia mulambû, kwê Kaisali?"

23 Mone Yesû ûsingûlwêle bulimuke bwabo wêbalombwele, 24 "Munangêshe lûmea lûmo. Kûwa wêbabulishe lûkebo no sina lili byani?"

"Nobo bamuêndwêle," lwa Kaisali.

25 Hûao Yesû wêbaendwêle, "Bya Kaisali, mumue Kaisali, no bya Kabesha Mpûngû, mumue Kabesha Mpûngû."

26 Habanyonghwene kumusongela kwa mwanda gogonse alya kûgêbwa kwa bantû, no nansho begalagenie no bekene talala, kibalo kya mpêndwe gyage.

27 ✝Bamo ba basandukayo, ûbantû balya bakwêsamba kwana baki habakashuki, bamuikêle Yesû no kumubûsha, 28 ✝"Mulangi, Musa wêtusintêle kwana: ‘Ntê mwanabo wakya no kumusiga mukasi alê mwana, nfulo, gûlya mwinage wasigala muyenene amuyane gudjo mukyêlwe, kûba amubyalêle mwanabo wage baana.’ 29 Nfulo kûbele no balûnda kiloba. Gûlya mutangi ûkwelile mukasi; mone muntû gûdjo ukile akusiga mwaana. 30 Gûlya mulûnda wabûbêlê umuyanine gûlya mukyêlwe, 31 no mulûnda wa bûsatû byonka nansilya. Mianda gibele byonka nansho kûbonse kiloba bonse bakile kûbûla kusiga baana. 32 Nfulo, gûlya mwana mukasi ukile byonka nansho. 33 Onka, sigi baki abalê kashûlwa, mwana mukasi gûlya wêkaba mukasi wa nii? Kibalo bonse kiloba babele bamukwele."

34 Yesû wêbaêndwêle: "Mungikeno gya kyaba kino, bantû bakûkwela no kûkwelana, 35 mone balya babalwe kûba no ngikeno mukyaba kyakasha no mukûshûka kwa baki habakakweli no kûkwelwa. 36 Bekaba nagwe masalagûlû. Habakaki byonka no banaa ba Kabesha Mpûngû, kibalo bashukile kuima kûbaki. 37 ✝Mone ku musahû gwa kihûdja kya kûnka kaya. No Musa ûlangêshe kwana bantû bakûshûka kibalo umuitile Kolo ‘Kabesha Mpûngû wa Bûlaimu, Kabesha Mpûngû wa Isaka, no Kabesha Mpûngû wa Yakobo.’ 38 Nfulo gee ha Kabesha Mpûngû wabaki, nambo Kabesha Mpûngû kabalya bepoo, kibalo kwage bonse bepoo."

39 Bamo mubalya Balangi babisila: besambile, "Mulangi, waêndûla bisoga mbeela!" 40 Nghimba gya hao hakûbele muntû wakumubûsha byonka mianda giinge.

41 Kûwa Yesû wêbabulishe, "Kibalo kyakê gwa kwêsambwa kwana Kilisitu mwana wa Daudi? 42 ✝Daudi mwine wêsambile mubûkû lya lwêmbo:

‘Kolo umulombwele Kolo wane:

Gikana kûboko kwane kwa kûlûme

43 kwikêla andêkegibêka mangi gyobe kûba kikanwa kya kûbêkêla magûlû gobe.’

44 Kyokûba Daudi wamwita: ‘Kolo,’ bibûba ntê, byonka Kilisitu, abe mwana wa Daudi?"

45 Kyaba bantû bonse lwababele bamutegelela Yesû, wêbalombwele baana babûganga bage, 46 "Mwiempe no Balangi babisila kwana bakûkampwa kûêta hêta bashale mankanso gala, no kûkampwa kwimunwa kwa bûnyeme ebûlû ebantu bengê; bakûkampwa kwêkana kubikanwa bya kûgêbwa mu masese ga milombelo gya Bayuda no kwêkana hantû anyeme kukikwe; 47 boo bakwêbaswinia bintû mu nsese ga bakyêlwe, mwanda bakwêmonia kwakûlonga milombelo gila! Bantû nagwe baba bekamona bûkalabale bûkata mbeela!"