1 ✝Sigi likata lya mikate gisigibêkwe kidjûsho lihitilwe sigi lya Pasaka, libele lishene. 2 Bakûlû ba balambwili no balangi Babisila babele bakeba ndjêla gya kumwiyaga Yesû mone bebatudjukile bantû.

3 Nfulo lyabola umutwelile Yuda, wakwêtwa Isikaliota, gûmo wa balya babikûla kumi no babêlê. 4 No Yuda ûgêle kûbakûlû ba Balambwili no kwê baempi ba kitotêlo, ubangile nabo byalê bûnyonghona kûlonga kibalo kya kumuana Yesû. 5 Nobo balogelelwe nage kwêtabêsania kumua lûheto. 6 Yuda wêtabêshe no ûbambile kûkeba kyaba kiyenene kya kwana Yesû kwabalê, kwana hantû asibantû.

7 Nfulo, sigi lya mikate gisigibêkwe kidjûsho lihikile lilyo ûlyo sigi kwana mwana mukokoo gwa Pasaka kûsêndjwa. 8 Nansho, Yesû wêbatumine ba Petelo no Yoano, wêsambile: "Mugyate mwitûbêkêle djambûla Pasaka lya shatûlye."

9 "Bamubulishe wakampwa tûkûbekêle djambûla kwêê?"

10 Wêbaendwele, "Mutegelele, amulê mukûgya mukibûndê. Mwikasanganwa no mwana mulûme gûmo ûtwête mulondo gwa madjê mumulonde kuikêla munda gya nsese gyene katwela, mumulombole mwine nsese, 11 ‘Mulangi wakûbûsha, kikwêê kyûmba kya bamwika kyashandêle Pasaka amo no baana babûganga bane?’ 12 Noge shaemilangêshe kyûmba kikata kya egûlû, kyalê kilengûlwe bisoga. Mulongolole mumo."

13 Nfulo bagêle, nobo basangene bintû byonse monka Yesû mwelibalombwele, babikile djambûla kikwe kya Pasaka*.

14 Kyaba akigwanine, Yesû wêkene kûlya kyakûlya amo no babikûla. 15 Wêbalombwele babikûla, "Nankampwa biiko kûlya Pasaka* lino amo nenyu nghimba gya kûsûsûka kwane! 16 Kibalo nanimilombola nsikali byonka Pasaka, kuikêla abûlê kagwanibwa Bûkolo bwa Kabesha Mpûngû."

17 Kûwa Yesû ûbûgwêle lûhêndê lwa difai, gee kufwisha no kwêkisela malyese, wêsambile, "Mutambûle lûhêndê mwitangene mubûkata bwenyu. 18 Kibalo nanimilombola nsikekûbili byonka difai lya misabibu, kuikêla Bûkolo bwa Kabesha Mpûngû abûlêkasha."

19 Kûwa ûtwalile mukate gee kufwisha no kwêgwesela malyese, wigutimwine, no kwêbaa baana ba bûganga bage, wêsambile: "Gûgû ûmubêlê gwane, gwaimibwa kibalo kyenyu. Mulonge nansho kwakungidjûkana nene." 20 ✝Byonka nansho nghimba gya kyakûlya kya lêngolo, ûtwalile lûhêndê lwa difai, wêsambile: "Lûhêndê lûno kilageno kiya mumasi gane, gakwêsêka kibalo kyenyu.

21 ✝"Mone, kûboko! Kwagûlya wêkampana kwêano amo nane amutalako! 22 Kibalo Mwana wa muntû wakeyagwa monka mwelagêlêlwe no Kabesha Mpûngû. Mone musibo gwage muntû gûdjo wakamuana!"

23 Baana ba bûganga bage babambile kwêbûsenia bobene kwa bobene, nani mubûkata bwêtû wêbunyonghona kûlonga mwanda bigûgo.

24 ✝Kuimine mpaka abûkata bwa baana ba bûbanga, kwana nani ûmonekile kûba mukûlû kûlêmbêla baange. 25 ✝Yesû wêbalombwele, "Makolo ga bashantaila gakûbêkala bantû babo kwabumu; no balya beno kitenta ‘Ba kwigita balûmbûlûke.’ 26 ✝Mone benywe namukegûlani nabo; nambo, gûlya wêko mukûlû abûkata bwenyu, muyenene abe mwanike kûbonse, no wêko mwimeni muyenene abe nagwe mwingili. 27 ✝Kibalo nani wêko mukûlû, gûlya mwikane kumutalako ao gûlya wakwêbakwasha? Hagûlya mwikane kumutalako, mone nene niabûkata bwenyu nagwe mwingili.

28 "Benywe ûbo balya babele amo nonene mubitompibwa byane; 29 byonka nansilya Tata wane byempele bûkome bwa Bûkolo, byonka nansho nonene nankemiabêla bûkome bwa Bûkolo. 30 ✝Kibalo mumone kûlya no kwêkûbêla kumutalako gwane mu kikwe kya bûkolo bwane, no mwikekana kubikanwa bya bûkolo, mukûtanga bûkalabale makabêla kumi no gabêlê ga Isilaeli.

31 "Simo, Simo! Tegelela! Liabola walomba kwêmieya benywe bonse nagwe ni ngano. 32 Mone nene nankûlombelela gwe Simo, kibalo lwêtabêsho lobe nalûkandwa. Nogwe kûwa kungibwêlêlêla wêbahe mutêma ba mbyalwa nobe."

33 Noge Petelo umuêndwêle Yesû: "Kolo, ni djambûla kûgya amo nogwe mukikûtû no kûkya amo nobe!"

34 "Yesû umwindwêle nankûlombola gwe Petelo," Nghimba gya kadjongwe henelibêlêkêle "busigi bwa lêno saunitune nghendo gisatû kwana aûngindjê nene."

35 ✝Kûwa Yesû wêbabulishe baana babûganga bage, "Kyaba kyanimitumine kûbûla kasiba, mutûngû, no bikwabêlo, mutaûkêlwe no kintû kyokyonse?"

"Bamuêndwêle ûwe," hatûtaûkêlwe no kintû.

36 "Wêbalombwele," Mone onka wêno kasiba ekatwale, no "wêno mutûngû byonka nansho; no gegense usino lûpanga, hoshe kishandê kyage hole kimo. 37 ✝Kwanansio nanimilombola kiyenene gigwanine kwandê mianda gilya gisintilwe mulusinto lûlûmbûlûke, ‘Ubalilwe amo no beno bûbê,’ Kwa sitê gilya gisintilwe kibalo kyane, gyaikêla kûgwanina."

38 Baana ba bûganga bage bamulombwele, "Kolo! Lola ano eno tûbembe tûbêlê,"

"Noge!" Wêbaêndwele nfulo kyagwanina.

39 Yesû uimine nagwe monka mubelele kisela kyage, ûgêle kûlûgûlû lwa Mpasi, baana ba bûganga bage; bamulondile. 40 Lwabaikile kûko wêbalombwele baana ba bûganga bage, "Mulombe namukasi mukatwele mubitompanwa."

41 Kûwa Yesû wêtolile kûla naabo nokûgyata hantû ekûla kwamuntû kûta bwee ukutamine ulombile. 42 "Wêsambile Tata," ntê gwekûkampwa, "nsindwêle lûhêndê lûlû. Mone nakikabi kiswa mutêma kyane, naambo kiswa mutêma kyobe, kilongeke." 43 Hûao Masalagûlû kuima mwigûlû gamuimine no kumubêka buumu. 44 Noge lwabele mumisa gikole ûlombile kwa mukanka mbeela; no mataka gamwimine nagwe manoko ga masi gasululukile kuika ansêê.

45 Lwawêle kûlomba wêbwêlêle kwê baana babûganga bage, wêbasangene babêdjê, kwana bakimine kûlondana no maninga. 46 Wêbalombwêle: "Kibalo kyakê mubêdjê? Mubyûke mulombe na mukasi mukatwele mubitompanwa."

47 Yesû lwabele ûkya kûbanga, kibûngo kikata kya bantû kisile, kibele kya lûbûlûlwa no Yuda, kwana ubele gûmo wabalya baana ba bûganga kumi no babêlê. Umushenine Yesû kibalo amutomone. 48 Mone Yesû umulombwele, "Yuda, wamuana Mwana wa muntû kwa kumutomona?"

49 Kyaba baana babûganga bage, lwabamwene bilya byakeba kuimina, besambile, "Kolo, twêbasonye sonye bipanga byetû?" 50 Gûmo wabo umukalile lûpanga mwingili wa mulambwili mukûlû umukalile kûtwê kwage kûlûme.

51 Mone Yesû wêsambile, "Mulekele kyagwana!" Ukumine kûtwê kwa gûdjo muntû umwandishe.

52 Kûwa Yesû wêbalombwele balambwili bakûlû no balwegeleli ba Kitotelo no baleli basile kumukwata: "Mwasha no bipanga no nkonko nagwe nansilya mwakûgya kûkwata mukûlû wa baswinania? 53 ✝Lwambele amo nenyu masigi gonse mukitotelo, mwanda gwakê hamunkwatile. Mone kino ûkyaba kyenyu, kya bûbêkali bwa kolo wakidjo."

54 Nfulo, bamukwatile Yesû bamutwalile no kûgya nage kû nsese gya mulambwili mukûlû; mone Petelo ûbele wamulonda nghimba kwa kûla. 55 Lwabawêle kûkûnkya kaya mwibûlû, Petelo usile nkonta kaya amo nabo. 56 Mwingili gûmo wa mwana mukasi lwamumwene Petelo mwikane kûbwêhê no kaya, umulwele soo, wêsambile: "Muntû gûdjû noge ûbele amo no Yesû!"

57 Mone Petelo witunine, wêsambile, "Hola gwe mwana mukasi, nene nsimwidje!"

58 Nghimba gya kyaba kisho muntû gûnge umumwene Petelo, wêsambile, "Gwee noge wêgûmo wabo!"

Mone Petelo wêndwêle, "Hemulû, nene nsi gûmo wabo!"

59 Ngimba gya kyaba kimo kûhêta, muntû gûnge usitêkêkye, "Sitê gûdjû muntû noge ûbele no Yesû, kibalo Mugalilaya!"

60 Mone Petelo wêsambile, "Hemulû, nsidjê byono kwêsamba!"

No onkao, ûkyakûbanga, kadjongwe ûbêlêkêle. 61 Kolo Yesû wiugulukile, umulwele Petelo, soo no Petelo wêdjûkene gilya gyalombwelwe no Kolo: "Lêno kûgêbwa kwa kadjongwe henelibêlêkêle, wakanituna nghendo gisatû." 62 Hûao Petelo wimine andje no ulilile kwa lûsa biiko.

63 Balya bantû babele bamuempa Yesû bamulile no kumusompwela. 64 Bamukwikile kaûba kûmeso no kumubûsha: "Lagûla tûmone, nani? Wakûûla!" 65 Bamulombwele mianda gingê gya malûmbû.

66 Lwabûkendulukile kilye kya bemeni ba bantû, kwana bakûlû ba balambwili no Balangi babisila, bakuminkene amo, noge Yesû uililwe kûgêbwa kwabalê. 67 "Nobo bamubulishe," Ntêê gwee, "û Kilisitu?" Wêtûlombole

Mone Yesû wêbaêndwêle, "No ntêê nene kwimilombola, hamuso kungitabêsha; 68 no nene kwimibûsha bûsho, hamuso kûmpêndûla. 69 Mone kûbambêla ano Mwana wa Muntû, wêkaba mwikane koboko kûlûme kwa Kabesha Mpûngû wêno bûkome."

70 Hûao bonse bamubulishe, "Gwee ûge Mwana wa Kabesha Mpûngû?"

Yesû wêbaêndwêle, "Benywe bene ûbalisamba, nene ûge."

71 Kûwa besambile: "Kibalo kyakê twakûkeba kusitêkêkya kûnge! Twategelela betwe bene byaima mukanya kage!"