1 Nghimba gya ao, Yesû ûbele waêta mu bibûndê no tûbibêndê, mu kûsahûla musahû gûsoga gwa Bûkolo bwa Kabesha Mpûngû. No balya baana ba bûgnaga kumi no babêlê babele amo nage,

2 ✝no baana bakasi bamo, kwana ûbele wabaimia minyaga gibe no mitongo gingê abûkata bwa balya baana bakasi kûbele Malia (ûbele wakû Mandelena) ûbele mwimibwe minyaga kiloba; 3 Yaono mukasha Kusa, kwana umwimeni wa bantû bamunsese gya Helode; Susana, no bange bangê babele bamwingêlêla Yesû no baana ba bûganga bage, kwa lûeto lwabo.

4 Kibûngo kikata kyabantû akibûngakane kwê Yesû no balya baimine bibûndê hala hala bamushêlêle; noge wêbalombwele lûkêndê lûno:

5 "Mukusi ûgêle kukusa nkunwa gyage. Noge abele wakusa nkunwa, ginge gigwêlêle mundjêla, ginyantilwe no baêtandjêla, no toni twêgilêle. 6 No ginge gigwêlêle alwala, agibambile kûmena giumine kibalo kya kûbûla kieo. 7 No ginge gigwilile mubukata bwa mitê gya miiba, gilya mitê gya miiba agimenine gihininikile. 8 Ginge gigwilile mu musenga gusoga; gimenine, lûdje lûmo lûbyalile nghendo mia."

No awêle kwesamba nansho, Yesû ûtûlwêle djûwê no kwêsamba: "Wêno matwê gakûtegelela no ategelele!"

9 Baana babuganga bage bamubulishe nsitwe gya lûkêndê lûlo, 10 ✝ noge wêndwêle: "Benywe mwaebwa kûmanya kibiso kya Bûkolo bwa Kabesha Mpûngû, mone kûbange nakûlanga kûnkêndê, kibalo; kyokûba bekamona biiko, habakamoni kyokûba bakûtegelela mone habakasingululi.

11 "Nfulo, gino ûnsitwe gya lûkêndê lûno: ndjee mwanda gwa Kabesha Mpûngû. 12 Gilya gigwêlêle mu ndjêla gyamonia bantû bakûtegelela gûlya mwanda, nfulo, mubembani washa kwigusindûla mumitêma gyabo, kûba nabakasi kwêtabêsha no kûhanda. 13 Nogilya ndje gigwêlêle kûlwala balya bakûtambûla mwanda kwa mulogo abalê mukwêgûtegelela, mone habalê misi, kibalo bakwêtabêsha kwakyaba kisho yaa, mone bitompanwa abilê mukwêbaikêla balekela lwêtabêsho. 14 Gilya gigwêlêle kumitê gya miba lûkênde lwa balya bakûtegelela mwanda, mone lwabalê mukûgêlêlêla bakwininikwa no mudjembo gwa ngikeno gino gya tûlê nagyo, bûeta no mulogo gwa kandje, nobo bagandwa kuimia ndje gikome. 15 No gilya ndje gigwêlêle mumusenga gûsonga, lûkêndê lwa bantû balya bakwêgûtegelela gûlya mwanda no kwêgûkwatêsha kwa mutêma gûsoga no gwa bûkokesi babo ûbakûbyala ndje gikome.

16 ✝ "Hakûle muntû wakûkwamia kimuni kyage kwikihuta no kwikibêka munda gya kibêndê. Mone wêkekibêka egûlû lya lwagê, kûba balya bakûtwela mu nsese bamone mugenge.

17 ✝ "Mone hakûle kintû kibisêkwe kisikabisikûlûlwa, no kwênghe kibiso kyokyonse kisikamanyinkani kikabêkwa hepe.

18 ✝"Kwanansho, mulimuke bya mulê mukûtegelela. Kibalo gûlya wêno kintû shabamubilêshe, mone gûlya usi nokintû swaswinibwe nokine kyalê mukuningêla kûba nakyo."

19 Kyaba kimo nyage no Yesû no bambyalwa nage basile kumumona, mone habanyonghwene kumushena kibalo kya bûngê bwa bantû. 20 Muntû gûmo umulombwele Yesû: "Nyobe no bambyalwa nobe bemane andje bakûkeba kûkûmona."

21 Yesû ûmuêndwêle: "Madjû no bambyalwa nane balya bonse bakûtegelela mwanda gwa Kabesha Mpûngû no kwêgwêngêlêla."

22 Sigi limo Yesû wêbalombwele baana babuganga bage, wêsambile: "Tûdjabûke bwala bwa siba." Nobo babandile mu bwato badjabukile. 23 Nobo lwababele badjabûka siba, Yesû ûlalile tûlo. Lûkwe lûmo munyaga gwa mulûla gwimine mwisiba, bwato bubambile kûdjûla madje, nobo hababele mukinkukumia kya kûshama. 24 Hûao baana babûganga bage bamuikêle no kumubyûla, banine: "Kolo, Kolo twatobela!"

Yesû ubyukile, ûkankêle munyaga no gûlya mulûla; no mabêmbê gatalele kusigele talala. 25 Kûwa Yesû wêbabulishe baana babûganga bage, "Lûkûdjagêlo lwenyu lwêkwê?"

Kwa mwenyo no kwêgalagania bebulishe, "Gûdjû muntû wamuswelo kê? Kuana watakesha munyaga no madje nobyo byamukokela!"

26 Yesû no baana babûganga bage baikile kûmwalo gwa ba Gelasi kwana gwimugela gwa bûbêlê gwa siba lya Galilaya. 27 Yesû lwatukile kuima mubwato, no kûnyanta kûntala ukuminkene no muntû gûmo mwana mulûme wamukibûndê kilya ûbele muhûkêlwe no munyaga gûbê. Noge kwakyaba kila muntû gûdjo habele washitê bishandê, no habele wagikana mu nsese nambo kubilêbû. 28 Kyaba kyamumwene Yesû, ûtele kahûndû, no kwêta ansê kûgêbwa kwage, no wangwêle djûwê likata, "Gwe Yesû, mwana wa Kabesha Mpûngû wêhegûlû biiko, wêno kê no nene? Nankwêsasa no kanyembya!" 29 Kyaba kikyo Yesû ûbele watakêsha munyaga gûgo, gumuime muntû gûdjo. Gûgo munyaga gûbê gûbele gwamuhûkêla muntû gûdjo nghendo gingê, no abele wakwêkwa minyololo kû maboko no kû magûlû, no kûbêkwa mu kikûtû, ûkalile gigyo minyololo no kuilwa no gûgo munyaga gûbe mu kianya.

30 Yesû umubulishe: "Sina lyobe wini?"

Noge wêndwêle: "Sina lyane ni kibûngo kya basilêkale." Kibalo ûbele muhûkêlwe no minyaga gingê. 31 Gilya minyaga gibê gimwisasile biiko Yesû, nekebatakêsha kûgya kûkalûnga nyembo.

32 Hantû ao abele no kibûngo kikata kya ngûlûbe, mukûlisibwa mu matelo ga Lûgûlû, gigyo minyaga gibe gimwisasile Yesû ebatakêshe gibatwele ba ngûlûbe noge wêbatakêshe gibatwele. 33 Kyaba gilya minyaga gibê, lwagimuimine gûdjo muntû gibatwelile balya ba ngûlûbe. No kibûngo kyonse kyangûlûbe kitukile lûbêlo mulûonga, gigwêlêle mumadjê no kûshama mwisiba.

34 Balya bantû babele baempa kilya kibûngo kya ngûlûbe lwabamwene bilya bilongekile, batinine lûbêlo, bagwaninie musahû mukibûndê no kûmakondo. 35 Nobo bantû bagêle kwêmwena bilongekile, kyaba byabaikile abale Kolo Yesû, bamusangene gûlya muntû mwana mulûme uhiminwe no minyaga gibe mwikane kûmagûlû ga Yesû, walê mushale kishandê no wêno ngeni gigwane; nfulo bantû babo batudjukile. 36 Balya bamwene mianda gigyo balombwele bantû bange nansilya gûlya muntû byabele muhûkêlwe no gûlya munyaga gûbe no mweandêle. 37 Hûao bantû ba mu mwalo gwa Bagelasi bakwatilwe no mwenyo gûngê, bamulombwele Yesû asemuke kwabalê abagale lwege. Nfulo Yesû ûbandile mubwato wêbwêlêle lwege. 38 Gûlya muntû uiminwe no minyaga gibe umwisasile amulonde Yesû, "Agye amo nage."

Mone Yesû umulagile, no kumulombola, 39 "Gibwêla kû nsese gyobe wêbalombole bantû byonse Kabesha Mpûngû byenekûlongela."

Nfulo gûlya muntû wêbwêlêle, mukûtûmbia mubibûndê mianda gyonse Yesû gyamulongele.

40 Yesû lwagibwêlêle bwala bwabûbêlê bwasiba, kibûngo kyabantû kimukunkile kwa mulogo, kibalo babele bamuempela. 41 Kûwa muntû gûmo usile sina lyage Yailo; ûbele mwimeni mukûlû wa nsese gya milombelo gya Bayuda. Ûgwêlêle kû magûlû ga Yesû, no kumwisasa agye kû nsese gyage, 42 Kwakûba nsongwa kasi wage wabugima, wakilêko kya miaka kumi no gibêlê, ûbele mukye.

Yesû lwabele mulwendo, kibûngo kya bantû kibele kimuininikile mugela gonse. 43 Nfulo mukibûngo kikyo mubele mwana mukasi gûmo ûbele wasûswa no mudjamba sûsa kilêko kya miaka kumi no gibêlê; no ûbele wawakusiminia lûeto lwege, kûbaûndai hamwene muntû wa kumuandia. 44 Gûdjo mwanamukasi umulondile Yesû nghimba, ukumine hêndo lya kishandê kyage lûkwe lûmo wandile mutongo gwa mudjamba sûsa. 45 Yesû ubulishe, "Nani wankûma?"

Bantû bonse lwababengile, Petelo wêsambile: "Kolo, bûngê bwa bantû bwakukwininika."

46 Mone Yesu wêsambile: "Kwêno muntû wankuma, kibalo na mona kwana bûkome bwampima." 47 Gûlya mwana mukasi lwasingûlwêle kwana anyonghoni kwibisêka, wêsogolwele mukûkwaka kwa kahaga ugwilile kûgêbwa kwê Yesû. Hao wêsambile kûgêbwa kwa bantû bonse kibalo kyakê umukumine, no mwahandêle lwendo lûmo. 48 Nfulo Yesû umulombwele, "Nsongwa kasi lwêtabêsho lobe lwakûhandia. Gyata kwa angalê."

49 Yesû lwabele ûkyakûbanga, kusile mwingili gûmo kuima kû nsese. "Gya mukûlû wa nsese gya milombelo gya Bayuda," kumulombola; "Nsongwa kasi obe wa wakûkya. Noka gililili kumudjembya mulangi."

50 Yesû lwategelele mwanda gûgo, umulombwele Yailo, "No katudjuki; gitabêsha ya, noge musike obe shahande." 51 Kyaba kyaikile mu nsese gya Yailo, hatakêshe muntû kûtwela amo nage nambo Petelo, Yoano, Yakobo, amo no tata no madjû wa gûlya nsongwa kasi. 52 Kyaba kyonka kikyo bantû bonse babele balêla no kûtompola kibalo kya gûdjo nsogwa kasi. Yesû wêbalombwele, "Namukalili kibalo gûdjû nsongwa kasi enelikye; nambo mulale!"

53 Nobo bamusekile kwa kûbedja, bamanyine sitê kwana wa wakûkya. 54 Mone Yesû umukwatile gûlya nsongwa kasi kûkûboko wêsambile, "Nsongwa kasi, byûka!" 55 Muntêma gwage gumwibwêlêle, noge ubyukile lûkwe lûmo, Yesû ûtakêshe haebwe kyakûlya. 56 Babyali bage begalagenie biiko, mone Yesû wêbatakêshe nabakamulomboli muntû gegense bilya bilongekile.