1 ✝Sigi limo, Yesû ûbele mwimane kûnkondo gya siba Genesaleti, no bantû bangê babele bamwalagale bamwininikile mukûtegelela mwanda gwa Kabesha Mpûngû. 2 Yesû ûmwene maato gabêlê kûnkondo gya kisiba; balobi babele baima kû kûlûmbûlûla malabo gabo. 3 Nghimba gya Yesû kûbanda mu bwato bûmo, bûbele bwa Simo, ûkampilwe Simo ebûlûndêle kûmadjê, kûla bisho no kikêngo kya siba. Kûwa wêkene no kûlanga bantû walê mu bwato.

4 Lwabidjile kûlanga, umulombwele Simo: "Gêsha bwato kuikêla kûtokile, mulabe malabo genyu mumone kwela misha."

5 ✝"Simo umwindwêle: Mulangi," Twalikankamika kwela misha busigi bugima, "no atwêbamone nkantû. Mone kwa kûba walisamba, sandabe malabo." 6 ✝Nghimba gya kûlonga nansho, belile misha gingê, no malabo gabo gabele abûsho kwatêka. 7 Banyakwêle balobi benabo babele mu maato gange, bashe bebakwashe, nobo basile, badjulishe maato gonse gabêlê misha, no agabele gakeba kûshama. 8 Kyaba Simo Petelo lwemwene bibyo biimine, ukutamine kûgêbwa kwê Yesû, no kumulombola: "Kolo, Sindûka kûgêbwa kwane, kwakûba nene ni wa bûbê!"

9 Simo amo no balobi nage bonse, begalagenie biiko kwa kûmona misha gingê gya balobile. 10 Byonka nansho benage no Simo, kwana Yakobo no Yoane, baana ba Sebedayo, be galagenie biiko. kûwa Yesû umulombwele Simo: "No katudjuki, kûbambêla onka ano sahûbe mulobi wa bantû."

11 Nfulo, nghimba gya kusisha galya maato ku kikêngo kya siba basigile byonse, no ba mulondile Yesû.

12 Kyaba kimo Yesû lwabele mu kibûndê kimo kya bilya bibûnde. Kuimine muntû gûmo ûbele no bûsûngû mubêlê gugima lwa mumwene Yesû, muntû gûdjo ukutamine kitwe nsimika umwisasile wêsambile, "Kolo, gwe kûkampwa!" Wê bûnyonghona: Kumunkya.

13 Yesû holwele kûboko, umukumine no kwêsamba: "Nankampwa munkibwa!" Lûkwelûmo bûsûngû bumuwêle.

14 ✝Yesû umutakêshe: "Nokalomboli muntû gegense, nambo gyata wêlangêshe kwê Mulambwili; uwimie mulambû kibalo kya kumukibwa kobe, monka mwetakêshe Musa basitêkêkye bantû kûba wahanda."

15 Mone musahû gwa Yesû gûsangalele ko konse. Bantû bibûmgo bingê babûngakene kûba bamutegelele no kûhandibwa mitongo gyabo. 16 Mone gee ûgêle lwege hantû asibele bantû ûbele walomba kûko.

17 Sigi limo, Yesû ûbele walanga bantû bonse, mubûkata bwabo mubele Mafalisayo no Balangi ba bisila kuima mubibûndê byonse bya Galilaya, Yuda no Yelusalema, babele bekane ao. Bûkome bwa Kolo bûbele amo nage, noge wandishe batongi kwa bûkome bwa Kolo. 18 Onkao banabalûme basile, balêbatwale muntû gûmo wabûlebe, ûbêdjê mu kisalo; batompile kumutwesha munda gya nsese, bamubêke kûgêbwa kwê Yesû. 19 Mone kibalo kya bûngê bwa bantû, habanyonghwene kûtwela munda. Nfulo, baselile egûlû lya nsese, basamwine sansagûlû, bamutukishe gûlya ûbele no bûlebe amo no kisalo kyage, bamubikile kûgêbwa kwê Yesû. 20 Kyaba Yesû lwamwene lwêtabêsho lwabo, umulombwele gûlya mutongi: "Mulûnda, bûbê bobe bwalekelelwa."

21 Balangi babisila no Mafalisayo babambile kwêbûsha: "Mwingili kêê gûdjû wakwêsamba mianda gya kûbedja? Nani wêbûnyogona kûlekelela bûbê nambo Kabesha Mpûngû bugima bwage?"

22 Yesû umanyine maninga gabo, wêbabûlishe, kibalo kyakê mwakuninga mianda gigi mu Mitêma gyenyu? 23 Kikêê kilya kiele mbeela kwêsamba, ‘Walekelelwa bûbê bobe,’ ao kwêsamba: ‘Gimana, ûtambe?’ 24 Mone, nankeba mumanye kwana, Mwana wa Muntû wêno bûkome bwa kûlekelela bantû bûbê mukandje. Kwanasho, umulombwele gûlya muntû wa bûlebe nangana: "Gimana, twala kisalo kyobe, wêbwêlêle kû nsese gyobe!"

25 Onkao gûlya mutû wa bûlebe wêmene kûgêbwa kwabo bonse, ûtwalile bûtanda gwage, wêbwêlêle kû nsese gyage, mukumutûmbêsha Kabesha Mpûngû. 26 Bonse begalagenie no kumutûmbêsha Kabesha Mpûngû, badjulilwe no kyobi, banine: "Lêno, twamona biesha!"

27 Nghimba gya mianda gigyo, Yesû wimine andje, umumwene musonkya musonko gûmo witilwe Lefi, mwikane akûsonkesha. Yesû umulombwele: "Nonde." 28 Noge Lefi wêmene, kusiga byonse, umulondile.

29 Kûwa Lefi umulongeshe Yesû kikwe kikata kû nsese gyage. No kibûngo kikata kya basonkya mu sonko no bantû bange babele balya amo nabo. 30 ✝Mone Mafalisayo no balangi babisila, babele ba ntotelo gyabo bebatompwelele baana babûganga ba Yesû, banine: "Kibalo kyakê mwakûlya no kwêkûbêla amo no basonkya musonko no beno bûbê?"

31 Yesû wêbaêndwêle: "Balya bepoo abekûkeba mutembi, nambo batongi. 32 Nsimushe kwêbeta bantû beno sitêê, nambo banonga bibê, bamone kumulêlêla."

33 Bantû bange bamulombwele Yesû: "Bana babûganga ba Yoano mubatisha bakwisilêka no kûlomba nghendo no nghendo; no baana babûganga ba Mafalisayo, bakûlonga byonka nasho. Mone baana babûganga bobe bakûlya no kwikûbêla."

34 Yesû wêbaêndwêle: "Mwaninga kwana mwibûnyonghona kwêbasibêla bemeni bamulûme wa bûlûgo kûlya kyakûlya kya kikwe kyaba mulûme wa bûlûgo uki amo nabo? Ubisibyo! 35 Mone kyaba kikaika kwana mulûme wabûlûgo enekaimibwa abûkata bwabo; kyaba kikyo ûabalê kesilêka."

36 Yesû wêbalombwele lûkêndê lûlû: "Bantu habakali kilêba kya kishandê kiya no kwikibêka ku kishalanwa kikûlûkûlû; ntê bokûlonga nansho, shababe balikikala kikyo kishalanwa kiya, no kikyo kilêba hakigûlani no kikyo kishalanwa kikûlûkûlû. 37 Byonka nansho hakûlê muntû wêbûbêka difai liya mubibêndê bikûlûkûlû. Ntê gee kûlonga nansho, lilyo difai liya likata bilya bibêndê bya kala, difai likesêka, no bibêndê bikoneka. 38 Difai liya lyabêkwa, mubibêndê biya 39 No hakûlê muntû mukampwe difai liya, nghimba gya kwêkûbêla kala, kibalo wakesamba, ‘Lilya lya kala,’ lisoga mbeela."