1 Yesû ûtwelile mu kibûndê kya Yeliko, noge ûbele waêta mubûkata bwa kibûndê kikyo. 2 Mubele muntû gûmo mumo mukibûndê witilwe Sakayo kwana ûbele mukûlû wa Bansonkya misonko, no muntû mpeta swa. 3 Ûkebile kumumona Yesû ntê muntû kê, mone kibalo kya bwêngê bwa bantû noge ûbele mwihê hanyonghwene kumumona. 4 Nansho, ûtangêle lûbelo kûgêbwa gya kibûngo kya bantû no kûbanda kumutê gwa kikûdju kibalo anyonghone kumumona, Yesû kibalo ûbele waêtêla hao. 5 Kyaba Yesu aikile hantû alya, ûlwele kwêgûlû umumwene umulombwele: "Sakayo, tûka bûkêlê. Kibalo lêno shambe mwika kû nsese gyobe." 6 Kwanansho, Sakayo utukile bûkêlê bûkêlê umukunkile Yesû kwa mulogo. 7 Bantû bonse lwabamwene nansho babambile kûtompola banine: "Wagya kûba mwika wa muntû wêno bûbê." 8 Mone Sakayo wêmene, umulombwele Yesû: "Tegelela, Kolo! Onkano namamba kwêbaa balanda kiba kya lûheto lwane, no ntê muswininie muntû gegense kintû, nika mwibwêlêlêsha nghendo gina."

9 Yesû umulombwele: "Lêno lûhandêlo lwaika mu nsese gyobe, kibalo gûdjû noge mwana wa Bûlaimu. 10 ✝ Kibalo Mwana wa Muntû usile kûkeba no kûandia balya basimine."

11 Kyaba bantû lwababele bategelela gigyo, Yesû wêbalombwele lûkêndê, kibalo ûbele kûbwêê kuika Yelusalemu, no bantû baningile kwana, Bûkolo bwa Kabesha Mpûngû bûbele bwaika kyaba kyonka kikyo. 12 Nansho wêbalombwele: "Kûbele muntû gûmo wa musoo gwa kibûkolo ûlongile kûgya kûmwalo gwa kûla kûba atambûle kitenta kya bûkolo, kûwa ebwêlêle. 13 Mbêlê gya kûsemuka, wêbetile bengili kumi mubûkata bwabo, no wêbaele gûmo gense biêndê kumi bya nolo wêbalombwele: ‘Musûlûshe no nolo gino kuikêla anankebwêla.’ 14 Mone bantû bansê gigyo bamusikilwe no kûtuma bikûla kwana mugye mwisambe, ‘Hatumuso muntû gûdjû abe kolo wêtû.’

15 "Nonansho wêbwêlêle wawakûtambûla kitenta kya bûkolo. Wêbetile balya bengili bage, balya besigêle nolo kibalo amanye bûngê bwa bûsangwe kêê gûmo gense bwamwene kûbusûlû bwage. 16 Mwingili mutangi wikile wêsambile, ‘Kolo, mwene bûsangwe nghendo kumi gya nolo gyo mpele.’ 17 Noge umuêndwêle, ‘Walonga kisoga gwee mwingili! Kwakûba ûbele mulûmbûlûke mumwanda gûsho, nankûwa kitenta kya kûbêkala mialo kumi.’ 18 Muntû wa bûbêlê usile, wêsambile, ‘Kolo, nolo gyo mpele nasisha bûsangwe nghendo gitano.’ 19 Kolo wange umuêngdwêle, ‘Nankûwa kitenta kya kûbêkala mialo gitano.’

20 "Mwingili gûnge usile kwêsamba, ‘Kolo, bûgûla nolo gyobe; mbisikile senene mukihûto. 21 Nkutudjukile kibalo gwee wê muntû walûûma, wakûtwala lûheto kûntû kosi mubeke. No wakwêmbûla kûntû kosi mukune.’ 22 Kolo wage umûêndwêle, ‘Nankûwa bûkalabale kûlondana no kisambwa kyobe gwe mwine! Gwee mwingili mubê! Ûmanyine kwana nene ni muntû walûûma, nankûtwala nolo gyansi mubêke no kwagûla byansi mukune. 23 Kibalo kyakêê, aubikile nolo gyane, mubûkûsa? Kibalo andê kebwêlêla nkatwale nolo gyane no bûsangwe bwage.’

24 "Hao wêbalombwele balya babele alya, ‘Mumuswinie gigyo nolo mukamutange gûlya ûmwene bûsangwe nghendo kumi.’ 25 "Mone bamulombwele, ‘Kolo, gûdjo elê no bitêta kumi!’ 26 ✝ ‘Noge wêbaêndwêle,’ gegense wêno kintû wêkahebwa, ‘No kumubilêsha, mone gûlya usi nakyo; no kilya kyalê nakyo, wakabûgûlwa. 27 Mone, balya bamangi basi bakampwe nene mbe mubêkali wabo, mwibasishe ano mwibeyage kûgêbwa kwane!’"

28 Kûwa kwêsamba mianda gigyo, Yesû ûtangêle kûgebwa gya kibûngo kûsela Yelusalema. 29 Lwashenine kuika Betefage no Betania, kibûndê kibele mu Lûgûlû lwa Mpasi, wêbatumine baana ba bûganga bage babêlê 30 wêbalombwele: "Mugyate mukakibêndê kikûlwendo lwenyu; amulêkatwele mukakibûndê shamutane mwana mpûnda mukwêkwe, kwana ûshalibandwe no muntû. mumusokone mukamusishe ano. 31 Ntêê muntû walimibûsha, mwanda gwakêê mwa musokona mumulombole, "Kolo waligikeba."

32 Nfulo balya batuminwe bagêle no kûtana kintû kyonse monka Yesû mwalibalombwelele. 33 Lwababele bamu sokona gûlya mwana mpûnda, bene kibûndê bebabulishe, "Kibalo kyakêê mwamu sokona mwana mpûnda?"

34 "Balya baana babûganga bebaêndwêle," Kolo wamukeba, 35 nfulo bamuêlêle Yesu. Gûlya mwana mpûnda kûwa bandjile bishandê byabo egûlû lyage kûwa bamubandiishe Yesû egûlû lyage. 36 Kyaba Yesû lwegêlêlêle walê mumubande mwana mpûnda, bantû bandjile bishandê byabo mu ndjêla.

37 Kyaba kyashabele kûbwêhê no mutûkyo gwa Lûgûlû lwa Mpasi, kibûngo kyonse kya baana babûganga bage babambile kûsankêlêla no kûmutûmbêka Kabesha Mpûngû kwa djwê likata kibalo kya bilongwa no biesha bingê byabamwene, besambile: 38 ✝ "Eselwe malyese Kolo wakûsha mu sina lya Kabesha Mpûngû!"

Angalê mwigûlû no ntumbo mwigûlû biiko!

39 Hao bange Bamafalisayo babele mukilya kibûngo kya bantû, bamulombwele Yesû. "Mulangi," wêbakande, "baana ba bûganga bobe!"

40 Yesû wêbaêndwêle, "Nanimilombola, ntê baba bokûtalala sitê gago mabwe shagate kahûndû."

41 Yesû lwashenine kûbwêhe no Yelusalema, no lwamwene, ulilile, 42 wêsambile, "Sitê walê mumanye lêno lili mianda gya kusisha angalê! Mone ano kintû kikyo kibisêkwê nogwe haûnyonghoni kwikimona kûmeso gobe! 43 Masigi ge kemiikêla kwana mangi gyobe gikaimpa nsendo, no kwêmyalagala, no kukwininika mugela gonse. 44 Bekakûkenya kenya gwee amo no baana bobe munda gya lûbûgo lobe; bekakweyaga no habakakusigili no line bwe limo kwêgûlû lya bwe linge, kibalo aûkabandilili kyaba Kabesha Mpûngû elêkasha kûkûhandia!"

45 Nfulo Yesû lwegêle mukitotelo ubambile kwêbakûmba balya babele bagûsha bintû mumo, 46 ✝ Noge wêbalombwele, "Kisintwe mulûsinto lûlûmbûlûke, nsese gyane shagibe nsese gya milombelo, ‘Mone benywe mwaligilonga kûba.’Lûsako lwa baswinania!"

47 ✝ Yesû ûbele walanga masigi gonse mukitotelo. Balambwili bakûlû no Basinti ba Bisila, no bakûlû ba bantû, babele bakeba ndjêla gya kumwiyaga, 48 mone habamwene, hantû akumwêyagêla, kibalo bantû bonse babele bamutegelesha bisoga.