1 Kyaba Yesû lwalibetile balya kumi no babêle wêbaele kitenta no bûkome bwa kûkûmba minyaga gibe gyonse no bwa kûandia mitongi gyonse, 2 kûwa wêbatumine bagye basaûle Bûkolo bwa Kabesha Mpûngû, no kûandia batongi, 3 ✝ Webalagile wêsambile: "Namukatwali kyokyonse mulwendo: ha nswii, no mutûngû, no kine kyakûlya, no lûheto, no namukatwali nkaso gya kwalabûla. 4 Nsese gyogyonse gya mulêkatwele no kûkûnkwa, mwikane mumo kuikêla amulê kasindûka mu kibûndê kikyo; 5 ntê bantû bokûbenga kwimikûnka, amulê kaima mukibûndê kikyo, mukekûnkûle lubimbi kû magûlû genyu kibalo kikabe kusitêkêkya kwabalê."

6 Nansho, balya baana ba bûganga babambile lwendo baitile mu bibûndê, mukûsahûla mwanda gûsoga no kûandia batongi kûntû konse.

7 ✝Nfulo mubêkali Helode, ûtegelele musahû gwa mianda gyonse gibele gyalongeka, ûbele mutubiganibwe, kibalo bantû bamo bagana, Yoano washûka kuima kû baki. 8 Bange besambile kwana Elia waimina, no bange besambile kwana gûmo wa bamoni bakala washûka kûima kûbaki. 9 Mone Helode wêsambile: "Gûdjo Yoano mukalile twee; nani byonka gûdjû wanantegelela mianda gyage?" Ûbele no kiwewe kya kumumona.

10 Kyaba balya ba bikûla bage lwabebwêlêle, bamulombwele Yesû byonse bya balongile. Yesû wêbatwalile, bagêle hantû abugima ekûbwêhe no kibûndê kya Betesaida. 11 Mone balya bantû lwabamanyine kwagêle, bamulondile. Yesû wêbakunkile wêbabangêle kibalo kya Bûkolo bwa Kabesha Mpûngû, wêbaandishe bakebile kûandibwa.

12 Djûba alibambile kûtûka balia ba bikûla kumi no babêlê bamuikêle Yesû bamulombwele: "Wêbalage bantû bagyate mubibûndê no kûmabala ge kûbwêhê, bakebe byakûlya no hantû akûlala kibalo ano atûlê akyanya."

13 Mone Yesû wêbaêndwêle: "Mwibae byakûlya."

Nobo baêndwêle: "Hatûle kyokyonse nambo mikate gitano no misha gibêlê. Ao tûgyate twêbolêle byakulya bisabibagwane bantû baba bonse." 14 (Babele alya baana balûme basangenwe 5,000.)

Nfulo Yesû wêbalombwele baana babuganga bage: "Mwibalombole bantû bekane ansê bibûngo bya bantû makuni gatano gatano."

15 Baana babûganga balongile nansho no muntû gense wêkene ansê, 16 Yesû ûtwalile gilya mikate gitano no gilya misha gibêlê, ûlwele mwigûlû, no kufwisha, kûwa wêgyêsele malyese, wigisansûlwêle, wêbaele baana babûganga bage bebatange bantû. 17 Bantû bonse balêle bekutile. No baana ba bûganga bakongile biendê bya mikate bisigele badjulishe bitala kumi no bibêlê.

18 Sigi limo Yesû ûbele walomba bugima bwage, no baana babûganga bage babele amo nage. Nfolo wêbabulishe: "Bantû bakwêsamba nene nini?"

19 ✝"Nobo bamuêndwêle Yesû Bange," besambile gwee wê Yoano. "Mubatisha bange Elia, no bange balisamba kwana wêgûmo wa bamoni wa shûka kuima kûbaki."

20 ✝Kûwa Yesû wêbabulishe: "No benywe mwalisamba, nene nini?"

Petelo ûwêndwêle: "Gwee ûge Kilisitu wa Kabesha Mpûngû."

21 Hûao Yesû wêbatakêshe baana bûganga bage na bakalomboli muntû gegense mwanda gûgo. 22 Yesû ûgêlêlêle kwêsamba kwana, "Kiyenene Mwana wa Muntû wêkamona masûsû gangê, no kûbengwa no baleli, balambwili bakûlû, no balangi babisila no muyenene kwêyagwa. No sigi lya bûsatû, wêkashûlwa."

23 ✝Nfulo Yesû wêbalombwele bantû bonse: "Muntû gense gekûkeba kûba mwaana wabûganga wane, kiyenene ebenge kikûlê kyage, atwale mutê gwa mpênga mpêtya gwage masigi gonse, no anonde. 24 ✝Kibalo muntû wakûkeba kûandia ngikeno gyage mwine, wakegitobesha, mone wêkatobesha ngikeno gyage kibalo kyane wêkegiandia. 25 Katolwa kê muntû gee kûkamona bûeta bonse bwa mukandje, mone asiminie no kûtobesha kikûlê kyage gee mwine? 26 Muntû gegense wêkamwena nsoni nene no mianda gyane, Mwana wa Muntû wa kamumwena nsoni muntû gûdjo, kyaba kyalêkasha mu ntumbo gyage no ntumbo gya Shage no gya masalagûlû galûmbûlûke. 27 Sitê sitê nanimilombola, bamo mubûkata bwa bemane ano abakatompi luki, ntê habalimone Bûkolo bwa Kabesha Mpûngû."

28 ✝Kilêko kya masigi muganda nghimba gya kwêsamba gigyo, Yesû wêbatwalile Petelo, Yoano no Yakobo, ûgêle kûlûgûlû kûlomba. 29 Abele walomba, lûkebo lwege lûmonekile nagwe lwagalabuka, no bishandê byage bikenkile bimugenge gwa nkûba. 30 Onkao bamonekile bantu babêlê Musa no Elia, babele bakûbanga nage. 31 Bamonekile mu ntumbo, babangile no Yesû kibalo kya kûkya kwage kwana kwêkaimina kûko Yelusalema, mwanda agwanininie bisintilwe kibalo kyage. 32 Petelo no benage babele bakomenwe no tûlo tûkole; mone kyaba kya babyukile, bamwene ntumbo gya Yesû, no balya bantû babêlê babele bemane amo nage. 33 Kyaba kikyo balya bantû babêlê lwababele balekenkana no Yesû, Petelo umulombwele Yesu: "Mulangi, bisoga twêkane ano! Nfulo tuimpe bitûla bisatû, kimo kyobe kimo kya Musa no kimo kya Elia." Mone Petelo ûbele edjê byabele walisamba.

34 Petelo lwabele walisamba nasho, lûkwe lûmo kile kibaimine no kwêbaûta, no kile akibaikêle balya baana babûganga batudjukile biiko. 35 Djûwê litegelelwe kuima mukikyo kile: "Gûdjû ûge mwanane wansolwele, mumutegelele gee."

36 Nghimba gya djûwê lya Kabesha Mpûngû kwêsamba, bamutanine Yesû elê bugima bwage. Baana babûganga baempele mianda gigyo kwa kibiso no abalombwele muntû gegense gilya gyonse gya bamwene.

37 Djoo lyage, Yesû no balya baana babûganga basatû, Petelo, Yoano no Yakobo, lwabatûkile kuima kûlûgûlû, kibûngo kikata kyabantû kikuminkene nabo. 38 Muntû gûmo mukilya kibûngo ûwangwêle djûwê, kwêsamba: "Mulangi! Nankwêsasa mukwashe nsongwa lûme wane wabugima! 39 Nghendo kwa nghendo munyaga gûbe gwamuhûkêla, no kumulonga angûle djûwê, kûwa gwakumugwêsha bisila ngoga no kuimwa no nfulu kûkania. Gûgo munyaga gûbe gwa kumudjembia biiko no hagwakumuleka no ene asho! 40 Nibalombile baana babûganga bobe baimie gûgo munyaga gûbe, nobo habanyonghwene."

41 Yesû wêbaêndwêle: "Lwênywe lûbyalo lûbê lusi no lwêtabêsho, ngikane nenyu no kwimilêndêla kwikêla kyaba kê? Musishe nsongwa lûme obe ano."

42 Kyaba mwana gûdjo lwabele washa kwê Yesû, gûlia munyaga gûbe gumugwilishe ansê no kumubêka bisila ngoga. Mone Yesû wêgûkankêle gûlya munyaga gûbê gumuime, ûmwandishe gûlya nsongwa lûme no umwibwêle kwê shage. 43 Bantû bonse begalagenie biiko, kwakûmona bûkome bûkata bwa Kabesha Mpûngû.

Nobo bantû bonse lwababele mukwêgalagania, kibalo kya mianda gyonse Yesû gilongekile, gee wêbalombwele baana babûnganga bage: 44 "Mutegelele bisoga mianda gyandê kemilombola, Mwana wa Muntû wakaimibwa mumaboko ga bantû." 45 Mone boo habasingûlwêle mianda gya lisambile. Kibalo mianda gigyo gibele gibisêkwe kwabalê kûba nabakasingululi; nobo batinine kumubûsha nsintwe gya mianda gigyo.

46 ✝Kuimine mpaka abûkata bwa balya baana babûganga kibalo kya nani wêkaba mukûlû kûbonse. 47 Mone Yesû usingûlwêle maninga gabo, noge umutwalile mwana mushoo umubikile kûgêbwa kwabo,

48 ✝kûwa wêbalombwele: "Muntû gegense wêkamutambûla mwana gûdjo mukemuke ku sina lyane wantambûla nene; no gegense wakûntambûla nene, wamutambûla gûlia untumine. Kibalo gûlia mukemuke kûlêmba bonse abûkata bwenyu ûge wêko mukûlû kûlêmba bonse."

49 Yoano umulombwele: "Mulangi, tûmwene muntû gûmo wakuimia minyaga gibê ku sina lyobe, tûtompile kumukanda kwakûba gee hagûmo wetû."

50 Yesû umulombwele: "Namukamukandi, kibalo gûlya usimangi gyenyu wêmugela gwenyu."

51 Kyaba akigwanine kya Yesû kûtwalwa mwigûlû, gee ûkampilwe kûgya Yelusalema. 52 Utumine bikûla bamutagêlêle, nobo bagêle mukibûndê kimo kiaba Samalia kûba bamubêkêle djambûla kintû kyonse. 53 Mone bantû ba kibûndê kilia habebakunkile kibalo ûbele mwelekele Yelusalema.

54 ✝Kyaba baana babûganga bage, Yakobo no Yoano, lwabamwene nansho, besambile: "Kolo, wakeba tûtakêshe kaya katûke kuima mwigûlû kebatobeshe?"

55 Mone "Yesû wêbalabûkêle kwêbakankêla biiko." 56 Nobo bagêle ku kibûndê kinge.

57 Lwababele bagya mundjêla, muntû gûmo umulombwele Yesû: "Nsankûlonde kokonse konokagya."

58 Yesû umuêndwêle: "Mibwabwa gino mekano mumena, no toni twagûlû twêno binswa, mone Mwana wa Muntû halê hantû akûbêka kwa twe."

59 Yesû umulombwele muntû gûnge: "Nonde."

Mone muntû gûlya umuêndwêle: "Kolo, ntakêshe bêlê ngyate munshêke tata."

60 Yesû wêndwêle, "Wêbaleke baki bashêke baki babo. Mone gwee gyata ûkatûmbye Bûkolo bwa Kabesha Mpûngû."

61 ✝No muntû gûnge umulombwele: "Kolo, nshakûlonde; mone nanomba ngyate ndage belê ba mbyalwa nane."

62 Yesû wêndwêle: "Muntû gense wakwata mwini gwa lûkasû mukûlêma, kûno wakwalabuka nghimba, hamuyenene kwêngêla mu Bûkolo bwa Kabesha Mpûngû."