1 Kûwa Yesû wêbalombwele baana ba bûganga bage lûkêndê, kibalo lûbalangêshe kwana kiyenene kûlomba hakûkema. 2 Wêbalombwele: "Mumwalo gûmo mubele mukali wa nsambû gûmo usibele mutûdjûke Kabesha Mpûngû no kwêne kwagamwa maninga ga bantû. 3 No mumwalo gonka gûgo, mubele madjû gûmo mukyêlwe umwikêle gûdjo mukali wa nsambû nghendo gingê, umulombile amwisambêle: ‘Nankwêsasa tange sitê lyane kuima kwê mangi gyane!’ 4 Kwakyaba kila gûdjo mukali wansambû ûbengile. Mone nfulo wêsambile mumutêma gwage: ‘Nanso ntê nene nsi mumutûdjûke Kabesha Mpûngû no nsimuagamwe muntû, 5 mone, kwakûba gûdjû mukyêlwe wanyembya nyembya, sa nsitêkêkye wamona sitê lyage kibalo nakagililili kûnkêmia nghengo no nghendo no nsûmbêlêla.’"

6 Nfulo, Kolo ûgêlêlêle kwêsamba: "Mutegelele byalisambile gûdjo mukali wa nsambû mubê. 7 Ntê ûbyo Kabesha Mpûngû wakebesambêla balya besolwele kwana bekamulêlêla busigi no djûba? No ntê wêkesha kwêbakwasha? 8 Nanimilombola, wêkebaha sitê bûkêlê. Mone ntêê Mwana wa Muntû enekasha wêkatana lwêtabêsho mukandje?"

9 Byonka nansho Yesû wêbalombwele lûkêndê lûno, kibalo kya bantû bakwêmona kûba beno sitê no kûbedja bange: 10 "Bantû babêlê bagêle mukitotelo kûlomba: Gûmo wabo ûbele Mufalisayo, no gûnge Musonkya Misonko.

11 "Gûlya Mufalisayo wêmene ankondo kwêlombelela gemwine wêsambile, ‘Ee Kabesha Mpûngû, na nkufwisha kwakûba nene sinagwe bantû bange ba mulyoko, baswinania, bangêla bûbê, babûseki. Nankufwisha kwana, nene nsi nagwe gûdjû, Musonkia Misonko. 12 Nanigima nghendo gibêlê mwidjênga, na mpimia lûheto kiba kya kumi kya bûmoni bwane bonse.’

13 "Mone gûlya Musonkia Misonko ûbele mwimane kûla mpee, no hanyonghwene kûtûlûla meso gage mwigûlû, mone wêbikile kûboko mukyalê no kwêsamba: ‘Ee Kabesha Mpûngû, nkyêle lûsa nene wêno bûbê!’ 14 ✝ "Nanimilombola kwana muntû gûdjû, Musonkia Misonko wêbwêlêle kû nsese gyage, abele mulekelelwe gûlya gûnge halekelelwe, kibalo gense wakesesha. wakatukibwa, nogense waketûkya wakasesibwa."

15 Bantû bamo bamuêlêle Yesû baana bakebake kûba ebatenteke maboko gage. Baana ba bûganga bage lwabamwene nansho, bebakankêle bantû babo, 16 mone Yesû wêbetile baana bakebake , wêsambile: "Mwibaleke babo bana bashe kwandê, namukebasibili kibalo Bûkolo bwa Kabesha Mpûngû bwêna bantû bi baba. 17 Sitê sitê nanimilombola, muntû gegense usimwibûtambûle Bûkolo bwa Kabesha Mpûngû nagwe mwana mukemuke hakatweli."

18 Mwimeni gûmo umubulishe Yesû: "Mulagi musoga, nonge ntêê kûba nyonghone kûbêkala bûkome bwa milemba mbagala?"

19 Yesû umulombwele, "mwanda gwakê wangita musoga?" Hakûlê wêko musoga: Nambo Kabesha Mpûngû bugima bwage. 20 ✝Wimwibimanye bisila byabile bisambe: ‘No kalongi buseki, no keyagi, no kebi, no kasitekekya wa bumpi, banyemeke bashobe no nyobe.’

21 Gûlya muntû wêndwêle: "Bibyo byonse nimwi bikokele kûbambêla bwanike bwane."

22 Kyaba Yesû lwategelele gigyo, umulombwele: "Ukino kintû kimo kyolê mutaûkêlwe. Gyata ûshe bintû byonse byolê nabyo, wêbatange balanda, nogwe saûbe no bûkûsa mwigûlû, kûwa djûû ûnonde." 23 Mone gûdjo muntû lwategelele nansho, usumininwe biiko kibalo ûbele no bûeta bûngê.

24 Yesû lwemwene wasumininwa, nansho wêsambile: "Bûlûlê kêê byabilê lûma kwa bampeta kûtwela mu Bûkolo bwa Kabesha Mpûngû! 25 Sitê kiele mbela kwê ngamia kûhêta mulolo lya lusinge, kûlêmba mpeta kûtwela mu Bûkolo bwa Kabesha Mpûngû."

26 Balya bategelele nansho babulishe: "Nani wêkanyonghona kwandibwa?"

27 Yesû wêndwêle: "Kishakunyonghokela kwê bantû, kyakûnghokela kwê Kabesha Mpûngû."

28 Noge Petelo wendwêle: "Lola bêlê, twasiga bintû byonse no betwe kûkûlonda."

29 Yesû wêbalombwele: "Sitê sitê nanimilombola, hakûle muntû usigile nsese gyage, mukasi, no bamwanabo, babyali, no baana kibalo kya Bûkolo bwa Kabesha Mpûngû 30 Kuana wêkaebwa nghendo giingê mbele mu ngikeno gya masigi gano, no mukyaba kikasha wêkaebwa bukome bwa milemba mbagala."

31 Yesû wêbatwalile balya baana ba bûganga kumi no babêlê kûnkondo, wêbalombwele: "Twabagala Yelusalema nokûko kintû kyonse kisintilwe no bamoni kibalo kya Mwana wa Muntû kika gwaninibwa. 32 Kibalo wêkabêkwa mu maboko ga bantû basibamwitabêshe Kabesha Mpûngû, nobo bekamusompwela, no kumutûka, no kumushêlêla mata. 33 Bekamuhûla nswi no kumwiyaga, mone sigi lya kasatû wakashûka."

34 Mone baana ba bûganga bage habasingûlwêle nsintwe gigi, kibalo nsintwe gyage gibele gibêsêkwe kwabalê, nobo habamanyine Yesû ûbele walisambêla kêê.

35 Kyaba Yesû lwashenine Yeliko, kûbele muntû gûmo mpoki mwikane kûnkondo gya ndjêla, mukûlomba. 36 Lwategeleshe bibûngo bya bantû bya kûêta, ubulishe: "Kwê kêê?"

37 Bamulombwele: "Yesu munasaleti waêta."

38 Noge ûangwêlê djwê wêsambile: "Yesu, Mwana wa Daudi! Nkyêle lûsa!"

39 Balya batangêle bamukankêle banine talala. Mone gee ûgêlêlêle kwangûla djwê: "Mwana wa Daudi! Nkyêle lûsa!" 40 Yesû wêmene ûtakêshe bamusishe kûgêbwa kwage. Gûlya muntû mpoki eikile kûbwêhê, Yesû umubulishe: 41 "Wakeba nkûlongele kêê?"

Noge umuêndwêle: "Kolo," nankeba, "Mone."

42 Yesû umulombwele: "Lola, Lwêtabêsho lobe lwakû handia."

43 Onka ao gûdjo mpoki ûmwene, umulondile Yesû umutumbikile Kabesha Mpûngû. Bantû bonse lwabamwene bibyo, bamu tumbikile Kabesha Mpûngû.