1 Kyaba kyonka kikyo, kûbele bantû bamo bamulombwele Yesû musahû gwa bantû ba Galilaya kwana Pilato wê beyagile, no masi ga bantû wêgasangêlêle no mulambû gwabo gwababele baimia. 2 Noge Yesû wêbahendwêle: "Mwaninga kwana ba Galilaya babo bakile luki lwamuswelo gûgo, babele no bûbê kûlêmba ba Galilaya boonse? 3 Namilombola sitê, ubisibyo! Mone no benywe ntê amwibesase, musha mutobele nagwe nibo. 4 No balya kumi no muganda, bagwêlêlwe no kilêngo kûko Siloamu, mwaninga kwana babele babê kûlêmba bantû bonse bekene mu Yelusalema? 5 Nanimilombola, ubisibyo! Mone ntê amwakûkeba kwalabûka kûima mubûbê benywe bonse, shamutobele nagwe nibo bonse."

6 Kûwa Yesû wêbalombwele lûkêndê lûlû: "Muntû gûmo ûbele no mutê gwakikûdjû gûbele gukunwe mwibala lyamisabibu. Muntû gûdjo ûgêle akebe kûsobola bihelo byage mone hamwene kintû. 7 Kûwa umulombwele mwingili wabala wabala gyage lya misabibu: ‘Lola, mukyaba kya miaka gisatû namba nasha kûsobola bihelo bya mutê gûgû gwa kikûdju, nsimumone kyokyonse. Wêgûkale! Mwanda gwakê sagûgêlêlêle kona nsê sile?’ 8 Mone gee mwingili wabala umuwêndwêle: ‘Kolo, wêgûleke byonka gûno mwaka, sanigûseleshe musenga no kwêgûbêkêla kikûngya. 9 Ntê gokûwa bihelo mwaka gwakûsha, kiyenene! Mone ntê anasho, ûolê kegûkala.’"

10 Sisi limo lya kwêtûsha, Yesû ûbele walanga mu nsese gya milombelo gya Bayuda. 11 No hao abele mwanamukasi gûmo ûbele mutongi wa miaka kumi no muganda; hûkêlwe no munyaga gûbe gwa katumba, noge habele wanyonghona koloka. 12 Yesû lwamumwene, umwitile umulombwele: "Mwana mukasi, ûbe angalê wahandibwa mutongo gobe!" 13 Kûwa Yesû umutentekile maboko gage, lûkwe lûmo holokile nsûnga no kûbamba kumutûmbêsha Kabesha Mpûngû.

14 ✝Mone mukûlû wa nsese gya milombelo gya Bayuda usumininwe kibalo Yesû wandishe gûdjo mwana mukasi sigi lya kwêtûsha. Gûlya mukûlû wansese gya milombelo gya Bayuda ûlombwele kilya kibûngo kya bantû: "Kwêmasigi mutanda gayenene bantû kûlonga mingêlo. Mumasigi gago mushe mwahandibwe lilyo, mone ha sigi lya kwêtûsha!"

15 Mone Kolo umwêndwêle: "Benywe beno nfika! Nani mubûkata bwenyu usisokoni nghombe gyage ao pûnda gyage kuima mukianfu egiile kwêkûbêla madjê musigi lya kwêtûsha? 16 Onka mwana mukasi walûbyalo lwa Bûlaimu, kwana ubikilwe bûlema no lyabola miaka kumi no muganda; hakiswele kûba kisoga kumuhandya sigi lya kwêtûsha?" 17 Yesû lwabidjile kwêsamba nansho, baakanani nage bamwene nsoni mone bantû bange bonse bamwene mulogo kibalo kya mianda gyonse gyalongile.

18 Yesû ubulishe: "Bûkolo bwa Kabesha Mpûngû bwêgûlane no kêê? Sanibwêgûshe nokêê? 19 Bwênagwe nindjee gya kilanga. Gitwalile muntû gûmo wigikunine mulûbanda lwege gimenine no kûkûla kûba mutê gûkata, no toni twa egûlû tuimpile binswa kûmatabe gage."

20 Yesû ubulishe byonka: "Ni bwêgûshe Bûkolo bwa Mwigûlû nokêê? 21 Ninagwe kidjûsho kitwalile mwana mukasi gûmo no kutubula mubûnga bwêngê bitala bisatu kûwa bûnga bonse bûtantile."

22 Kûwa Yesû ûgêlêlêle kûeta mu bibûndê no tubibûndê mukulanga kyaba kyagêle Yelusalema. 23 Muntû gûmo umubulishe: "Mulangi bantû banshompe bekahandibwa?" 24 Yesû wêbaêndwêle, "Mwikankamike kûtwela kwa kwêtêla mushango gûke; kibalo nanimilombola bangê bekatompa kûtwela mone habakanyonghoni kûtwela. 25 Kyaba kyakûsha, kwana mwine nsese wakemana no kubigala kilêmba; benywe mwakemana andje no kûbamba kûkokola mushango no kwana: ‘Kolo tubigwêle mushango!’ Mone gee wakebaêndûla: ‘Nsimidjê benywe, byonka sindje kwamwaimina!’ 26 Kûwa mwikabamba kumulombola: ‘Betwe ûbalya balêle no kwêkûbêla amo nobe; no gwee ûlangile mubibûndê byetu.’ 27 ✝Mone gee wakesamba: ‘Nsimidjê benywe byonka nsindje kwamwaimina. Musemuke kûgêbwa gyane, benywe bonse bangêla bibê!’ 28 ✝Hao kwakaba kûlêla no kwêsenkemia meno kyaba kyamulê kamumona Bûlaimu, Isaka, no Yakobo, no bamoni bonse mu Bûkolo bwa Kabesha Mpûngû, mone benywe bene mwatebwa andje! 29 Bantû bekasha kuima kumusha djûba no kumugya djûba no kuima kaênda kalûngû kûkasi no kûlûme, nobo bekekana hantû ababêkwêlwe djambûla kukikwe kya Bûkolo bwa Kabesha Mpûngû. 30 ✝Lola, balya babele banfulo bekaba batangi, no balya batangi bekaba ba nfulo."

31 Kyaba kyonka kikyo bafalisayo no bantû bange bamuikêle Yesû bamulombwele: "Ima ano ûgye hantû ange, kibalo Helode wakeba kûkwêyaga."

32 Yesû wêbaêndwêle: "Mugye mumulombole gûdjo mubwabwa nansino, ‘Lêno no djo nshankûmbe minyaga no kûandia batongi, no sigi lya bûsatû nika gwanininia mugêlo gwane.’ 33 Nonansho, kwa lêno no djo lyage, kiyenene ngêlêlêle no lwendo lwane kibalo hakiyenene mumoni eyagwe andje gya Yelusalema.

34 "Yelusalema, Yelusalema! Wakwêbeyaga bamoni no kwêbasa mabwe balya batuminwe kolê. Nkoo giinga nkebile kwêbabûngakania baana bobe amo nogwe ninkoko byele kûbûngakania mausi gege munse gya byûbê byage, mone ûkampilwe! 35 ✝Lola nsese gyobe gyasigwa nghee kintû. Nankûlombola haûmoni byonka kuikêla kyaba kyolê kesamba: ‘Esêlwe malyese gûdjo wakûsha musina lya Kolo.’"