1 ✝Kyaba kyonka kilya, bantû maelufu lwa babele babûngakana, no ababele banyantana, Yesû ûbambile kûbanga bêlê no baana babûganga bage no kwêbalombola: "Mbelê gya byonse mwiempe no kidjusho kya Bafalisayo kwana ba kasongakania kalwêsha. 2 ✝Hakûlê kyokyonse kiutilwe kikabûla kûhûtûlwa hûtû, no hakûle kyokyonse kibisikilwe kikabûla kûsogololwa. 3 Kwanansho, byonse byamwisambile mu kidjo, bantû bekebitegelela mu mugenge, byonse bya munenghene mumatwê mwalê mu nsese bilêmba bibigale bikasaûlwa egûlû lya kigûlû.

4 "Na nimilombola benywe balûnda, namu kebatudjuki balya bakwêyaga mubêlê yaa, mone habanyonghoni kûlonga kintû kinge mbeela. 5 Nshanimilombole gûlya muyenene kumutûdjûka; mumutûdjûke gûlya nghimba gya kwêyaga mubêle, wêno bûkome bwa kumuta muntû mukaya kakalûnga nyembo. Mumutûdjûke gûdjo!

6 "Kimanyinkane lûsêgê lûtano lwakûlwa lûmea lûbêlê? Mone kûgêbwa kwa Kabesha Mpûngû alwêbêlêlwa lûsêgê no lwêne lûmo. 7 Ûbyo, nogine nywene gyatwe lyenyu gibalwe gyonse. Nansho na mukatudjuki; kibalo benywe mwibanyemekwe kûlêmba lûsêgê lûngê!

8 "Namilombola kwana, gegense wêkangitabêsha kûgêbwa kwa bantû, mwana wa Muntû noge wêkamwitabêsha kûgêbwa kwa masalagûlû ga Kabesha Mpûngû. 9 Mone gee wêkamenga kûgêbwa kwa bantû, no mwana wa Muntû wa kamubenga kûgêbwa kwa masalagûlû ga Kabesha Mpûngû.

10 ✝ "Noge wakwêsamba mwanda gwakumuakania mwana wa Muntû wêkalekelelwa, mone gûlya wakûbedja Mutêma Gûlûmbûlûke hakalekelelwa.

11 ✝"Kyaba kyabalê kemiila benywe kûgêbwa kwa nsese gya milombolo gya Bayuda nokû bakûlû no babêkali, namukabi no kahaga kibalo kya kûbanga bilya byamulê kesamba, 12 Kibalo Mutêma Gûlûmbûlûke gwêkemilanga onkao kilya kya mulê bayenene kwêsamba."

13 Muntû gûmo mubûngê bwa balya bantû umulombwele Yesû: "Mulangi, mulombole mwanetû atange bûyana bwêtûsigêle Tata."

14 Mone Yesû umûêndwêle: "Mpyana, nani umbikile nene kûba mukali wa nsambû no mutangani abûkata bwenyu?" 15 Nfulo wêbalombwele: "Mwiempe no muswelo gwa bwêma bwa mutêma; kibalo ngikeno gya muntû hagikûdjagili bûngê bwa bintû byalê nabyo."

16 Kûwa Yesû wêbalombwele lûkêndê lûlû: "Kûbele mpeta gûmo kwana bala lyage libele no bimbûlwa bingê. 17 Mpeta gûdjo uningile mu mutêma gwage: Nshanonge ntêê. Nonene nsilê antû akûbêka bimbûlwa byane. 18 Gûdjo mpeta wêsambile shanonge nansino: ‘Nsansambûle tûombo twane no kuimpa lûkaombo mukata mbeela, none nikabêka mumo bimbûlwa byane byonse no lûheto lwane. 19 Kûwa nikesamba nansino kibalo kya nene mwine: Wêno lûheto lûngê lobikile mu bûkûsa bobe, gikana wêtûshe, ûlye wêkûbêle no kûlogelelwa.’ 20 Mone Kabesha Mpûngû umulombwele: ‘Mubidje gwee! Lêno busigi mutêma gobe sagûlombwe no bintû bilya byonse byolibêkêle bûkûsa; sabibe byani?’"

21 "Ûbyo bibele kwê muntû mpeta wêbêkêle lûheto kibalo kyage mwine mone ha mpeta gibalwe kûgêbwa kwa Kabesha Mpûngû."

22 Kûwa Yesû wêbalombwele bana babûganga bage: Kwanansho nanimilombola, namukadjembi ngikeno gyenyu kwana samulye kêê, no mudjembelele mibelê gyenyu kwana samushale kêe. 23 Kibalo bûkome bûsoga kûlêmba byakûlya, no mubêlê gûsoga kûlêmba bishalanwa. 24 Mutwale lûkêndê lwa kibombo bombo; hakyakukuna, hakyakwêmbûla no binghe tûombo noene akûbêkêla bimbûlwa; Mone Kabesha Mpûngû wakwêbilêsha! Benywe mwibakitûngo kikata kûlêmbêla toni. 25 Nani abûkata bwenyu kwana kwakwêdjembia kwage wêbûnyonghona kwibilêsha no kine kyaba kimo mu ngikeno gyage? 26 Nfulo ntêê hamunyonghoni kûlonga kilongwa kisho nagwe kikyo biiko, kwakê kûba no kahaga kibalo kyakê kûdjembelela bilya binge? 27 ✝Mulole bûlûba byabûlê mukûsanuna; habwakûlonga mingêlo no habwakûotola. Mone nanimilombola, no mwine Solomono mu bûkolo bwage hamushale bisoga nagwe gûmo wagaga malûba. 28 Nansho ntê Kabesha Mpûngû wakûshêka maani ga mwibala, kwana lêno ûkwagalê no djoo gatebwa mukaya, nantê wakemishêka no benywe bisoga? Benywe bantû balwêtabêsho lûke!

29 "No namukadjembi mu mitêma gyenyu kwana samulye kêê no samwikûbêle kêê; namukabi no mpewa mpewa kibalo kya bibyo. 30 Kibalo bibyo byonse bya kûdjembelelwa no bantû basibamumanye Kabesha Mpûngû. Shenyu mumanye kwana mwakûkeba bintû bibyo. 31 Nfulo mukebe bêlê Bûkolo bwa kabesha Mpûngû no bibi byonse wêkemitanga.

32 "Namukatudjuki kinywe kibûngo kisho, kibalo Shenyu wamona bisoga kwimia benywe bûkolo. 33 Muushe bintû byonse byamulê nabyo mukebae balanda. Mwilongele mitûngû gisikatuni, mukebêkêle bûkûsa mwigûlû, kwana abusimini kûko, antû ngibi hagisheni ao muswa hagoni. 34 Kibalo alya ebûkûsa bobe ûekaba mutêma gobe.

35 ✝"Mube djambûla mwikwêke kikadja mulûbûnda, no kimuni kyenyu kibe kyakûnka, 36 ✝nagwe bengili bakumuempela Kolo lyabo ebwêlêle kuima kukikwe kya bûlûgo, kûba kyaba kyelê kaika no kûkûkûla mushango lwendo lûmo bamubêgwêle. 37 Kikaba kya lyese kûbalya bengili kwana Kolo wabo enekasha wêkebatana bemeso saka. Sitê sitê nanimilombola, wêkekwêka kikadja kyage mulûbûnda, nokwêbekêka kûba balye, noge asaashe no kwêbengêlêla. 38 Kikaba kya lyese kûbengili babo, kyokûba mulûme wabo enekasha wêkebatana bemeso, nontê wêkasha mu mbêlêlê gyabusigi ao kûkûkendûlûka kwa busigi. 39 ✝Mone musingûlûle mwanda gûno: "Ntê mwine nsese walêmumanye kyaba ngibi kyelê kasha, haswele kusiga nsese gyage kubungulwa. 40 Benywe byonka nansho mwibayenene mube djambûla, kibalo Mwana wa Muntû wakasha kyaba kilya kyamusi bamanye."

41 Huao Petelo umubulishe Yesû: "Kolo, lûkêndê lûno lonotûlombola betwe yaa, no kibalo kya bantû bonse?"

42 Kolo wêndwêle: "Nani wêko mwimeni mulûmbûlûke no wêno lweni, kwana Kolo lyage wakamubêke egûlû lya bengeli bage boonse, kûba ebae byakûlya kyaba kigwane. 43 Kikaba kya lyese kwa mwingili gûlya, kwana Kolo lyage enekebwêla wêkamusangana wakûlonga nansho. 44 Sitê sitê nanimilombola, wêkamubêka mwingili gûdjo kûba mwimeni wa bûheta bwage bonse. 45 Mone ntê gûlya mwingili saesambe mumutêma gwage: ‘Kolo lyane wagisha biiko enekwêbwêlêla,’ kûwa ûbambile kwêbaûla bengili nage baana balûme no banabakasi no kûlya, kwêkûbêla no kûkolwa, 46 Nfulo, kolo wa mwingili gûdjo wêkasha sigi lyasikaningili no kyaba kya sikamanyi. Wêkamuûla; no kumukoma mwingili gûdjo bibê. no kumubêka kifulu kimo amo no basi betabêshe.

47 "Gûlya mwigili musingûlûle bisoga bikampwe kolo wage, no henekwêbêka djambûla no henekûlonga bikampwe kolo wage, shaaûlwe kwa nswii biiko. 48 Mone gegense usidjê, nogee kulonga bilya biyenene kûûlwa, wakaûlwa bisho. Gegense ûelwe bingê wêkakendwa bingê, no gegense ûelwe bingê biiko wêkakendwa bingê biiko.

49 "Nansha kûkwamia kaya mukandje, nankampwa kaswakûba djambûla kawa kûkwamibwa.

50 ✝ Ninalo lûbatisho kwana lûyenene mbatisibwe, no ninomasûsû gakata kuikêla lûbatisho lûlû lûgwaninine. 51 Mwaninga kwana nansisha angalê mukandje? No heneasho, ulisi angalê, nambo kûsalênkana. 52 Kûbambêla onkano, kwêkaba muuso gwa bantû batano, basatû ku babêlê no babêlê nghimba gya basatû. 53 ✝Bekalankana, Tata wêkaba nghimba gya mwana mulûme no mwana mulûme nghimba gya shage, madjû nghimba gya musongwa kasi wage; musongwa kasi nghimba gya nyage wage, madjû bûko nghimba gya mukasi wa mwanage no gûdjo nghimba gya madjû bûko wage."

54 Yesû wikilombwele byonka kibûngo kya bantû: "Amulê mukûmona kile kyakuimina mugela gwa mugya djûba lwêndo lûmo mwalisamba: "Mbila gisaginoke no sitê gya noka." 55 Amwakûmona munyaga gwa kahênda kalûngû kûlûme gwa kumpa mwalisamba, kûsakûbe kyûdja no ûbyo byabilê kaba. 56 Benywe beno nfika! Mwidjê kûsahûla hantû elweo kwa kûlola hantû ansê no egûlû, kibalo kyakê hamunyonghoni kûmanya kibalo kyakûsintûlûla kyaba kino?

57 "Mwanda gwakê hamunyonghoni kwêsolwela benywe bene mwanda gûsoga gwa kûlonga? 58 Kyaba kyamulê mukûgya kûbangabanga no wakûsongela mubembeleshe mutegelesanie mukimundjela. Ntê anansho shakwile kwi nsusi, no nsusi shakwile kwêmusilêkale, no musilêkale shakûbêke mukikûtû. 59 Nankûlombola: Haûkaimi mumo ntê onolimie no lwêne lûmea lwa nfulo."