1 Musigi lilya kûtelwe mbêla giimine kwê Kaisali Ogisito mubêkali muk-ûlû kwêbakeba bantû bonse bamûmwalo gonse gwa baloma babalwe. 2 Kûbalêkwa kûko kûbele lûkwe lûtangi, kyaba Kolenio abele mubêkali wa mwalo gwa Sulia. 3 Nfulo, bonse bategelele bagêle kûbalêkwa muntû gense mu kibûndê kyage.

4 Byonka nansho Yosefu noge ûselile mukibûndê kya Nasaleti mwalo gwa Galilaya, ûgêle mukibûndê kya Daudi kya kwêtwa Betelehemu mwalo gwa Daudi, no kwanansho ûbele walûbyalo lwa Daudi. 5 Ûgêle kûbalwa amo no musongwe wage Malia, kwana ûbele no limi. 6 Lua babele kûko kû Betelehemu, kyaba kyage kya kûbyala kigwanine, 7 ûbyalile mwanage wabûbelê, mwana mulûme. Umushikile kishandê kya bwanike, umulalikile mu kisakyê kya banghombe kibalo babulilwe antû mu nsese gya baika.

8 Kûntû kûko kû Betelehemu kûbele baempi bamikoko bakelilwe busigi mukitûntû kûempa bimunanwa byabo. 9 Masalagûlû ga Kolo gebaiminine kimpûlû mpandja, no ntûmbo gya Kolo gibamunkêshe mugela gonse. Batudjukile biiko. 10 Mone Masalagûlû ga Kolo wêbalombwele: "Namukatudjuki! Na nimihêla musahû gûsoga, gwa mulogo gûkata gwêkebamona bantû bonse. 11 Kibalo lêno lili mukibûndê kya Daudi, mwabyalwa muandia kibalo kyenyu, ûge Kilisitu Kolo. 12 Nokano kekaba kabandêlêlo kwenyu, mwikamu sangana mwana wa lûkeke mushêkwe kishandê kya bwanike, mulalêkwe mukisakyê."

13 Onkao kibûngo kikata kya basilêkale ba mwigûlû kikuminkene no gudjo Masalagûlû, gamutumbikile Kabesha Mpûngû:

14 "Ntûmbo kwê Kabesha Mpûngû wê mwigûlû,

no angalê akandje kû bantû balya bakumunengesha!"

15 Nghimba gya masalagûlû kûsemuka kwêbwêlêla mwigûlû, balya baempi bamikoko belombolene: "Tûgye lûmo kwa lûmo kuikêla Betelehemu tûkamone kya gêlêka, Kolo kyalitwanine."

16 Nfulo, bagêlê lûbêlo, bamusangene Malia no Yosefu no gûdjo mwana wa lûkeke mulalêkwe mukisakye. 17 Babo baempi bamikoko lwabamumwene gûdjo mwana bebanine bonse musahû gwabategelele kibalo kyage, 18 bonse bategelele gûgo mwanda begalagenie kibalo kya musahû gwa balombwelwe no baempi bamikoko. 19 Mone Malia ûkwatêlêshe mianda gyonse gigyo mumutêma gwage. 20 Balya baempi bamikoko bebwêlêle kwabo kûno mukûtûmbêsha no kumutota Kabesha Mpûngû kûbyonse byababele bategelela no kûmona byonse bibele monka mwa balombwelwe.

21 ✝ Masigi muganda, nghimba gya kûkalwa balê mwana agaikile, umwinikile sina lyage Yesû, sina kwana ûbelemuebwe no Masalagûlû nghimba enelitwalêlwe limi.

22 ✝kyaba kya kumunkibwa kwa Yosefu no Malia, byabibele bilagêlêle bisila bya Musa, babyali babo batwalile Mwana baselile nage Yelusalema kûba bamulangêshe kûgêbwa kwa Kolo, 23 ✝mubisila bya Kolo musintwe: "Mbyalwa gense mubelê wa mwana mulûme shabêkwe djambûla kwê Kolo." 24 no bagêle kuimia mulambû: "Nkûnda gibêlê no byana bibêlê bya djêba, monka mwisambêle bisila bya Kolo."

25 Kyaba kikyo kûko Yelusalema kûbele no muntû gûmo musoga no mutûdjûke Kabesha Mpûngû, sina lyage Simo. Gee ûbele walwegelela kwakiwêwê bûempuli bwa Isilaeli. Mutêma gûlûmbûlûke gûbele amo nage. 26 Mutêma Gûlûmbûlûke gûbele gwamusitêkêkya kwana haso kûkya ntê onolimone Kilisitu wa Kolo. 27 Nfulo ûlûbûlwêlwe no Mutêma Gûlûmbûlûke, Simo ûtwelile mu Kitotelo. No babyali ba Yesû lwaba musilishe mu Kitotelo Mwana wabo kûba bamulongele monka mukebelwe no kisila, 28 simo umutambwêle mwana yesû mumaboko gage kûno wakumutûmbêsha Kabesha Mpûngû, no kûnenghena:

29 "Onkano Kolo ntakêshe, nene mwingili obe nkye kwa angalê kwa kûba wagwania mulago gobe. 30 Kibalo meso gane gamona lûhandêlo lobe,

31 kwana lobikile djambûla kûmeso ga bantû bonse:

32 ✝ Mugenge kibalo kya mpûtûlo kû bantû basibetabeshe,

no kibalo kya ntûmbo kûbantû bobe Isilaeli."

33 Shage no nyage wa Yesû babele baligalagania mianda gisambile Simo kibalo kya mwana. 34 Kûwa Simo wêbesele malyese, umulombwele Malia, nyage wa Yesû: "Mwana gûdjû wêkaba kibalo kya kûgwêsha no kûbyûla kwa bantû bangê mu Isilaeli. Noge wakaba byesha byakabengwa no bantû; 35 kibalo maninga ga bantû bangê gekaûtûlwa hûtû hûtû. No mugela gobe gwe mwine, misa gikakukinka nagwe lûpanga lwabûgê lwê kakukinka Mutêma gobe." 36,37 Byonka ûbele mu Kitotelo mumoni gûmo mwana mukasi, Sina lyage Ana, musike wa Fanueli, wa musoo gwa Asheli, ûbele mukote biiko; wêkene no mulûme miaka kiloba yaa, Kûwa mulûme wage ukile. Noge ûbele mukyêlêlwe no mulûme, ûbele no miaka makumi muganda no gina. Kyaba kyonse wêkene mukitotelo wa kwigima no kûlomba busigi no djûba. 38 Kyaba kyonka kikyo, Ana usile no kûbamba kumutûmbêsha Kabesha Mpûngû, no kwêsamba musahû gwa gûdjo mwana kûbantû bonse babele bakûempa buikuli bwa Yelusalema.

39 ✝Kyaba Yosefu no Malia, babyali ba Yesû lwabawêle kûlonga byonse bitakisibwe no bisila bya Kolo, bebwêlêle kwabo Nasaleti mwalo gwa Galilaya. 40 No gûlya mwana ukulile ûgêlêlêle kûmona bûkome, udjulile lweni, no kyabûntû kya Kabesha Mpûngû kibele amo nage.

41 41 ✝Yosefu no Malia babyali ba Yesû; babele no kisela kya kûgya Yelusalema mumwaka gonse kyaba kya sigi likata lya Pasaka. 42 Yesû lwabele no kilêko kya miaka kumi no gibêle, bonse baselile kûgya Yelusalema musigi likata lilyo monka mubelele kisela. 43 Nghimba gya kikwe kûwa, Yosefu no Malia babambile kwêbwêlêla kwabo, noge Yesû usigile Yelusalema, mone babyali bage habasingûlwêle. 44 Baningile ûbele nabo mumulongo gûmo, bagêle lwendo lwa sigi ligima, babambile kumukeba mu musoo gwage no kû balûnda. 45 Kwa kûba abamumwene, baselile byonka Yelusalema kûmukeba. 46 Nghimba gya masigi gasatû bamumwene mukitotelo, wiki mubûkata bwa balangi babisila, wakwêbategelela no kwêbabûsha. 47 No bonse bategelele mianda gyage begalagenie lweni lwege no mahêndwe gage. 48 Babyali bage lwabamumwene begalagenie. Malia nyage umubulishe: "Mwanane, mwanda gwa kêê walitûlongela nansho? tata obe no nene twaba twakûkeba kwa kininga."

49 Yesû wêbabulishe: "Kibalo kyakê mwakûnkeba? Amwidjê kwana kimpyenene kûba mu nsese gya Tata wane?" 50 Mone babyali bage abasingûlwê nsintwe gya mianda gyalibalombwele.

51 Nfulo utukile nabo Nasaleti, ûbele walibakokela. Mone nyage ûbêkêlêshe mianda gigyo gyonse mumutêma gwage. 52 ✝Noge Yesû ûkulile mu lweni no kêmo, ûkampilwe no Kabesha Mpûngû no bantû bonse.