1 Kyaba Yesû lwabidjile kwêsamba gyonse gya kampilwe bantû kûtegelela, ûgêle Kapelenaumu. 2 Kûko kûbele mukûlû wabasilêkale gûmo kwana ûbele no mwingili wage wabele mukampwe biiko; gûdjo mwingili ûbele mutongi kûbwêhê kûkya. 3 Gûlya mukûlû wabasilêkale lwategelele musahû gwa Yesû, wêbatumine bakote kansangwa bayuda bagye bamulombole ashe amuhandie mwingili wage. 4 Kyaba balya bakote lwabaikile kwê Yesû, bamwisasile biiko amukwashe gûlya mukûlû wabasilêkale, besambile: "Mulongele muntû gûdjû monka nwene kûlombela, muyenene kûlongelwa nasino. 5 Kibalo gee mwigûkampwe musoo gwetû, no ûge wêtuimpêle nsese gya milombelo gya Bayuda."

6 Hûao Yesû ûgêle amo nabo, lwabele kûbwêhê no kuika kû nsese gya gûlya mukûlû wabasilêkale utumine balûnda nage bamulombole Yesû: "Kolo, no kedjembya mbeela, kibalo gwe awêmuyenene kûtwela mu nsese gyane. 7 Ukibalo kyanimwene kwana nsimuyenene kûsha kolê. Mone wêsambe mwanda yaa, no mwingili wane swahande. 8 Kibalo, nene mwine ni muntû wêno bantû beno kitenta kûnêmba, no nino basilêkale kûnsê gyane. Namulombola gûmo: ‘Gyata,’ noge wagyata; namulombola gûnge: ‘Ndjûû,’ noge washaa; nanombola mwingili wane: ‘Longa nansino,’ noge walonga."

9 Kyaba Yesû lwategelele mianda gigyo, wêgalagenie no gûdjo muntû, nfulo wêkyalabûkêle kilya kibûngo kya bantû kibele kya mulonda wêbalombwele: "Shalimone wêno lwêtabêsho lûkata bilûlû no mu Isilaeli!"

10 Nobalya bantû batuminwe kwê Yesû, lwabebwêlêle kû nsese bamutanine gûlya mwingili wawakûwanda mbeela.

11 Djoo lyage nghimba gya mianda gino; Yesû ûgêle mu kibûndê kimo kiitilwe Naini no baana babûganga bage. No kibûngo kikata kya bantû, kilondene nage. 12 Nfulo, lwabaikile kûbwêhê no lêmbwa lya kibûndê, ukuminkene no bantû babele batwale lukii mu kuima andje gya kibûnde. Gûdjû ukile ûbele nsongwa lûme wa madjû mukyêlwe, bantû bangê ba kibûndê kilya babele amo no gûdjo madjû mukyêlwe. 13 Kyaba Kolo lwamumwene madjû gûdjo mukyêlwe, mutêma gwage gudjulile lûsa, umulombwele: "Nokalili." 14 Kûwa, ûshenine kûgêbwa no kukuma bûlya bûtanda bwabaki, no kyaba balya babele bebûtwale bemene. Nfulo wêsambile: "Nsongwa lûme! Nanisamba, gimana!" 15 Gûlya ûbele mukye ubyukile no kûbamba kûbanga, no Yesû umwêbwêlêshe kwê nyage.

16 Bantû bonse batwelilwe no mwenyo babambile kumutûmbêka Kabesha Mpûngû, banine: "Mumoni mukata waimina abûkata bwetû! Kabesha Mpûngû; washa kwêbakwasha bantû bage!"

17 Musahû gûgo gûlongile Yesû, gûgwanine mu Yudeya no mubibûndê byonse bya kûmakondo.

18 Baana babûganga ba Yoano mubatisha, bamusilêshe Yoano kibalo kya mianda gigyo gyonse, noge Yoano wêbetile babêlê abûkata bwabo baana babûganga bage, 19 wêbatumine kwê Kolo, bamubûshe: "Gwe ûgûlwa wakasha, ao tumwempe gûnge?"

20 Kyaba balya bantû lwabamuikêle Yesû, bamulombwele: "Yoano mubatisha wa litutuma kolê tûkûbûshe: ‘Gwe ûgûlya wakasha ao tumuempe gûnge.’"

21 Kyaba kyonka kikyo Yesû ûbele walibahandia bantû bangê, babele no mitongo hala hala no babale no minyaga gibê, no byonka kwêbaûtûla bampoki bangê meso. 22 ✝nansho Yesû wêbaêndwêle balya bamikendi ba Yoane: "Mwibwêlêle mumulombole Yoane, bilya bya mumwene no kûtegelela ba mpoki bamona bisheti byatamba, beno bûsûngû bamunkibwa, bampokoto bategelela; baki bashûlwa, no balanda basawêlwa, musahû gûsoga. 23 Lyese muntû gûlya hûsha kûkolesibwa no nene!"

24 Baana ba bûganga ba Yoano lwabawêle lwendo, Yesû ûbambile kûlombola kibûngo kibalo kya Yoano mubatisha, wêbalombwele: "Lwamugêle kûlya kû kyanya, mugêle kûlola kee? Mukebile kûmona lûlenge lwa kuninghinibwa no munyaga? 25 Ntê anansho mugêle kûmona kintû kêê? Muntû mushale bishandê bya kitûngo kikata? Ubisibyo! Bantû bashale bishandê bya kitungo kikata no kwêkana ngikeno gisoga, bakwêkana mu masese ga babêkali. 26 Mone mugêle kûmona kê? Mugêle kumumona mumoni? Ûbyo, mone nanimilombola gee mumulêmbêle mumoni. 27 ✝Gudjû Yoane ûge wakwanwa mulusinto lûlûmbûlûke: ‘Lola, namutuma mukendi wane aête kûgêbwa kobe abedjambûla kûkûlongela ndjêla gyobe.’ 28 Nanimilombola, abûkata bwa bantû bonse hakûlê mukûlû mbela kûlêmba Yoano Mubatisha: "Mone gûlya mwanike mbeela mu Bûkolo bwa Kabesha Mpûngû mu kûlû kûlêmba Yoano."

29 ✝ * Bantû bonse no basonkya misonko lwabategelele mianda gya Yesû, no batumbikile kwana ndjêla gya Kabesha Mpûngû gya sitê; kibalo babele babatisibwa no Yoano. 30 Mone, bafalisayo no balangi babisila, babengile têgê lya Kabesha Mpûngû, kibalo habakampilwe kûbatisibwa no Yoano.

31 Yesû ûgêlêlêle kwêsamba, wêsambile: "Nfulo sanibegûshe bantû ba lûbyalo lûlû no kintû kê? Begûlane no kê? 32 Boo ninagwe baanike bekane mwilambo, bakwigitena bobene kwa bobene no kwêsamba: ‘Twali bombela kikasa, mone hamwibakênde! Twalimimbêla nghimbo gya kûempûla mone hamulilile!’ 33 Kibalo Yoano Mubatisha usile, habele walya kyakûlya kyokyonse no kwêne kwêkûbêla difai, no benywe mwisambile: ‘Ge elê no minyaga gibe!’ 34 Mwaana wa Muntû washa, wa kûlya, no kwêkûbêla, no benywe mwalisamba: ‘Mulole wamulyoko, no nkolwa, mulûnda wa basokya misonko no beno bûbê.’ 35 Mone, lweni lwasitêtêkibwa kûba lwa sitê no bonse balya bagitabêsha."

36 Sigi limo, mufalisayo umwitile Yesû kûlya kyakûlya mu nsese gyage. Onkao Yesû utwelile musense gya gûlya mufalisayo, wêkene amutalako kûlya kyakûlya. 37 ✝ Nfulo, mukibûndê kilya kûbele no madjû gûmo kwana ûbele no bûbê. Lwamanyine kwana Yesû wakûlya kyakûlya kû nsese gya gûlya mufalisayo, ûtwalile kyasa kya makita gaembwe lisoga. 38 Usile kwêmana kûnkondo gya magûlû ga Yesû, ûbambile kûlêla, no miholo gyage gigwêlêle kûmagûlû ga Yesû. Gûdjo mwana mukasi, ukumwine magûlû ga Yesû no nywene gyage, nfulo, wigiele lwimu lwa kûtomo na umusingile galya makita gaembwe lisoga. 39 Kyaba gûlya mufalisayo umwitile Yesû, lwamwene nansho, uningile mumutêma gwage: "Ntê muntû gûdjû walê mumoni, waswa kûmanya muntû kê wamukuma, no mwana mukasi wamuswelo kê, kibalo gee ni nonga bibê."

40 Yesû umuêndwêle gûdjo mufalisayo: "Simo, nino mwanda gwa kûkûlombola."

Noge Simo umuêndwêle: "Eyo! Mulangi nombole."

41 Yesû wêsambile: "Kûbele muntû gûmo usendekile bantû babêlê lûeto, mutangi ûtwalile leni lya lûmea mia gitano lwa kitûngo, nowa bûbêlê ûtwalile leni lya lûmea makumi gatano. 42 Mone lwabandilwe kwêbwêlêsha lilyo leni lyabo, gûdjo muntû wêbalekelele bonse babêlê. Onka, nani abûkata bwababo babêlê, wa kamukampwa, gûdjo mpeta mbeela?"

43 Simo wêndwêle: "Naninga gûlya ûlekelelwe leni likata mbeela."

Yesû umulombwele, "Wakalûlûla bisoga." 44 Kûwa, ûmwalabûkêle gûlya mwana mukasi, no umulombwele Simo: "Wamumona gûdjû mwana mukasi? Lwantwelile musense gyobe, ûmpele madjê gakoga kûmagûlû gane, mone gûdjû mwana mukasi wangogya magûlû gane no miholo gyage, no kunkumuna no nywene gyage. 45 Gwee awimungimune lwimu lwa kûntomona, mone gûdjû mwana mukasi kyaba kya twelile mu nsese gyobe, hamuleke kûtomona magûlû gane. 46 Gwee hawêmunsinge makita kwêtwe lyane, mone gûdjû mwanamukasi ûlongile nansho kwakunsinga makita ga embwe kû magûlû gane. 47 Kwa nansho, nankûlombola, walekelelwa bûbê bwage bûngê kwakûba wa langêsha bûkampwe bûngê. Mone gûlya ûlekelelwe bisho, mukampwe bisho."

48 Nfulo Yesû umulombwele gûlya mwana mukasi: "Bûbê bobe bwalekelelwa."

49 Hûao babele amo nage kumutalako babambile kwêbûsenia: "Muntû wa muswelo kê gûdjû wêbûlekelela bûbê?"

50 Yesû umulombwele mwana mukasi: "Lwêtabêsho lobe lwa kûandia; gyata kwa angalê."