1 Lukindwe bwe sigi litangi lya djênga, balya baana bakasi batwalile makita ga embwe, gababele babêke djambûla, bagêle ku kilêbû. 2 Basangene lilya bwe lya lundumunwa kûla no kilêbû, 3 mone kyaba kyabatwelile mukilêbû, habasangene mubêlê gwa Kolo Yesû. 4 Lwababele mukwêgalagania kibalo kya mwanda gûgo, onkao bantû babêlê babele bashale bishandê bya kûkenka nagwe kûlyema kwa nkûba, bemene kûbwêhê nabo. 5 Babo baana bakasi, batwelilwe no kahaga, bakutamine ansê, hûao balya bantû bebalombwele: "Kibalo kyakêê mwamukeba wê bûkome mubûkata bwa baki? 6 ✝Yesû eo ano; washûka! Mwidjûkane byalimilombwele kyaba kyabele ukinenyu amo kû Galilaya, wimilombwele kwana: 7 ‘Kiyenene Mwana wa Muntû abêkwe mumaboko ga beno bûbê, no bashantaila, kûba akolekwe, no sigi lya bûsatû ashûke.’"

8 Hao balya baana bakasi bedjûkene mianda gyage gyalibalombwe. 9 Bebwêlêle kuima ku kilêbû, bebalombwele balya baana ba babûganga kumi no gûmo, no bange bonse mianda gilya. 10 Babo bailile musahû gûgo kwi baana ba babûganga ni Malia Mandalena, Yoana no Malia nyage wa Yakobo; amo no baana bakasi bange balondene nabo. 11 Mone habe betabêshe balya baana bakasi, kibalo mianda gyabo gimonekile nagwe gya sile. 12 No nansho Petelo wêmene ûgêle lûbêlo kuika kukilêbû; lwakotamine kwêlêngêla ûmwene bilya bihûto bya kitûngo, nambo hamwene kintû kiinge. Noge wêbwêlêle lwege mukwêbûsha kikê kyaimina.

13 Sigi lyonka lilyo babêlê mubûkata mwa baana babûganga ba Yesû babele mundjêla mukûgya mu kibûndê kimo kitilwe Emau, kibele kûla kwa kilometele kumi no kimo kuima Yelusalema. 14 Babele mukûbanga bobene kwa bobene kibalo kya mianda giimine kû Yelusalema. 15 Lwababele mukûbanga no kwêbûsenia, Yesû gemwine wimine ûtambile amo nabo; 16 bamumwene no meso, mone habamusingûlwêle. 17 Yesû wêbabulishe: "Mianda kê gyamulê mukûbanga mundjêla?"

Nobo bemene, nkebo gyabo gimwenie kininga. 18 Gûmo wabo witilwe Keleopa, umubulishe: "Ntê, gwee wê mwika bugima bobe mu Yelusalema kwana awêdjê biimine kûko masigi gano?"

19 Noge Yesû wêbabulishe: "Mianda kê?"

Nobo bamuêndwêle: "Mianda gimumwene Yesû Munasaleti." Gee ûbele mumoni, wêno bûkome bûkata mu mianda gyage no bilongwa, kûgêbwa gya Kabesha Mpûngû no kûgêbwa gya bantû bonse. 20 Bakûlû ba balambwili no babêkali betû bamuiminie mubûkalabale bwa luki, bamukonkomene. 21 Mone tûbele bakûdjagêle kwana gee ûswele kûandia Isilaeli! Kûgêbwa kwa gigyo, lêno ni sigi lya bûsatû kûbamba mianda gigyo agilongekile. 22 Byonka baana bakasi baange ba kwetû betûbabukishe; bagêle ku kilêbû lukindwe bwee, 23 mone habegûsangene mubêlê gwege. Bebwêlêle besambile kwana, baiminwe no Masalagûlû gebalombwele kwana Yesû wê poo. 24 Kûwa bange mubûkata bwetû, bagêle ku kilêbû basitêkêkye gilya gya besambile babo baana bakasi, mone boo habamumwene.

25 Nfulo, Yesû wêbalombwele: "Kibalo kyakê mwibabidje, mwino mitêma gi busito gya kwêtabêsha gyonse ginenghenwe no bamoni! 26 Ntê hakimuyenene Kilisitu kûsusulwa no nansho atwele mu tûmbo gyage?" 27 Yesû wêbansintûlwêle mwianda gyonse gimukumine gee, mulusinto lûlûmbûlûke kûbambêla bisila bya Musa kuikêla bamoni bonse.

28 Lwabakishenine kilya kibûndê kya babele mukûgya, Yesû wêbatangelêle ku gêbwa no lwendo; 29 mone boo bamwisasile biiko ekane naabo, banine: "Gikana amo netû, kibalo alilêngolo no busigi bwashena." Nfulo, ûtwelile mukibûndê wêkene nabo. 30 Lwabele amutalako amo nabo, ûtwalile mukate, gee kufwisha no kwêgwesela malyese, ugutimwine, ubambile kwêbatanga. 31 Hûao meso gabo gaûtwêlwe, bamusingûlwêle, mone gee usimine abûkata bwabo habamumwene. 32 Nfulo, bebûsenie bobene kwa bobene: "Nintê mitêma gyetû hagibabukile munda gyetû kwansankê, kyaba kyabele walitusintûlwêla lusinto lûlûmbûlûke mulya mundjêla?"

33 Basemukile kyaba kyonka kilya bebwêlêle Yelusalema, basangene balya baana ba bûganga kumi no gûmo no balya bange bana babûganga nabo babûngakane amo 34 no banine: "Sitê, Kolo wa washûka! Noge wamwimina Simo!"

35 Nfulo, babo bana babûganga babêlê bebanine gilya gibakumine mundjêla, no monka mwabamusingûlwêle Yesû mukutimuna mukate.

36 Lwababele baki mukûbanga, "Gigyo lukwê lûmo Yesû mwine." Wêmene abûkata bwabo wêbalombwele, "Angalê libe kwamulê."

37 Bababukile no bakwatilwe no kahaga baningile kwana bamona mulêndê. 38 Mone gee wêbalombwele: "Kibalo kyakê mwatûdjuka no mwadjemba no kahaga mu mitêma gyenyu? 39 Mulole maboko no magûlû gane, kwana ni nene mwine. Mumbabate mumone, kibalo mulêndê hagûlê mubêlê no makûdja nantê bya mwamona."

40 Nghimba gya kwêsamba gigyo, wêbalangêshe maboko no magûlû gege. 41 Bandilwe kwêtabêsha kibalo kyamulogo gwabo, no kwegalagania kwabale nako; wêbabulishe, "Mwino kya kûlya kyo kyonse ano?" 42 Bamuele kiêndê kya musha gûtekwe, 43 ukitwalile ûlêle bonse bamumwene.

44 Hûao wêbalombwele, "Kiki ûkyo kibalo kya mianda gyanimilombwele ambele amo nenyu: Kuana kibele kiyenene kûgwanininia gyonse gisintilwe mulûsinto lûlûmbûluke, kibalo kyane mu bisila bya Musa, no mumabûkû ga bamoni, no mubûkû lya Lwêmbo."

45 Kûwa ûhûtwêle lango lyabo kibalo basingûlûle Lusinto Lûlûmbûlûke 46 no wêbalombwele, "Ûbyo bya bisintilwe: Kuana Kilisitu wê kasûsûlwa no sigi lya bûsatû wakashûka kuima kû baki, 47 kisintilwe byonka nansilya mulûsinto lûlûmbûlûke kwana mu sina lyage misoo gyonse gikasawêlwa, kûbambêla Yelusalema, kibalo balabûke kuima mu bûbê bwabo no bamone kûlêkelelwa. 48 No benywe mwikaba basitêkêkya ba mianda gigyo. 49 ✝Lola, nikemitumina kyabûntû kilya Tata wane kyalimilagêlêle kitûke kibalo kyenyu; mone mwinake mu mwalo gwa Yelusalema kuikêla amulê kadjusibwa Bûkome kuima mwigûlû."

50 ✝Kyaba Yesû lwaimine no baana babûganga bage mu mwalo gwa Yelusalema, no kugya kûbwehe no kibûndê kya Betania, ûtûlwêle maboko gage egûlû no kwêbesela malyese. 51 Abele mukwêbesela malyese, wêbasigile ûtwalilwe mwigûlû. 52 Kuwa bamutotile no kwêbwêlela Yelusalema balê no ndoge gikata, 53 bekene kyaba kyonse mu Kitotelo mukumutûmbêsha Kabesha Mpûngû.