1 Nene Petelo, kikûla kya Yesû Kilisitu, na nimisintêla benywe basololwe no kabesha Mpûngû Tata kwana mwa sangalala no mwa gikana nagwe batini kûko kû Ponto, Galatia, Kapadokia, Asia, no Bitinia. 2 Kabesha Mpûngû Tata wimisolwele benywe kûlondana no kibalo kyage mulongilwe balûmbûlûke no Mutêma mumone kumukokela Yesû Kilisitu, no kumunkibwa no masi gage.

Nanimikebele kyabûntû no angalê.

3 Atûmbêkwe Kabesha Mpûngû Tata wa Kolo wetû Yesû Kilisitu! Kwa lûsa lwage lûkata wêtûlongile tûbyalwe kûya kwa kumusangûla Yesû Kilisitu kuima kûbaki. Walitûkebela lûkûdjagêlo lwê bûkome, 4 no nansho twalwegelela kûmona lyese lilya Kabesha Mpûngû lya libabêkêle bantû bage. Kabesha Mpûngû wi mibêkêle lyese lilyo mwigûlû kwana alinyonghoni kûbola, ao koneka ao kuita, 5 Lilyo likaba lyenyu benywe kwana kwa lwêtabêsho mwaempwa bine bishe kwa bûkome bwa Kabesha Mpûngû, kibalo kya kyalûhandêlo kibalo kwana lwê djambûla kûmoneka nfulo gyakyaba.

6 Mulogelelwe kibalo kya mwanda gûgo, nanso kwa kyaba kisho kisakimiyenene kûkolelwa kibalo kya bitompibwa ala ala byamulê mukûdjemba. 7 Bitompanwa bisile kibalo bya kûtompa lwêtabêsho lwenyu. No nolo gine kwana gyakoneka, gyakûtompwa kwakaya. Antû ange no lwêtabêsho lwenyu kwana lwa kitûngo kûlêmba nolo, lûyenene lûtompibwe lûmone kûba lûsoga ao samutambûle ntumbo no bûtûmbê nobûnyeme sigi lilya Yesû Kilisitu alêkaûtûlwa. 8 Benywe mwibamukampwe, nanso hamwalimumone, no mwamwitabêsha, nanso hamwalimumone onka. Nansho mwalogelelwa kwamulogo gûlûmbûlûke gûshakûtegeleseke, 9 Kibalo mwatambûla lûhandêlo lwenyu lwa mutêma, kwana kûkampwa kwalwêtabêsho lwenyu.

10 Bamoni baeleleshe no kûlwelekekya kibalo kyalûhandêlo lûlo, balagwêle kibalo kyabûntû bûbo kwana benywe mwaswakûebwa. 11 Batompile kûmanya byaba kêê no bûlule kêe bikalongeka bilya bisambile mutêma gwa Kilisitu; kibalo gûgo mutêma gûbele munda gyabo, ûlagwêle masûsû gekamumona Kilistu no ntûmbo gikamulonda. 12 Kabesha Mpûngû wêbaûtwêle kwana gûlya musahû gwabaelwe hagûbele kibalo kyabo, mone kibalo kyenyu. Gûlya musahû gwamusawelwe no basauli ba mwanda gûsoga kwa bûkome bwa Mutêma Gûlûmbulûke guimine mwigûlû. Gûgo musahû ba masalagûlû bakampilwe kwigûsingûlûla.

Lwêto lwa kwêkena ngikeno gilûmbûlûke

13 Kwanansho, mube djambûla mbeela no kûkelwa. Mubêke lûkûdjagêlo lwenyu lonse mukyabûntû kilya kyamulê kaebwa kyaba Yesû Kilisitu enekamoneka. 14 Nagwe baana ba Kabesha Mpûngû bakokele, namuketabêsha mbeela kûlonda ntêma gibê, gya mubele nagyo kyaba kya mubele babidje. 15 Nambo mwibayenene kûba balûmbûlûke mungêlo gyenyu gyonse, nagwe nansilya gûlya wimitile byalê mulûmbûlûke. 16 ✝ Lusinto lwalisamba: "Mube balûmbûlûke kwa kûba nene byandê mulûmbûlûke."

17 Kibalo mwamwita Tata, gee wakumuwa bûkalabale muntû gense kûlondana no bilongwa byage kûbûla bûkampêlêlwe. Mutambe kwa mwenyo gwa kumwitabêsha Kabesha Mpûngû kyaba kyenyu kya kwêkana ano akandje nagwe baika. 18 Mwidjê kwana benywe mwandimbwe mungêlo gyenyu gisigiyenene kwana mutambwêle kuima kû batata nkûlû benyu, 19 nambo kwa masi ga kitûngo ga Kilisitu, wiiminie nagwe mwana mukoko gusi no bûlema no bala. 20 Gee ûbele musolwelwe no Kabesha Mpûngû mbelê gya kandje kûhangwa, hûû twêlwe masigi gaga ga nfulo kibalo kyenyu. 21 Kwa ndjêla gyage mwamwitabêsha Kabesha Mpûngû, umushulile kuima kûbaki nokumua ntumbo; nansho lwêtabêsho no lûkûdjagêlo lwenyu lwê kwa Kabesha Mpûngû.

22 Mwalimunkya kwa kûkokela sitê, mumone kûkampanwa kwasitê nagwe balûnda. Nfulo mukampanwe benye kwa benye kwa mutêma gûsoga. 23 Mwanda gwa Kabesha Mpûngû gwalimilonga mubyalwe kûya. No gûlya mwanda hagwe nagwe nindje gya kûkya, kweno bûkome, hagwa kûkya gwa kûgêlêlêla 24 ✝Ntê lusinto byalûlê lwêsambe:

"Muntû gense wênagwe maani,

No ntûmbo gyage gyonse ginagwe lûba lwamaani.

Maani gaûmba, no lûba lwa kûnkûka

25 Kûwa mwanda gwa Kolo gûgêlêlêle miaka."

Mwanda gûsoga gwamusawêlwe.