1 ✝No bene benywe baana bakasi, mwibêke ansê gyakitenta kya balûme benyu, kûba nagwe balya baana balûme bonse basibetabêshe mwanda gwa Kabesha Mpûngû, bamone kwêtabêsha kwêtêla ngêlo gyenyu. Hakisokûba kiyenene kwamulê kwêsamba mwanda, 2 kwana bekamona ngêlo gyenyu byagilê gisogo nansilya byamulê bebakokele. 3 ✝Mukwêlengûla kwenyu nakukabi kwa andje, nagwe nansilya muswelo gwa kûotwa nywene, kwêlengûla kwa bintû byanolo, no bishandê bisoga. 4 Mone, kwêlengûla kwenyu kûbe kwa munda bûsoga busi koneka, bwa mutêma gûkokele, no gwa kwêtûkêsha, kwana kyakitûngo kikata mbelê gya Kabesha Mpûngû. 5 Ûbyo kala baana bakasi byabelêngwêle bamukûjagêle Kabesha Mpûngû bebikile kûnsê gya kitenta kyabalûme babo. 6 ✝Sala kwalûkêndê umukokele Bulaimu; nokumwita gee mulûme wane. Benywe amwibyonka basike bage kwakûlonga bisoga kûbûla kûtûdjûka ntûdjûlo gyogyonse.

7 ✝No byonka nansho no benywe balûme mwikane no bakasi benyu kwa lweni. No kwêbamanya nagwe bantû bakême, mwibalongele kwabûnyeme, kibalo nobo bekatambûla amo nenyu kya bûntû kya bûkome, kyalimiele Kabesha Mpûngû. Benywe kûlonga nansho hakûkabi bikukasi mu milombelo gyenyu.

8 Nfulo nanisamba nansino: mwibayenene kûba no mutêma gûmo no maninga gamo; mwibayenene mûkampanwee nagwe balûnda, mube no buntû betûkêshe benywe kwa benywe. 9 Namukebwêlêlêsha bantû bûbê kwa bûbê; no malûmbû kwa malûmbû, mone mwibesêle malyese, kibalo ûkya mwitilwe mumone kûbêkala malyese. 10 ✝Monka mwisambêle lusinto lûlûmbûlûke:

"Wakûkeba kûlogelelwa ngikeno

No kûmona masigi ga ndoge,

Esibêle nekesambi bibê,

Elegye kwêsamba bumpi.

11 Elegye no bûbê alonge bisoga;

Akebe angalê no kwikikwatêsha.

12 Kwakûba meso ga Kolo gakûlwegelela bantû beno sitê

No matwê gage gakûtegelela milombelo gabo;

Mone wakwêbaha kinghimba bantû bangonono bibê."

13 Nani wêkanyonghona kwêmiûgenia benywe ntê mwino mukanka gwakûlonga bisoga? 14 ✝Mone ntê kyalimiyenena kûdjemba, kibalo mwakûlonga bisoga, Mwino lyese, namukebatudjuki bantû bobonse, nonamuketabêsha kûbêkwa munganingani. 15 Mone mumutûmbêke Kilisitu nagwe ni Kolo mumitêma gyenyu, Mube djambûla kumuêndûla gegense. Wêkemibûsha kibalo kyalûkûdjagêlo lwêmunda gyenyu, 16 mone mulonge nansho kwabûkokele no bûnyeme. Mube no maninga gasoga, kibalo amwakûtûkwa balya bakwêsamba bibê kibalo kya ngikeno gyenyu gisoga, mwanda mwakwêlûbûlûla nagwe Kilisitu, nobo bekamona nsoni. 17 Kiyenene kûdjemba kibalo kyakûlonga bisoga, nagwe kiswa mutêma gwa Kabesha Mpûngû, kûlêmba kûdjemba kibalo kya kulonga bûbê. 18 Kibalo Kilisitu mwine ûdjembile lûkwe lûmo ya kibalo kya bûbê bwenyu, muntû wêno sitê kibalo kya basi no sitê mwanda ebasishe kwê Kabesha Mpûngû. Wêyagilwe kumubêlê, mone ulongilwe poo kimutêma 19 No kwa bûkome bwa Mutêma gûgo, ûgêle kûsahûla mitêma gibele mu kikûtû. 20 ✝Babo ûbobalya babengile kumukokela Kabesha Mpûngû alibaempele kwabûtekabadje masigi galya Noa lwabele wahanga bwatoo. Munda gya bwatoo bûbo bantû basho mpee kwana bantû muganda bahandile lwa madjê, 21 kwana kabandêlêlo ka lûbatisho lwa kwimiandia benywe onka. Lûbatisho hamalêngê gakusindûla biiko byamubêlê, mone lwakwêtabêsha lwêto lwa Kabesha Mpûngû lwa kûlongeka maninga gasoga mwibahandie kwa ndjêla gya kûshûka kwa Yesu Kilisitu, 22 kwana ûgêle mwigûlû nonka wiki mugela gwakûlûme kwa Kabesha Mpûngû, wabêkala egûlû lya masalagûlû no babêkali bonse no bûkome bwa egûlû.