1 Nani mibangêla baleli bemubûkata bwenyu. Nene muleli nenyu. Nsitêkêkye masûsû ga Kilisitu. Byonka nikaba muntumbo gikaimina. 2 ✝Mwikiempe kilya kibûngo kya Kabesha Mpûngû kyamuelwe, mwikiempe hakwa kûkankamikwa, nambo kwa kiswa mutêma monka mwalê mukampêlwe Kabesha Mpûngû. Mulonge mingêlo gigyo hakwa ntêma gya lûheto, nambo kwa mutêma gwenyu gonse, 3 namukakebi kûbekala kwa buumu kikyo kibungo, kilya kikunsê gya bûlwegeleli bwenyu, nambo mube lûkêndê lwa kikyo kibûngo. 4 No kyaba muleli mukûlû enekaimina, benywe mwakatambûla nkata gya ntûmbo, gisi giite.

5 ✝Byonka nansho no benywe basongwa mwibayenene kwêbêka ansê gyakitenta kya baleli benyu. Benywe bonse mwibayenene kûba no kikokesi benywe kwa benywe, mumone kwêngêlana; kibalo lusinto lûlûmbûlûke lwalisamba: "Kabesha Mpûngû ekûnkampwa bantû beno kahûni, mone walibatûngêla kya bûntû betûkêshe." 6 ✝Nfulo, mwitûkêshe benywe bene, kûnsê gya kûboko kwa bûkome bwa Kabesha Mpûngû, kûba emiseshe kyaba kiyenene. 7 Mumu tûlêle mudjembo genyu gonse , kibalo gee walimitemba.

8 Mube meso, mukelwe! Kibalo mangi gyenyu Lyabola wa kwalagala kwa mulê, omwe na ntambwe gya kukundula, gyakûkeba naani washa tankinye. 9 Mumwakanie kwa kûba nsûnga mulwêtabêsho, amwamanya kwana balûnda nenyu bonse mukandje bamonwa no mudjembo gonka gûgo. 10 Mudjembo gwenyu shagûbe gwa kyaba kisho. Mone Kabesha Mpûngû mwitûkampwe mbeela, walimiita mube mubûmo bwantumbo gyage mukûkwatana no Kilisitu. No wêkemilonga balûmbûlûke, beno buumu no kwimimika nsûnga abekemigwêsha byonka. 11 Bûkome bwêbwêlêle kwage miaka no miaka! Amina.

12 Nanimisintêla lûpapûlo lûno lwêhê kwa bûkwasi bwa Silifano, mwanetû mulûmbûlûke, nanonga kibalo kya kwimia mutêma no kusitêkêkya kwana kino ûkyabûntû kya sitê kya Kabesha Mpûngû kyamwa kwatana nakyo.

13 ✝ Kiwêlo kikû Babiloni kyalimimuna. Kabesha Mpûngû wê basolwele nagwe benywe, byonka nansilya mwanane Maluko noge walimimuna. 14 Mwigimunene benywe kwa benywe kwa bûkampwe bwa Kilisitu.

No talala nyaa libe nenyu benywe bonse bemu Kilisitu.