1 Sigi limo Yesû ûbele hantû amo mukûlomba, lwabidjile kûlomba, gûmo mu baana babûganga bage umulombwele: "Kolo, wêtûlange kûlomba, na gwe ni Yoano mubatisha byelangile baana babûganga bage."

2 Yesû wêbalombwele: "Kyaba kyamulê mukûlomba, mwisambe nansino:

‘Tata wêtû:

Sina lyobe litûmbêkwe,

Bûkolo bobe bûshe,

3 Wêtûwe mbeela kyakûlya kyetû. Kya masigi gonse.

4 Wêtûlekelele bûbê bwetû,

Nagwe nansilya byatûlê mukwêbalekelela balya bakwêtûlongele bibê.

No ketubiki mubitompanwa.’"

5 Kûwa Yesû wêbalombwele, "Nani abûkata bwenyu ûgêle kwê mulûnda mandê ga busigi, umulombwele: ‘Mulûnda, nsendeke kyakûlya, 6 Kwakûba mulûnda nane waêtêla kwane wêmulwendo, no nene silê kyakumuwa.’ 7 No wêmunda gya nsese umwindwêle: ‘Nokanyembya! Nampwa kubigala kilêmba. Nene no banaa bane twawa kûlala, nsinyonghoni kûbyûka nkwabêle kyokyonse.’ 8 Sitê nanimilombola kwana, no ntêê aso kûbyûka amutange kyakûlwa, kibalo gee mulûnda wage, mone kibalo kya kûgêlêlêla kumulomba asaabyûke amutange kyokyonse kyene kûkeba.

9 Kwanansho nanimilombola: Mulombe no benywe musamuebwe; mukebe no benywe musa mumone; mukokole mushango, no benywe musa mubigwêlwe. 10 Kibalo gegense wakûlomba wakûebwa, no gûlya wakûkeba saamone, no wakûkokola mushango saabigwêlwe. 11 "Nani mubûkata bwa tata, nsongwalûme wage kumulomba musha, amutange ndjoka? 12 Nontê wamulomba usi, shamwabêle nkelegendje? 13 Nfulo ntê benywe mwibabê, mwibamanye kwêbaa bana benyu bintû bisoga, sitê Tata wenyu wa mwigûlû salonge biête. Shaebae Mutêma Gûlûmbûlûke balya bakumulomba!"

14 Sigi limo Yesû ûbele waimia minyaga gibê gimulongile muntû gûmo kûba kameme; kyaba gigyo minyaga gibê agimwimine gûlya muntû ûbele kameme, ûnyonghwene kûbanga. No bûngê bwa bantû bwalankene, 15 ✝mone bamo mubukata bwabo besambile: "Waligikûmba minyaga gibê, kûbûnyonghoni bwa Belesebuli, mukûlû wa minyaga gyonse gibe."

16 Bange bamutompile Yesû, bakebile alonge byesha kuima mwigûlû. 17 Mone Yesû ûbele mumanye maninga gabo, wêbalombwele: "Bantû ba bûkolo bobonse bokûlwa bobene kwa bobene, bûkolo bûbo bwêkagwêla, no bantû ba musoo gûmo bokûlwa bobene kwa bobene musoo gûgo gwêkagwêla. 18 Ntê Liabola gee kwêsansûlûla gee mwine, bûbêkali bwage bwêbwêmana ntêê? Nanisamba nansino kibalo benywe mwakwana nankûkûmba minyaga gibê kwabûkome bwa Belisebuli. 19 Ntê nankûkûmba minyaga gibê kwabûkome bwa Belesebuli, bengili benyu bakûkûmba kwabûkome bwani? Kwanansho babo ûbekemia bûkalabale! 20 Mone, ntê nene nankûkûmba minyaga gibê no bûkome bwa munie gwa Kabesha Mpûngû, nfulo, Bûkolo bwa Kabesha Mpûngû bwawa kuika kwamulê.

21 "Kyaba muntû wêno bûkome, mwikwêke byabulwi byage byonse, alêmukûempa nsese gyage bintû byage byonse bimuangalê. 22 Mone kyaba muntû mumulêmbêle buumu, gee kumusûmbêlêla no kumunyonghona, gee shamuswinye bya bulwi byage byonse byalê mukûdjagêle no kwibinsansûlûlûla.

23 ✝"Muntû gegense usi amo nane, maangi gyane; no gegense hûsha kukuminkania amo nane, wasangalêka.

24 "Kyaba munyaga gûbê agwakumuima muntû, gwakûêtaêta kûntû kusi madjê gwakûkeba hantû akwêtûsha, mone akûmona, hûao gwalisamba: ‘Swangibwêlêle mu nsese gyane gyampimine.’ 25 Kyaba kya gwêbwêlêle no kûsangana gilya nsese giyangêlwe no kûlengûlwa. 26 Hûao gûgêle kûtwala minyaga ginge kiloba gibê biiko kûmulêmbela gee, nogyo shagitwele kwêkana mumo. Nansho, ngikeno gya muntû gûlya shagyalabûke kûba gibê kûlêmba ngikeno gitangi."

27 Yesû lwabele walisamba mianda gigyo, mwana mukasi gûmo mukilya kibûngo kya bantû wangwêle djûê likata no kumulombola: "Lyese mwana mukasi gûlya ûkûbyalile no kûkonkya!"

28 Mone Yesû wêndwêle: "Lyese biiko kûbalya bakûtegelela mwanda gwa Kabesha Mpûngû no kwêgûkokela!"

29 ✝Bwêngê bwa bantû abagêlêlêle kubila, Yesû wêbalombwele: "Lûbyalo lûlû lûbyalo lûbê! Lwakeba kabandêlêlo, mone alûso kûebwa nambo kabandêlêlo ka Yona. 30 ✝Kibalo nagwe ni Yona byabele kabandêlêlo kûbantû ba Ninawi, ûbimwana wa Muntû byelêkaba kabandêlêlo kû lûbyalo lûlû. 31 ✝Kolo mwana mukasi wa kahênda kalûngû wêkemana kyaba kya bûkalabale no kwêbaa bûkalabale bantû ba lûbyalo lûlû kwa kûba gee usile kuima nfulo gya kandje kûtegelela ngeni gya Solomomo. No hao emukûlû kûlêmba Solomono. 32 ✝Bantû ba Ninawi bekaimina kyaba kya bûkalabale nobo bekelûwa bûkalabale lûbyalo lûlû kwana lwêno bûbê, kibalo ba Ninawi besasile kibalo kya bûsahuli bwa Yona; no nansi hano eno kintû kikûlû kûlêmba Yona!

33 ✝ "Hakûle muntû wakûkwamia kimuni kyage kwikihuta no kwikibeka munsê gya kibêndê; mone wêkekibêka egûlû lya lwagê, kûba balya bakûtwela mu nsese bamone mugenge. 34 Kyaba liso lyobe alilê poo, mubêlê gobe gonse sagûbe gûdjûlwe mugenge; mone ntê liso lyobe lyokûba litunyike, no mubêlê gobe swa, sagûbe mu mudjo. 35 Ûbe meso, mugenge gwê munda gyobe, na gûkasi gûbe mudjo. 36 Nfulo, ntê mubêlê gobe gonse, gwimumugenge kûbûla kûba no kiba kyokyonse kimudjo, mubêlê gobe gonse gwêkakenka, sitê nagwe nansilya kimuni byakilê mukûkenka kwa mugenge gwage."

37 Yesû lwabele wabanga, Mufalisayo gûmo umukunkile kû kyakûlya mu nsese gyage; Yesû ûgêle kwêkana kumutalako kûlya kyakûlya. 38 Gûdjo Mufalisayo walankene kûmona Yesû walya hakoga kuminie. 39 Hûao Kolo umulombwele: "Benywe Bafalisayo mwakukila lûhêndê no lûbadje andje, mone munda gyenyu mudjûle bûswinania no bûbê. 40 Babidje benywe, hamwidjê kwana ûlongishe bya andje, ûge ulongishe bya munda? 41 Nfulo mwimie milambû gya bilya byamulê nabyo mwibae balanda, no lola, bintû byonse sabibe bimunke kwamulê.

42 ✝ "Mone musibo gwenyu Bafalisayo! Kibalo mwa kumulambwêla Kabesha Mpûngû milambu gya ntobo gya minyanyi, no byakûlya hala hala no miswelo hala hala gya minyani, mone mwahûmbûlûla sitê no bûkampwe bwa Kabesha Mpûngû. Kimiyenene mube bakwatêshe, kûbûla kwêbêlêla binge.

43 "Musibo gwenyu Bafalisayo! Kibalo mwibakampwe kwêkana kûgêbwa antû anyeme mu masese ga milombelo gya Bayuda no kwimunwa kwabûnyeme mwibûlû." 44 "Musibo gwenyu! Kibalo mwinagwe bilêbû bisi no kabandêlêlo, kwana bantû bakûnyanta egûlû lyabyo kûbûla kûmanya."

45 Gûmo wabalangi babisila umulombwele: "Mulangi, ono kwêsamba gigyo mianda walitûtûka."

46 Yesû umuêndwêle: "No benywe balangi babisila, musibo gwenyu, kibalo mwa kwêbatwêka bantû bitûndû binyeme byabasi nyonghoni kûtwala, mone benywe bene hamwakûtûlûla no gwêne munie gûmo kwêbakwasha. 47 "Musibo gwenyu, kwakûba mwakuhimpa bilûbû bya bamoni, kwana batata nkûlû benyu babeyagile. 48 Kwanansho, mwasitêkêkya no kwêtabêsania no bilongwa bya batata nkûlû benyu; kibalo babo bebeyagile bamoni, no benywe mwalibaimpêla bilêbû byabo. 49 Kibalo kya lweni lûlû Kabesha Mpûngû wêsambile nansino: ‘Nikebaêlêla bamoni no bikûla; bekeyaga bange nabo no kwêbadjembya bange.’ 50 Kwanansho lûbyalo lûlû lwêkaebwa bûkalabale kibalo kyamasi ga bamoni bonse gesikile mubambo gwa kandje, 51 ✝kûbamba kwêsêlwa masi ga Ebeli kuhikêla galya ga Sakalia, kwana bamwiyagile abûkata bwa tûdjaba no hantû alûmbûlûke. Sitê, nanimilombola lûbyalo lûlû, lwêkaebwa bûkalabale mu mianda gino gyonse!

52 "Musibo gwenyu benywe Balangi babisila! Kibalo mwabisêka mpûtûlo gya mushango gwa lweni; benywe bene hamwibatwele, mwibasibêle babele batwela na bakatweli."

53 Kyaba Yesû kyaimine kûko kû nsese gya gûlya Mufalisayo no Balangi babisila babambile kumusûmbêlêla bikole no kûmubûsha mianda gingê, 54 kûba bamone kumukwata kwa mianda gyage.