1 Kûwa kibûngo kyonse kimene kimuilile Yesû kwi Pilato, 2 Nobo babambile kumusongela Yesû: "Nokumulombola Pilato twamukwata muntû gûdjû ûtompile kwêbabemba bantû ba musoo gwetû, walisamba natûkaimia milambû kwê Kaisali waligita Kilisitu, Mubêkali."

3 Pilato umubulishe Yesû: "Gwee û mubêkali wa Bayuda?"

Yesû wêndwêle: "Gwee ûwalisamba."

4 Kûwa Pilato wêbalombwele bakûlû ba balambwili no bantû: "Simumone bûbê bobonse kwê muntû gûdjû."

5 Mone bagêlêlêle kwêsamba: "Milango gyage gyasomenkania lûma mu Bayuda bonse. Ûbambêle Galilya no ano washa elê ano mu mwalo gonse gwa bayuda."

6 Pilato lwategelele nansho ubulishe: "Muntû gûdjû mu Galilaya?" 7 Kyaba kyasingûlwêle kwana Yesû wêansê gya kitenta kya Mubêkali Helode, umwilile kwê mubêkali Helode, kibalo sigi lilyo ûbele Yelusalema. 8 Kyaba Mubêkali Helode lwamumwene Yesû, ûlogelelwe biiko, kibalo kyaba kila ûbele wategelela mianda giinge kibalo kyage. Ûbele wakeba kukuminkana no Yesû. Helode ûkebile kûmona alonge byesha bibyo ûlwegelele kwana Yesû saalonge kyesha kimo. 9 Mubêkali Helode umubulishe Yesû mianda giingê, mone Yesû hamuêndwêle gogonse. 10 Bakûlû babalambwili no basinti babisila kûgêbwa baiminie nsongesi gyabo kwa bumu biiko. 11 Nfulo, Helode amo no basilêkale bage bamusompwele Yesû no kumumonia nsoni; kûwa bamushikile kishandê kya bûkolo bamwibwêlêshe kwi Pilato. 12 Sigi lilyo Mubêkali Helode no Pilato kwana kûgêbwa babele bamangi; kûbamba sigi lilyo balabukile abe balûnda.

13 Pilato witile kibûngo kya balambwili bakûlû, no bakûlû ba babantû, amo no bantû babo, 14 wêbalombwele: "Mwamusisha muntû gûdjû kwandê mwagana kwana ûbele walibabemba bantû kûlonga bûntomboki. Onka, namubûsha kûgêbwa gyenyu kibalo kya mianda gilya, no nene namona hakûlê mubambo gogonse gwa masongesi genyu kibalo kyage. 15 No ha nene yaa, mone nomwine Mubêkali Helode, hamwene bûbê bobonse. Ukibalo wa mwibwêlêsha kwatûlê, nansilya bya mwamona, muntû gûdjû hamulonge kyokyonse kiyenene masûsû galuki. 16 Nansho shantakêshe aûlwe nswii no mumulekelele."

17 Kwakûba kibele kiyenene kwêbasokwena mukwêkwa gumo kyaba kya sigi likata lya Pasaka

18 Mone bonse batele kaûndû amo: "Musindûle muntû gûdjo! Wêtûsokwene Balaba!" 19 (Balaba ûbele mukwêkwe mukikûtû kibalo kya kûbambya bûntombosi mukibûndê, no kibalo kya kwêyagana.)

20 Pilato ûkebile kumulekelela Yesû, nansho wêsambile nabo byonka. 21 Mone boo batele kahûndû: "Akonkomenwe! Akonkomenwe kumutê gwa mpênga mpêtia!"

22 Pilato wêbabulishe lûkwe lwa bûsatû: "Ûlongile bûbê kê muntû gûdjû? Nsimumone bûbê bobonse bûyenene kumuwa nsambû gya luki! Kwanansho shamwûle nswii no kûwa shamulekelele."

23 Mone boo bagêlêlêle kûta kahûndû kwabumu biiko balombile Yesû akomenenwe ku muntê gwa mpenga mpetia, no nfulo wandilwe kibalo kya mugo gwabo. 24 Kwanansho, Pilato ukalile nsambû kwana kiswa mutêma kyabo kigwanine. 25 Umusokwene Balaba muntû wababele bakampilwe, ûbele mukwikilwe mwanda gwa kusisha bûtomboki no kwêyaga muntû, no kumwimia Yesû kwabalê kibalo bamulongele bya bakampilwe.

26 Basilêkale lwababele bagyata no Yesû, bamukwatile muntû gûmo witilwe Simo, wa nsê gya Kilene, ûbele waima kûmabala. Nfulo, bamukonkeleshe atwale mutê gwa mpênga mpêtia gwa Yesû, no umulondile nghimba.

27 Kibûngo kikata kya bantû kimulondile Yesu; mubûkata bwabo mubelemo baana bakasi babele mukûempûla no mukûlêla. 28 Yesû wêugulukile wêbalombwele: "Benywe ba madjû ba Yelusalema! Namuka ndililili nene, nambo mwilêlêle benywe beene no baana benyu. 29 Kibalo sigi lyakasha kyaba bantû abalê kesamba: ‘Lyese baana bakasi baghumba, kwana nshogyabo hagyalibyale, no mabele gabo hagonkye!’ 30 ✝Kyaba kikyo bekabamba kûlombola Lûgûlû: ‘Lwêtûgwêlêlêle,’ no tûngûlû ‘Twêtûsûwêle!’ 31 Ntêê balonga bilongwa bino kumutêê gûbêsê, bikaba ntê kûgûgo mutêê go kûma?"

32 Babûgwêle bantû bange babêlê bangêla bibê, bakolwe amo no Yesû. 33 Kyaba kyabaikile hantû etilwe: "Kabongosho katwe," ao ûabamukolekile Yesû amo no balya bangibi babêlê, gûmo mugela gwage gwa kûlûme no gûnge mugela gwage gwa kûkasi. 34 ✝Yesû wêsambile: "Tata, wêbakyêle lûsa! kibalo abedjê bya bakûlonga."

Kûwa betangene bishalanwa byage kwa kwêkadjêla bûbale. 35 ✝Bantû babele bemane alya bakûlola nobo bakûlû ba Bayuda bamusompwele, banine: "Ûandishe benge; no ehandie gee mwine, ntê gee û Kilisitu musololwa wa Kabesha Mpûngû!"

36 ✝Basilêkale nobo bamusompwele swa, Bamugêlêle bamuele biênde bibae 37 banine: "Sitê ntê gwee wê mubêkali wa Bayuda, wêhandie gwe mwine!"

38 Byonka nansilya lusinto lûlû lûbele lûbêkwe egûlû lyage: "GÛDJÛ ÛGE MUBEKALI WA BAYUDA."

39 Gûmo wabalya bangibi bakolekilwe kumutê gwa mpênga mpêtia umutukile wêsambile: "Ntê sitê kwana gwee ûge Kilisitu? Nfulo, wêhandie gwemwine wêtûhandie no betwe!"

40 Mone gûlya ngibi gûnge, umukankêle mwinage, wêsambile: "Gwee honokumutûdjûka Kabesha Mpûngû noene asho? Gwee wamona bûkalabale bonka bûbo? 41 Gwee, no nene, twê bayenene, kibalo kano ûkatolwa kabilya bya tûlongile; mone muntû gûdjû hamulonge bûbê bobonse." 42 Kûwa wêsambile ee Yesû, "Ngidjûkane kyaba kyolê katwela mu Bukolo bobe!"

43 Yesû umuêndwêle: "Na kûlombola sitê, lêno shaûbe amo nane kû paladiso."

44,45 ✝Kibele kyaba kya kûikêla meno kenene; kidjo kiutile mukandje konse kuikêla kyaba kya djûba lya ûla malelo, no djûba lilekele kuimia mugenge kikêngo kibele kikolekwe mu Kitotelo kyatikile biba bibêlê. 46 ✝Yesû ulilile kwa djwê likata: "Tata, mumaboko gobe na ningûbêka mutêma gwane!" Lwabidjile kwêsamba nansho wiminie mutêma.

47 Hao gûlya musilêkale lwamwene biimine, umutumbikile Kabesha Mpûngû, wêsambile: "Sitê gûdjû ûbele muntû musoga!"

48 Kyaba bantû bonse babele babûngakane alya kibalo kya bihitile hao, lwabamwene gigyo giitile bebwêlêle kwabo balê mukwêyaya, kwa kininga. 49 ✝Mone balya bonse bamusingûlwele amo no balya baana bakasi, babele bamulonda kuima Galilaya, bemene ala mpe, mukûlola mianda gigyo.

50,51 Nfulo, kûbele muntû gûmo musoga no wasitê sina lyage Yosefu. Gee ûbele kikûla kya kilye kya Bayuda, Mone gee habele mwitabêsanie no nsambû no bilongwa bya bakûlû nage. Gûdjû ûbele mwikani wa kibûndê kya Alimateya mumwalo gwa Bayuda, Noge ûbele waempa no kûlwegelela kûkata Bûkolo bwa Kabesha Mpûngû. 52 Yosefu ûgêle kwi Pilato, ûlombile aebwe mubêlê gwa Yesû. 53 Kûwa wigutukishe mubêlê gûgo kuima kumutê gwa mpênga mpêtia, wiguutile kiûto kisoga, wigubikile mu kilêbû kibele kisongwe kûlwala kwana hakibele kishêkwe muntû gûûnge. 54 Sigi lilyo, libele sigi lya bûtano no bûlongololi bwa sigi lya kwêtûsha libambile.

55 Balya baana bakasi basile no Yesû kuima Galilaya, bamulondile Yosefu bekimwene kilya kilêbû, no mubêlê gwa Yesû monka mwagûbele gûbêkwe. 56 ✝bebwêlêle kwabo, balongishe makita no gaange gaembwe gakusinga luki.

No betulishe sigi lya kwêtûsha, monka mutakisibwe.