1 Yesû wêbalombwele baana babûganga bage: "Kiyenene mianda gya kumutakêsha muntû kûlonga bûbê buimine, mone musibo gwage muntû gûlya wakwibisisha! 2 Kya swakûba kiyenene kwê muntû gûdjo kûkwêkwa bwee likata munkingo lya kûelela no kûtebwa mwisiba kûbûla kumukukasha gûmo wabaanike bano kûlonga bûbê. 3 ✝ Kwanasho mwilame!

"Ntêê mulûnda obe, ge kûkûlongela ubisibyo mulêngêle, no ntê gee kumulêlêla, mulekelele. 4 No ntêê gee kûkûlongela bûbê nghendo kiloba musigi limo, no nghendo kiloba gee kwêbwêlêla kolê no kûnenghena: ‘Nanisasa,’ Kiyenene umulekelele."

5 Bikûla bimulombwele Kolo: "Witubilêshe lwêtabêsho."

6 Noge Kolo wêndwêle: "Lwêtabêsho lwenyu lwalê lûke nagwe ni ndjee gisho gya kilanga, mwaswa kwêgûlombola mutê gûgû gûkata gwa kikûdjû: ‘Tukuka, ûkekune mwisiba!’ Nogo gwaswa kwimikokela.

7 "Twêsambe kwa lûkêndê, gûmo wenyu wêno mwingili kwana wakûlêma ao wakûempa mikoko, Ntêê wagibwêlêla kuima kwêbala shamulombole gûdjo mwingili, bûkêlê ndjûû ûlye kya kûlya? 8 Ûwe! Hamulomboli mbêkêle djambûla kyakûlya: ‘Wêkwêke djambûla kungilêla, Kuikêla anankabidja kûlya no kwêkûbêla; ûao nogwe ûlye no kwêkûbêla?’ 9 Ntêê wakamufwisha gûdjo mwingili, kibalo wagwania byelagêlêlwe? 10 Byonka nansho no benywe kûwa kûlonga byonse byamulagêlêlwe; mwisambe: ‘Betwe twê bengili basi no katolwa, twagwania yaa bilya byatûlagilwe kûlonga.’"

11 Yesû lwabele mukûgya ku Yelusalema, witile kûmbêmbê gya Samalia no Galilaya. 12 Lwabele mukûtwela mu kibûndê kimo bantû kumi beno bûsûngû. Bakuminkene nege bemene kûla 13 Batele bangwêle djwê banine: "Yesu! Mulangi! Wêtûkyêle lûsa!"

14 ✝ Kyaba Yesû lwalibamwene, wêbalombwele, "Mugyate mukelangêshe kwê balambwili."

Lwababele mulwendo bamunkibwe. 15 Gûmo wabo lwamwene kwana wahanda, wêbwêlêle kûno mukumutûmbêka Kabesha Mpûngû, kwa djwê likata. 16 Wêtele ansê kûgêbwa kûmagûlû ga Yesû umutumbikile. Muntû gûdjo ûbele Musamalia. 17 Hûao Yesû ubulishe: "kûbêle bantû kumi bamukibwe, balya abûla be kwêê? 18 Hakûmonekile gûnge wêbwêlêle kumutûmbêka Kabesha Mpûngû nambo ya gûdjû mwika?" 19 Hûao Yesû umulombwele gûdjo muntû: "Gimana gyata, lwêtabêsho lobe lwa kûandia."

20 Kyaba kimo Bafalisayo bamubulishe Yesû Bûkolo bwa Kabesha Mpûngû bwêkasha kyaba kêê. Yesû wêbaêndwêle: "Bûkolo bwa Kabesha Mpûngû abusi kwa kûmoneka hûtû. 21 No kwênghe muntû wêkanyonghona kwêsamba: ‘Bwê ano’ ao ‘Bwê alya’, kibalo Bûkolo bwa Kabesha Mpûngû bwê munda gyenyu."

22 Hûao Yesû wêbalombwele baana bage ba bûganga, "Kyaba kya kasha ûkyamulê kakampwa kûmona sigi limo lya Mwana wa Muntû, mone hamukelimoni. 23 No bantû bekemilombola: ‘Lola wêkûlya’, ao ‘Lola wêano’ Mone benywe namukasemuki kwêbalonda. 24 Kibalo ntê nansilya mugenge gwa nkûba byagilêkaima kimpûlûmpandja no kûkenka kuima mugela gûmo kûgya mugela gûnge, ûbyo byabilê kaba kûmoneka mwana wa Muntû byalêkaba sigi lyage. 25 Mone bêlê, kikamuyenene kûsûsûka biiko mu mianda giingê no kûbengwa no lûbyalo lûlû. 26 ✝Ntêê byalibele sigi lya Nowa ûbyo byalilê kaba mu sigi lyage Mwana wa Muntû. 27 ✝Bantû bagêlêlêle kûlya no kwêkûbêla, kûkwela no kûlobola kuikêla kyaba kilya Nowa lwatwelile mubwato, ntende kalûnga giikile no kwêbatobesha bonse. 28 ✝ "Bikaba nagwe bya kibele kyaba kya Loti, bantû bagêlêlêle kûlya no kwêkûbêla, kûla no kûsha kukuna ndje no kuimpa. 29 Mone sigi lilya Loti lwaimine mu Sodoma kûnokile mbila gya mabwe ga kaya kuima mwigûlû no kwêbatobesha bonse. 30 Byonka nansho, byalilêkaba sigi lilya Mwana wa Muntû alê kaûtwêlwa.

31 ✝ "Sigi lilyo, muntû gense wêkaba egûlû lya nsese gyage, no bintû bibaka munda gya nsese gyage, hakatuki kûtwala bintû byage. Byonka nansho muntû wêkaba kwêbala hakebwilili kû nsese kûtwala kyokyonse. 32 ✝ Mwidjûkane bimukumine mukasi wa Loti! 33 ✝ Gegense wakûkeba kahandya kikûle kyage; shaekisiminie no gegense wakusiminia wêkegiandia. 34 Nanimilombola, sigi lilya busigi, bantû babêlê bekaba balale amo, gûmo wêkatwalwa, no gûnge wêkasingwa. 35 Baana bakasi babêlê bekaba mukûela ngano amo; gûmo wêkatwalwa, no gûûnge wêkasigwa. 36 Baana balûme babêlê bekaba balonga mingêlo amo mwibala, gûmo wêkatwalwa, no gûnge wêkasigwa."

37 Baana ba bûganga bamubulishe Yesû: "Kolo, mianda gino gikalongeka kwê?"

Yesû wêbaêndwêle: "Alya emubêlê gûkye, ûalya ekakuminkana makûbê."