1 Yesû, ûbele mudjûlwe Mutêma Gûlûmbûlûke, wimine mulûdjê Yolodani. Ûlûbûlwêlwe no Mutêma kuika mu kyanya. 2 Kûko ûtompilwe no lyabola masigi makumi gana. Kyaba kikyo kyonse halêle kyo kyonse, no nghimba gya masigi gago ûtegelele ndjala.

3 Lyabola umulombwele, "Ntê gwee wê mwana wa Kabesha Mpûngû, takêsha bwee lili libe mukate."

4 ✝Yesû umuêndwêle, "Lusintwe mulûpapûlo lûlûmbûlûke: ‘Muntû ekani kwa mukate yaa.’"

5 Kûwa lyabola umutwalile umuselishe egûlû, no umulangêshe bûkolo bonse bwa kandje mukyaba kisho. 6 Gûdjo lyabola umulombwele: "Nshakûwe bûkome kibalo kya bûkolo bonse bûbû no bûsoga bwage, Kibalo nimuebwe bibi byonse; no nene nibûnyonghona kumuwa muntû bintû byonse byandêmukampwe. 7 Bibi byonse bikaba bûeta bobe, ntê gwe kûntota."

8 ✝Yesû umuêndwêle: "Bisintwe mu lusinto lûlûmbûlûke: ‘Mutote Kolo Kabesha Mpûngû obe, no kumwingêlêla gee bugima bwage!’"

9 Lyabola umutwalile kuika Yelusalema, ku kilêngo kila kya Kitotelo, umulombwele: "Ntê gwee wê mwana wa Kabesha Mpûngû, wête ansê kuima ano, 10 ✝kibalo kisintwe mulusinto lûlûmbûlûke: ‘Wêkatakêsha Masalagûlû gage kibalo kyobe mwanda gakûempe.’ 11 ✝No byonka: ‘Bekakûtwala mumaboko gabo, nokasi kwikukala kûgûlû kobe kwê bwee.’"

12 ✝Mone Yesû umuêndwêle: "Kisintwe mulusinto lûlûmbûlûke, ‘Nokamutompi Kolo Kabesha Mpûngû obe.’"

13 Kyaba lyabola lwawêle kumutompa Yesû kûndjêla gyonse, umulekele Yesû mu kyaba kiyenene.

14 Kûwa Yesu wêbwêlele kuika Galilaya udjusibwe bûkome bwa Mutêma Gûlûmbûlûke, no mwanda gwage gûgwanine mu mpenga gyonse gya bakuminkani. 15 Noge ûbele walibalanga bantû kûmasese ga milombelo gya Bayuda, utumbikilwe no bantû bonse.

16 Nfulo, Yesû ûgêle Nasaleti, kûntû kwalelilwe, no sigi lya kwêtûsha ûtwelile mu nsese gya milombelo gya Bayuda monka mubelele kidjibisi kyage. Wêmene kûba asome lusinto lûlûmbûlûke kwadjûwê, 17 Noge ûwelwe bûkû lya mumoni Isaya, wiliûtwêle no kûtana antû abale asintwe:

18 ✝ "Mutêma gwa Kolo gwê egûlû lyane,

Kibalo ûnsolwele no kunsiga makita kûba nibaêle balanda musahû gûsoga.

Untumine mbasawêle bakwêkwe bwanaabo,

No bampoki bakaebwa kûmo byonka;

Untumine kwêbahandia bakûmwenenekibwa,

19 No kûtûmbia mwaka

Gwa kyabûntû kya Kolo."

20 Nghimba gya kûsoma, Yesû uhutile lilya bûkû, umuele mwingili, kûwa wêkene; bantû bonse babele mulia mu sense gya milombelo gya Bayuda, bamulwele soo. 21 Hûao ûbambile kwibalombola: "Lûno lusinto lwa gwanina lêno lwamulê mukûtegelela."

22 Bonse babele mumo bamutumbikile biiko, begalagenie mianda gisoga giimine mukania kage. Bebûsenie: "Gûdjû uhusi mwana wa Yosefu?"

23 Yesû wêbalombwele: "Sitê samunombole lûkêndê lûno: ‘Muhundahi, eandie gee mwine,’ byonka samwisambe: ‘Gyonse gya tûtegelele wagilonga kûlya Kapelenaumu, wigilonge swa ano akibûndê kyobe.’ 24 ✝Yesû ûgêlêlêle kwêsamba," Sitê sitê nanimilombola mumoni hekwêtabisibwa mu kibûndê kyage. 25 ✝ "Mone, mutegelele: sitê kûbele no bakyêlwe bangê mu Isilaeli kyaba kya Elia, kyaba kilya gûlû alikwikilwe kwa miaka gisatû no mwesi mutanda; kûbele no ndjala giingê mu mwalo gonse. 26 ✝No nansho Elia hatuminwe no kwêne kwa gûmo wabo, nambo kwa mukyêlwe gûmo wa Selefati, mumwalo gwa Sidona. 27 ✝ no nansho kûbele bantû mu mwalo gwa Isilaeli mu kyaba kya Elisha no kûbele ba bûsûngû bangê. Nansho hakûlê gegense umunkibwe nambo Namani yaa wamu Sulia."

28 Bantû bonse babele musense gya milombelo gya Bayuda, lwabategelele nansho, basumininwe biiko. 29 Bemene bamuiminie andje gya kibûmdê kyabo, kibele kiimpwe egûlû lya Lûgûlû, bamuilile kuikêla ku kilêngo kya Lûgûlû lûlo mwanda bamulundêle mulûonga. 30 Mone Yesû witile mubûkata bwa kibûngo, ûgêle lwege.

31 Kûwa Yesû utukile kûgya Kapelenaumu, mu kibûnde kya Galilaya, ûbele wa libalanga bantû sigi lya kwêtûsha.

32 ✝ Begalagenie biiko kwa milango gyage, kibalo mianda gyage gibele no bûkome. 33 No mugilya nsese gya milombelo gya Bayuda, mubele no muntû ûbele no minyaga gibê, ûtele kahûndû ka kusika matwê wêsambile: 34 "Wênokê netû, gwee Yesû mu Nasaleti? Washa kwêtûtobesha? Nankusingûlûla gwe wini. Gwee umulûmbûlûke wa Kabesha Mpûngû!"

35 Yesû wêgûkankêle gûgo munyaga gûbê, wêsambile "Talala pii ima munda gya muntû gûdjû!" nfulo gûgo munyaga gûbe gumugwilishe gûlya muntû ansê kûgêbwa kwa bantû bonse gumuimine no akumukoma noene asho.

36 Bantû bonse begalagenie: "Ola, mianda gyamuswelo kêê gigi! wigitakêshe minyaga gibe kwa kitenta no bumu nogyo gya muima!" 37 Musahû gwa Yesû gûgwanine kûntû konse mumwalo gûlya.

38 Yesû uimine mu nsese gya milombelo gya Bayuda, ûgele kû nsese gya Simo. Madjû gûmo, muko wa Simo, ûbele no kisûngû kikole; bamulombile amuhandie. 39 Nasho Yesû ûkotamine, no ûkankêle kilya kisûngû, nokyo kimulekele. Lûkwe lûmo gûlya madjû ubyukile, no ûbambile kwêbakebela kya kûlya.

40 Djûba alibele amukasi kilûbê, bantû bamusilêshe Yesû batongi babo halahala; noge ubikile maboko gage kwêgûlû lya gûmo gûmo wabo, nobo baandile bonse. 41 Minyaga gibe gibaimine bantû bangê, nogyo agibele gyaima gitele kahûndû gyanine: "Gwee wê Mwana wa Kabesha Mpûngû!"

Mone Yesû wigikankêle no kwêgilombola nagikesambi, kibalo bamumanyine kwana gee û Kilisitu.

42 Djo lyage akûkendûlûka kwa bûsigi, Yesû ûsemukile kûgyata antû asibele bantû. Bantû bangê babele bamukeba. Lwabamumwene, batompile kumusibêla kûba nakasemuki ababele. 43 Mone Yesû wêbalombwele: "Nimuyenene kusahûla mwanda gûsoga gwa Bûkolo bwa Kabesha Mpûngû mu bibûndê binge swa, ntuminwe mwanda gwa bibyo."

44 Noge ûgêlêlêle kûsahûla mu masese ga milombelo gya Bayuda.