1 Nghimba gya hao, Kolo wêbasolwele baange makumi kiloba no babêlê wêbatumine babêle babêlê mu kibûndê byonse, no hantû onse akampilwe lwendo. 2 ✝Yesû wêbalombwele, "Bimbûlwa bingê, mone bengili ûbake. Kwanansho, mulombe mwine bala, kibalo atume bembuli mwibala lyage. 3 ✝Mubagale! Nanimituma benywe mube nagwe bana bamikoko mubûkata bwa tulambo. 4 ✝Namukatwali mutûngû gwa lûheto, kasiba no bikwabêlo; na mukemuni muntû gegense mu ndjêla. 5 "Kyaba kyamwatwela mu nsese gyogyonse, bêlê mwibemune nansino: ‘Angalê libe mu nsese gino!’ 6 Ntêê kwê bantû bakwêkana mu nsese gigyo, mukampwe angalê; nfulo angalê lyenyu salikane noge, ntê anashio, angalê likemibwêlêlêla. 7 ✝Mwikane mu nsese gikampwe angalê, mulye no kwêkûbêla byobyonse kyabalê kemia kibalo mulongi wa mugêlo muyenene kûhebwa katolwa kage. Namukatundi kuima mu gigi nsese no kûgya kuginge nsese. 8 Kyaba kyamulê mukûgya mukibûndê kyokyonse no bantû kwimikûnka, mulye byakûlya byabalêkemia, 9 muhandie batongi bekane mu nsese gikyo, mwibalombole bantû: ‘Bûkolo bwa Kabesha Mpûngû bwashena kwa mulê.’ 10 ✝Mone benywe kûtwela mukibûndê bo hakwimikûnka, mugye mumienda gyage no mwisambe: 11 ‘Nolwêne lubimbi lwa mumwalo gwenyu lwêtûkwatile kûmagûlû getû, twalilûkûnkûla kwa mulê. Mone mumanye kwana Bûkolo bwa Kabesha Mpûngû bwashena!’ 12 ✝Nanimilombola sitê sigi lilya mwalo gûgo gwêkamona bûkalabale bûkata kûlêmbêla bûlya bwa bantû ba Sodoma.

13 ✝"Musibo gobe Kolasini! Musibo gobe, Betesaida! Bibûndê bibyo byalê bisase kaala, kwakûshala nyambê no kwêgalamuna mu bûto! 14 Mone kikaba kiele biiko kwa Tilo no Sidona, abakaebwa bûkalabale biiko byamulê kaebwa benywe. 15 ✝Nobenywe bantû, ba Kapelenaumu! Mwikatûlûlwa kuika mwigûlû ntêê? Ubisibyo, Mwikatukibwa kûkalûnga nyembo!" 16 ✝* "Gegense wêkemitegelela benywe wantegelela nene; gegense wêkemibenga benywe, wamenga nene; mone wakamenga nene wamubenga gûlya utumine."

17 nghimba balya makumi kiloba no babêlê abebwêlêle babele no mulogo banine: "Kolo, nogine minyaga gibê gyalitûkokela, kibalo kya sina lyobe."

18 Yesû wêbaêndwêle: "Mumwene lyabola kûgwêla lûbêlo kuima mwigûlû nagwe kûlyema kwa nkûba. 19 ✝Mulole nanimia bûkome bwa kunyata ndjoka no nkelegendje, kibalo kya bûkome bonse bwa gûlya mangi, hakûlê kyokyonse kikemialalasha. 20 Mone; namukalogelelwa kibalo minyaga gibê gya limikokela nambo mulogelelwe kibalo masina genyu gasintwa mwigûlû."

21 Kyaba kyonka kilya, Yesû ûlogelelwe kwa bûkome bwa Mutêma Gûlûmbûlûke, wêsambile, "Nankûtûmbêka Tata, Kolo wa gûlû no kandje, kibalo walibabisêka mianda gino beno ngeni no beno lango; nogwe wêbahûtwêle baana bakebake; ûbyo, Tata, kwakûba ûbyo byabikûnengeshe.

22 ✝ "Tata wane wantanga bintû byonse, hakûle mumanye Mwana nambo Tata, no mumunye Tata nambo Mwana, no gegense gûlya kwana Mwana saakampwe kumuhûtwêla."

23 Nfulo Yesû wêbalabûkêle baana babûganga bage ubangile naabo bugima: "Lyese meso gakumona bilya bya mwakûmona benywe! 24 Sitê nanimilombola bamoni no bamakolo bange, bakampilwe kûmona bilya byamulê mukûmona mone habakûmona, no kûtegelela bilya byamwakûtegelela, mone habategelele."

25 ✝Sigi limo mulangi gûmo wabisila wêmene mwanda amutompe Yesû, umubumlishe: "Mulangi, nonge ntêê kûba mone kûyana bûkome bwa miaka?" 26 Yesû umuêndwêle: "Musintwe nte mu bisila bya musa, wategelela ntêê?"

27 ✝ Umwêndwêle, "‘Mukampwe Kolo Kabesha Mpûngû obe kwa kikûlê kyobe kyonse, kwa mutêma gobe gonse, kwa bûkome bobe bonse, no kwa lango lyobe lyonse’; no ‘Mukampwe mukuminkani nobe monka molê mwikampêlwe mwine.’"

28 ✝ "Yesû umulombwele," Bisoga, longa nansho; "Nogwe sowêkane."

29 Mone gûlya mulangi wabisila ûkebile kwêmonia kûba wasitê, umubulishe Yesu: "Mukuminkani nane nani?"

30 Yesû umuêndwêle, wêsambile, "Muntû gûmo utukile kuima Yelusalema kûgya Yeliko, ûsûmbêlêlwe no binyanga nyanga, bamushûlile bishandê, bamuswininie lûheto lwege no kumuhûla bamusigile sabaga abûsho kûkya. 31 Nansi kyonka kikyo kyaba mulambwili gûmo ûbele wahêta mundjela gilya, lwamumwene muntû gûdjo uwitile kûnkondo. 32 Byonka nansho, Mwinalefi gûmo lwaikile antû hao umumwene, witile mugela gûnge. 33 ✝Mone, Musamalia gûmo ûbele mulwendo uwikile alya abele muntû gûlya, noge lwamumwene umukyêlêle lûsa. 34 Umugêlêle umundaile biloho byage, kwakumubêka difai, no makita no kumuomba kiûto; nfulo umubandishe kwêgûlû lya mpûnda gyage, umwilile mu nsese gimo gya bageni no kûmuundaa. 35 Djoo lyage, gûlya Musamalia uhiminie lûmea lûbêlê lwakitûngo umuele gûlya mwine nsese wêsambile: ‘Mundae gûdjû no kyokyonse kyonokengêla nene anankebwêla, nikakûwa.’

36 No Yesû ubulishe: "Mubûkata mwababo basatû, nani ûlangêshe kûba mukuminkani wagûlya ûsûmbêlêlwe no binyanga nyanga?"

37 Gûlya mulangi wabisila umwuêndwêle, "Gûlya umumwenene lûsa."

Huao Yesû umulombwele, "Gyatalobe nogwe ûkalonge byonka nansho."

38 ✝ *Yesû no baana babûganga bage lwabagêlele nolwendo Yesû ûtwelile mu kibûndê kimo, mwana mukasi gûmo witilwe Malata umukunkile kû nsese gyage. 39 Malata ûbele no nkasi byala gyage witilwe Malia, gûdjû wêkene kûbwêhê no Yesû, walituga milango gyage gyabele walisamba. 40 Mone Malata ûbele mulole mianda gyage, nfulo, umwikêle Yesû umulombwele: "Kolo, nansino onokwagamwa kwana nkasi byala gyane wansiga nyembe bugima bwane? Nfulo mulombole ankwashe!"

41 Mone Kolo umuêndwêle, "Malata, Malata, wakûsûsûka no kûdjemba kibalo kya bintû biingê, 42 mone kyakebwa kintû kimo ya kiyenene. Mone Malia wasobola kintû kisoga, kwana hakaswinibwa."