1 Sigi limo lya kwêtûsha, Yesû ûgêle kûlya kyakûlya mu nsese gya mukûlû gûmo wa Bafalisayo no bantû babele hao babele bamulwelekekya. 2 Kûgêbwa kwage Yesû kûbele no muntû gûmo ûbele mutongi wa kûdjûlwa mubêlê. 3 Yesû wêbabulishe Bafalisayo no Balangi babisila: "Kibûba kiyenene hao hakiyenene kûandia muntû sigi lya kwêtûsha?"

4 Mone boo bekene talala. Huao Yesû umukwatile gûdjo mutongi, ûmwandishe, umulekele agye lwege. 5 ✝Kûwa wêbabulishe: "Nani mubukata bwenyu, ntêê mwana wamwana mulûme no nghombe gyage gyokûgwêlêle mubwêna bwa madjê sigi lyakwêtûsha, hanyonghoni kwigiimia lwêndo lûmo?"

6 Nobo habanyonghwene kumuêndûla bûsho lilyo.

7 Yesû lwamwene balya betilwe lwababele balisolwela hantû abûnyeme, wêbalombwele lûkêndê lûlû: 8 ✝"Ntê muntû gee kûkwêta kûbûlûgo, no kekani hantû anyeme, kwêbûba wagitwa weno bûnyeme kûkûlêmba gwee. 9 Ntê benywe kûlonga nansho, gûlya wimitile benywe babêlê shahashe nokûkûlombola: ‘Mutange gûdjû muntû kikanwa kyobe.’ Hao shaûmone nsoni kûgêbwa gyabonse no kwimibwa kûgya kwêkana kunfulo gyabonse. 10 Mone kyaba kyonogitwa kukikwe, gikana hantû asianyeme, kûba mwine enekasha no kukumona, wêkakûtwala no kukûlombole: ‘Mulûnda, gyata hantû anyeme.’ Kwanansho wêkaebwa bunyeme kûgêbwa kwa betilwe benobe bonse. 11 ✝ Kibalo gegense wakwêsesha sha tukibwe no wakwêtûkya shasesibwe." 12 Kûwa Yesû umulombwele gûlya wagitile: "Kyaba kyonokûlonga kikwe kya kûlya kya djûba no kya lêngolo, nokebeti balûnda nobe hûao bambyalwa nobe, no bakuminkani nobe bampeta. Onolonga nansho, nobo bebûnyonghona kûkwêta kwabo, nogwe shaûbe waebwa bilya byolongile, no kûtambûla kya bûntû kyobe. 13 Mone kyaba kyolê mukûlonga kikwe, wêbete balanda, bilema, bisheti, bampoki, 14 nogwe sowêselwe malyese, kibalo baba habanyonghoni kûkûlêpa. Kabesha Mpûngû wêkakûlêpa kyaba bantû basitê abalê kashûka."

15 Gûmo wabalya babele bekane amo amutalako no Yesû, lwetegelele nansho umulombwele Yesû: "Wêno lyese muntû gûlya wêkalya kyakûlya mu Bûkolo bwa Kabesha Mpûngû!"

16 Yesû umuêndwêle: "Muntu gûmo ûlongile kikwe kikata, wetile bantû bangê. 17 Kyaba kya kikwe akigwanine utumine mwingili wage ebalombole balya betilwe: ‘Tûndû bageni bintû byonse bidjambûla!’ 18 Mone bonse, gûmo nghimba gya gûnge, besambile kûlomba lûsa. Mutangi umulombwele mwingili: ‘Nangûla bala, kûêkêla gyate nililole. Nonansho nimuyenene mbagale kwililola; nankûlomba nkyêle lûsa.’ 19 Gûnge wêsambile: ‘Ngulile mahasa gatano ga nghombe gilûme gya kûlêma nagya nigi tompe kûlêma nankûlomba nkyêle lûsa’. 20 No gûnge wêsambile: ‘Nankwela mukasi kwanansho, nsinyoghoni kûsha.’ 21 Kûwa mwingili gûdjo wêbwêlêle kumulombola Kolo wage mwanda gûgo. Gûlya mwine nsese usumininwe, umulagêlêle mwingili wage wêsambile: ‘Gyata bûkêlê mundjêla no kûnkondo gya kibûndê, wêbasishe muno munda balanda, bisheti, bampoki no bilema no wêbatweshe muno.’ 22 Gûlya mwingili umulombwele: ‘Kolo, bilya byondagile nanibilonga mone akwêkana ûakuki.’ 23 "Huao gûlya Kolo umulombwele mwingili wage: ‘Gyata mundjêla ku bibûnde no kûnkondo gya mabala, wêbakonkeleshe bantû batwele, kûba nsese gyane gidjûle. 24 Kibalo nanimilombola hakûlê no mwine gûmo mubalya betilwe wêkatompa kyakûlya kyane.’"

25 Hao bibûngo bingê bibele byatamba amo no Yesû, noge wêbalabûkêle bantû no kwêbalombolo: 26 ✝ "Muntû gegense gekûsha kwane gee akûsikwa tata no madjû, mukasi no baana, mulûnda no nkasibyala gyage; ûbyo, nogiine ngikeno gyage mwine, muntû gûno hanyoghoni kûba mwana wabûganga wane. 27 ✝Muntû usimutwale mutê gwa mpênga mpêtya gwage no kûnonda, hanyoghoni kûba mwana wa bûganga wane. 28 Kibalo nani mubûkata bwenyu kwana gekûkeba kuimpa nsese gila saekane bêlê kûbala bwênge bwa lûheto lwege kûba amanye ntê wêno lûheto lûgwanine kubidja! 29 Ola ubisibyo! Kibalo gee kuimpa mubambo, no nghimba gee kwandwa kubidja nsese gigyo, bantû bonse bakûmona byalê mukûlonga bekamuseka, 30 Banine: ‘Muntû gûdju ûbambile kuimpa! Mone abele no bûkome bwakubidja.’ 31 Hao Kwêmubêkali kêê, wêkagya kûlwa lûgosi no Mubêkali gûnge, ekane bêlê no kuninga ntê swanyonghone, kûba wêno kibûngo kya basilêkale bage elufu kumi, shanyoghone kûlwa no gûlya wakûsha wêno kibûngo kya basilêkale elufu makumi gabêlê? 32 Ntêê wamona hanyoghoni, shaebatume babikûla kûkeba kusisha angalê kyaba Mubêkali gûdjo gûnge ukikûla. 33 Byonka nansho: "Hakûlê no mwine gûmo wenyu wêkaba mwana wa bûganga wane ntê amuleke bintû byonse byalê nabyo.

34 "Mukele gûsoga, mone ntê go kusiminia ntobo gyage, samubekwe kêê gûmone ntobo? 35 Hagûyenene byonka kintû no kwa musenga ao kwa kikûngya, mone bantû bakwêgûta andje.

"Wêno matwêê, gakûtegelela no ategelele!"