1 ✝ Sigi limo basonkya misonko no beno bûbê baangê babûngakene kumutegelela Yesû. 2 Mone Bafalisayo no Balangi babisila, babambile kûtompola no kwêsamba: "Mulole muntû gûdjû! Walibakûnka beno bûbê, no byonka wakûlya nabo." 3 Huao Yesû wêbalombwele lûkêndê lûlû: 4 "Kokûba gûmo wenyu wêno mikoko lûkama, no gee kusiminia gûmo wabo, saûlonge ntê? Saegisige gilya makumi abûla no abûla mu kyanya, no kûgya kwêgûkeba gûlya gusimine kuikêla egûmone. 5 Kyaba kyalê kegûmona, saegûtwale amakombe kwamulogo 6 No kûgya kû nsese. Nfulo wêkebeta balûnda nage no bakuminkani nage amo no kwêbalombola, ‘Mulogelelwe amo nane, kibalo nanigûmona gûlya mukoko gwane gusimine.’ 7 Namilombola kwana, byonka nansho kwêkaba no ndoge mwigûlû kibalo kya wêno bûbe gûmo kumulêlêla, kûlêmbela beno sitêê makumi abûla no abûla bashakûkeba kumulêlêla.

8 "Byonka nansho, mwanamukasi kêê wêno lûmea kumi lwa kitûngo, gee kusimininwa lûmo, ashalonge ntêê? Wêkakwamia kimuni, wêkayangêla nsese, no kwêlûkeba kwa mukanka kuikêla elûmone? 9 No kyaba kyalê kelûmona, wêkebeta balûnda no bakuminkani nage, no kwêsamba: ‘Mulogelelwe amo no nene kibalo nanilûmona lûlya lûmea lwane lwakitûngo lusimine.’ 10 Byonka nansho namilombola, ûbyo byakalogelelwa masalagûlû ga Kabesha Mpûngû kibalo kya wêno bûbê gûmo gee kumulêlêla."

11 Yesû ûgêlêlêle kwêsamba, "Kûbele muntû gûmo ûbele no baana babêlê babana balûme. 12 Gûlya munina umulombwele shage: ‘Tata, ntange bûyana bwane.’ Noge wêbatangile lûheto lwakitûngo lwege. 13 Nghimba gya masigi gasho, gûlya ûkuminkenye bintû byonse byabele nabyo, ûgêle nsêê gya kûla kûko wêngêle lûheto lwege mu nginkeno gibe. 14 Lwabidjile kwêla bintû byonse. Kuimine ndjala gikole mumwalo gûlya, noge ûbambile kûdjemba. 15 Kwanansho ugêle kûlomba mugêlo kwimwine mwalo gûmo, wakûko noge umwilile kwêbala lyage kûlêsha ngûlûbe. 16 Ûkampilwe kûlya byakûlya bibele byalya ngûlûbe, mone hakûbele muntû umuele kintû kyokyonse. 17 Habambile kwisingûlûla, uningile: ‘Mwanda gwakê Tata wane wêno bengili baangê bakûlya biiko, mone nene ano nankûkya no ndjala! 18 Sansemuke no kwêbwêlêla kwê Tata, no kumulombola: ‘Tata, nanonga bûbe kûgêbwa gya gûlû no gwee swaa. 19 Nsimuyenene byonka kwêtwa mwanobe; mbêke kûba nagwe gûmo wabengili bobe.’ 20 Nfulo, ûsemukile wêbwêlêle kwê shage.

"Lwabele ukikûla shage umumwene; kwa mutêma gwa lûsa, umunkukile kwa kumuhûkêla, no kumutomona. 21 Mwana wa mwana mulûme umulombwele: ‘Tata,’ nanongela gûlû bûbê, nogwe swaa. ‘Nsimuyenene kwêtwa mwanobe.’ 22 Mone shage wêbalombwele bengili bage: ‘Bûkêle!’ Musishe kishandê kisoga mumushêke. ‘Mumushêke lûpete kumunie gwage no bikwabêlo kûmagûlû! 23 Musishe kyana kya nghombe ginone no mukisêndje, no tûlogelelwe amo. 24 Kibalo gûdjû mwanene wa mwana mulûme, ûbele mukye, noano gee mugima; ûbele musimine, noanogee wamoneka.’ Babambile kûlonga kikwe.

25 "Kyaba kikyo, gûlya mukûlû ûbele kwêbala. Kyaba kyakwêbwêlêla kwage, lwashabele kûbwehê no nsese, ûtegelele ndjwê lya nghimbo no nghoma gya bantû mukûkenda. 26 Umwitile gûmo wabengili ubulishe, ‘Kwikintû kêê?’ 27 Gûdjo mwingili umuêndwêle: ‘Muninobe wagibwêla kû nsese no shobe wamusêndja mwana wa nghombe ginone, kwa kûba wagibwêlêla kû nsese mugima wêpo.’ 28 Gûlya mwana mukûlû usumininwe biiko, ûbengile kûtwela mu nsese; nfulo, shage wemine andje no kumwisasa atwele mu nsese. 29 Mone gee umuêdwêle shage: ‘Lola, miaka gyonse gyana nkwêlêla, no line sigi limo shalisilûle kisila kyobe, wimumpe kêê? Nomwine mwana wa mbusi gûmo honolimpe nonge kikwe amo no balûnda nane! 30 Mone mwanobe gûdjû ûlele lûheto lobe amo no babûseki, kûsha kwage wamusêndjêla gûlya mwana nghombe munone!’ 31 "Shage umuêndwêle: ‘Mwanane, gwee wêamo nane masigi gonse, no kyonse kyandê nakyo kyobe. 32 Kitûyenene, kûlonga kikwe no kûlogelelwa, kibalo muninobe ûbele mukye, nansi mugima; ûbele musimine, noge wamoneka.’"