As 10 parábolas mais importantes de Jesus

elmθel nusamri eSSaleH

25 utay yekker iyjen seg imuεelmen necceriyεeθ yennes bac e θijerreb: «eyimuεellem, δmette δege bac e θurθe edder diyme?» 26 yer felles yesuwε: «δmette iθeqqar ecceriyεeθ nmuwse? umax δetfesreδ?» 27 yen eryazdiyn: «exs rebbix s ulex elkul derruHex elkul delquδreθ elkul delfekrex elkul, weθexseδ elli yeqrebex emmax i θexseδ imenex.» 28 yennes yesuwε: «edwiyx δuSHiH, eg wahen uture eθedreδ.» 29 yaxi imuεellem necceriyεeθ yexs yessexne imenes elli nette δeSSaleH, yennes yyesuwε: «weδwiyn nette elli yeqrebiyδ?» 30 yer felles yesuwε: «ykan yelle eryaz yeggez seg uwrceliym yeriyHa, eTfent iquδεiyyen, ekkesnes edbeces ewθent, usiyn edjint biyn Hya umuwt. 31 beSSudfe yeθεedde elkahen esyiyn, max i θyezre yebεeδ felles ykemmel teyuriθes. 32 zade iyjen seg ilawiyyen (meεnahe elli yxeddem g elHuwc nrebbi), yeθεedde umax i θyezre, yebεeδ felles yeθεedde f imenes. 33 emme iyjen δsamri δimsafer yeθεedde esyiyn, max i θyezre yesxef felles. 34 yeqreb yetweliys yenγles uwδi decrab f iyyezzimnes yeqnesθen, usiyn iqami f ezzeyeltes yewiθ yelfunduq yelhe essis. 35 elweječe yenzeγ esamri elfiyn, yuwcin yiθbab nelfunduq yennes, <elhe essis, welli δetteδfεeδ δezzayeδ δexettuwce max erewHe.> 36 δ menten seg tlaθaye yeqreb yelli yuDe g ifassen niquδεiyyen?» 37 yer felles imuεellem necceriyεeθ: «elli yesxef felles.» yennes yesuwε: «berre eg emmax i yege.»

4 «δ wiyn essiywem max eyebδe γers myat neεje, eθraHes icθ essisneθ, elyettedjiyc tesεe utesεiyndiyn g elxle yexDem yetHewwem g tiyli elli traH elδetyaf? 5 max etyaf ettiqam f lexθefes unette ferHan, 6 yeδwel yelHuces inabe imeddukeles deljiyrenes yennasen, <eferHeθ iyδi εlexaTer ufiyγ tiliyw elli traH.> 7 sahen exennenne: δeferHen g esme s iyjen ykan δelγaleĎ itab exθer nwefreHensen s tesεe utesεiyn δeSSuwlleH eltesθHeqqiync etabi.

elmθel nwefruwx eDDayeε

11 yen yesuwε: «ykan yelle eryaz γers sen δidrari, 12 yennes emezyen, <uciyδ elbeyiyw edda.> yzunasen elmelxes elkul. 13 beεεeδ liyyam, ilayem efruwx emezyen elli γers elkul, yexDem ytemuwreθ tebεeδ, udiyn iferreθ lefluses menγiyr elHsab. 14 max i yesref elli γers elkul, θemuwretdiyn tewwetteθ elmjaεeθ teqSeH, yebδe meHtaj egget. 15 heδake εlac yexDem δeyexδem γer iyjen seg iyh ntemuwretdiyn, yezent yujimiys bac e yesreH s iHellaf. 16 w ykan yettecθhe eyecbeε seg elxerruwb elli tetten δiys iHellaf, yemenni elyeqqiyl Hette Hed esyuwc. 17 ubeεδ yeδwel yimenes yen, <menyeθ δixeddamen γer dadde ifeTlasen eče, uneč dahen etjafe s eccer. 18 δekre eδuwle ydadde enγes: dadde eγleĎe g elHeq nesme delHeqqex, 19 meεεač ettesθehale eyeθnebiyδ emmi, egiyδ δexeddam γerx.> 20 yekker yeδwel ydaddes. yezri daddes jay seg lebεiyδ, yesxef felles yezzel yetweliys yetHemmel yetkub δiys. 21 yennes memmis, <dadde, eγleĎe g elHeq nesme delHeqqex, wettesθehilac eyeθnabiyδ emmi.> 22 yemenni yen daddes yixeddemnes, <fiyseε, eγδeθ edbac ibehhayen tireDmasθen, tireDmes txaθemt g weDeDes deSSebbaĎ g ukreεes. 23 taγδem eyenduwz eqewwey teγrsemt, usiyn eneč nefreH, 24 εlexaTer memmi wahen ykan yjaf, yedder, w ykan iraH yemmef.> ebδen ferHen. 25 elweqθes memmis emeqqar ykan g ujiymi. max i yeδwel yeqreb seg elHuwc yesl eγenni derqiyS. 26 inabe iyjen seg ixeddamen yenceδt δmette iyelle. 27 yer felles, <enjex yeδwel labas, yeγres daddex eyenduwz eqewwey.> 28 yeθγeccec welyeqqiylec eyaδef. yeffeγes daddes yetmelges bac e yaδef, 29 yennes ydaddes, <utay isukkasene elkul uneč xeδme δiyx, Hette tikkelt wexenniyγ la. yemenni eyθuciyc Hette δebercni iyjen bac e ferHe essis dimeddukeliyw. 30 umax i yrewweH memmiyx wahen elli yferreθ leflusex elkul f telfuwsset, teγreseδ eyenduwz eqewwey!> 31 yer felles daddes, <emmi, cex diyme iyδi welli γeri δegliyx. 32 emme yelzem enefreH εlexaTer enjex wahen ykan yjaf yedder, w ykan iraH yemmef.>»

elmθel nufariysi delli yetlayem g lefluws

9 yen elmθele yleεbaδ kanen γersen eθθiyqeθ g imenensen elli nihnin δeSSuwlleH uHeqren g iddiynni: 10 «sen δiryazen uliyen δezzallen g elHuwc nelqudus, iyjen δefariysi w wissen seg ihelli etleyamen g lefluws. 11 ibed efariysi yezzal weHδes yen, <SeHHiyt ya rebbi! εlexaTer meniyc emleεbaδ iddiynni, iĎemmaεen, eDDullam ezzanyen, ziyγ meniyc emwah elli yetlayem g lefluws. 12 neč etzuwme g elimeθ merθiyn, wessufaγe g elεcer nelli essuδafe δiys elkul.> 13 emme wehelli yetlayem g lefluws ibed yebεeδ weligeddec eyqam tiTTewines lennej, emme ykan yetteddi f iδmernes uyeqqar, <ya rebbi, ereHmiyδ neč δelγaleĎ.> 14 exennenne: wahen elli yetlayem g lefluws, muc efariysiydiyn, yeggez yelHuces yemmeqbel δeSSaleH γer rebbi. εlexaTer elli eyεelle imenes eyeggez, welli eyessuggez imenes eyali.»

elmθel numuγni deliyεazer

19 yen yesuwε: «ykan yelle eryaz δemuγni iraδ g ellerjwan dedbac e γlan uyθeg g imensiywen kul as. 20 w ykan yelle eryaz δeqelliyl ellesmes liyεazer welbeδnes elkule δimqeyyeH, w ykan diyme yettekke f elεaθbeθ nelHuwc numuγnidiyn, 21 uyettecθhe eyecbeε seg elεqab nelmittes, Hette δeyDan kanen ettesδen leHsen g iyyezzimnes. 22 yjaf eqelliyldiyn qament elmleyxaθ yetwali ibrahiym. yjaf emuγni erδment. 23 yqam emuγniydiyn tiTTewines unette yetεane g elεafyeθ, yezer ibrahiym seg lebεiyδ weliyεazer g eljenbes. 24 inabe yen, <edda ibrahiym, ereHmiyδ tezendiyδ eliεazer bac e yeslexs eTTerf nweDeDes yessesqεiyδ ilsiyw, εlexaTer etεaniyγ g elεafyeθe.> 25 yemenni yennes ibrahiym, <esfekker emmi, cex tiwiyeδ elbeyex seg elxiyr g leHyeθex weliyεazer yiwi elbeyes seg elblaye. tayeθ ture yetteθneεεem dahen ucex etεaniδ diyn. 26 wexθer nwahen zade binatne tHuwfret teγreq eliged Hette Hed etyeθεedde esyahen yetwelinnum wesyiyn yetwelinne.> 27 yen emuγni, <exsγex edda ibrahiym ziyγ eθazneδ liyεazer yelHuwc ndadde, 28 bac e ynebbeh f emmeθniyw elxemse bac e lweTTiync Hette ennihnin g elεδabe wahen.> 29 yennes ibrahiym, <γersen muwse dlenbye, edj enneslen.> 30 yen emuγni, <la, edda ibrahiym, emme max esenyexDem iyjen seg inemmitte ture etaben.> 31 yennes ibrahiym, <iδekan ellesseγδenc ymuwse dlenbye, ettebenc Hette max esenyekker iyjen seg inemmitte.>»