1 yexDem yeεquwb uggebriδes leqant elmleyxaθ n rebbi. 2 yen yeεquwb max i nyezre: «wahen δeljiyc n rebbi.» eyendeγ ysemme emxandiyn meHenayem.

3 yezen yeεquwb imersal bac e θesbqen y enjes εiysuw g elqeεεeθ n esεiyr g temuwreθ eduwm,

4 iweSSaθen: «wahen elli δettennem y siydiy εiysuw: exeddemex yeεquwb yeqqar, kane γer laban weqqiyme γers elture. 5 uyeδwel γeri ifunasen diγyal desεi dixeddamen etxeddamin. enniyγ exezne δ wiyn exyen, ya siydiy, bac e θerDiyδ felle.» 6 max i rejεen imersal y yeεquwb ennanes: «nexDem y enjex εiysuw utay g webriδ δeyeddes bac e xyeεreD wiyδes erbεe myat rajel.» 7 yeqleq yeεquwb yukkeδ egget izuwn eljmaεθes elli iyδes desεi difunasen dileγman f sen 8 yen g ules: <iδekan εiysuw yehjem f eljmaεeθ temezwarθ, eljmaεeθ teθθaniθ balek eθerwel.> 9 yen yeεquwb: «ya rebb n dadde ibrahiym derreb n dadde isHaq, ya rebbi elli tenniδiyδ: eδwel yelqeεθex dmidnex uneč exege elxiyr elkul, 10 neč ettesθehilac elxiyr elli θegiδiyθi elkul, eqDeεe esuwf n elurdun welγri kan etteγriθiyw, emme ture yeδwel γeri sent δelferqaθ. 11 menεiyδ seg ifassen n enjew εiysuw, neč ettekkaδe eyeddes exenyenγ elkul, neč delwacun didrari, 12 ucex tenniδiyδ: <neč δege δiyx elxiyr erre idreriyx emerremleθ n iylel elli etmeHsibc.>»

13 yenεes yeεquwb iddiyn diyn, yexθar seg elli γers elhδiyyeθ y enjes εiysuw: 14 miytiyn εenz uεicriyn tiys, miytiyn neεje uεicriyn kebc, 15 dtleθiyn nage essesfaneθ didrarinsneθ derbεiyn begle dεecre δifunasen, εicriyn bhime dεecre δiγyal. 16 yuwcin y ixeddemnes kul Haje weHδes, yennasen: «uyuwreθ ezzeθiyw tedjem elfDe mabiyn kul ecellag ducellag.» 17 yennes y umezwar: «kan yeεreDex enje εiysuw yencδex, <δ wiyn cex, welmani maci, wiwiyn wahen elli ezzeθex?> 18 en, <y uxeddemex yeεquwb, utahen δelhδiyyeθ ysiydiy εiysuw, unette biyδe tayeθ δefrenne.>» 19 yen yeθθani deθθaleθ delli etsuqqen g icellagen elkul: «enneθ sahen Hette δxenyum max exenyeεreD εiysuw, 20 tennem: <tay exeddemex yeεquwb δefrenne zade.>» εlexaTer yenne g ules: «eθerbHe s elhδiyyeθ elli ezzeθiyw, usiyn ereqbe uδmes balek eyyisameH.» 21 texDem elhδiyyeθ ezzeθes, emme nette yense iddiyn uggexyam. 22 yekker g δeggiyδdiyn yawi elwacunes lessent etxeddemines lessent didreriys leHdac, yeqĎeε esuwf n yebbuwq,

23 yiwiθen yεeddaθen esuwf delli γers elkul. 24 yeqqiym yeεquwb weHδes, yemεarex iyδes eryaz elelfjer. 25 max i yezre eryazdiyn elli nette eθyeγliybc, yewwet f elfexδes yemmexleε elmefSel n elfexδes. 26 yen yyeεquwb: «seybiyδ elfjer iεellem.» yennes: «exetseybac kan eθbarxeδ δiyye.» 27 yennes: «max ellesmex?» yennes: «yeεquwb.» 28 yennes: «meεεač ellesmex yeεquwb, emme israYiyl, εlexaTer temεarxeδ drebbi dleεbaδ teγlbetten.» 29 yenceδt yeεquwb: «eθegeδ elmziyyeθ enniyδ f ellesmex.» yennes: «imat tnecδeδ f ellesmiyw?» ibarex δiys diyn. 30 ysemme yeεquwb emxandiyn f eniYiyl, yen «ezriyγ rebbi uwδem yuwδem, wemneεe.» 31 teqqeS tefuwθ max i yeθεedde f eniYiyl unette yetrekkeH seg elfexδes. 32 heδake εlac eltettenc bni israYiyl elεerq n ense elli g elmefSel n elfxeδ εlexaTer eryazdiyn yewweθ elmefSel n yeεquwb g elεerq n ense.