1 teseδ ezzemmeθ bexlaf ezzemmeθ temezwarθ g liyyam n ibrahiym. yexDem isHaq y temuwreθ n ebiymalek, elmlek n ifilesTiyniyyen g ejrar. 2 yeffeγes rebbi yennes: «eθexeDmec y miSr, eεmer g elqeεεeθ elli δexittessexne. 3 eqqiym g elqeεεeθe, uneč δekuwne iyδex uδebarxe δiyx, icex didreriyx δeθuwce elqeεεeθe elkul, emmax i θjulle y daddex ibrahiym. 4 δerre idreriyx egget emiθran n esme ucγasen elqeεεeθe elkul. leεbaδ n eddunyeθ elkul δesθbarxen s idreriyx. 5 εlexaTer ibrahiym yesle edwiyw, yedj elwSeyθiyw delfreyδiyw delqweniniyw.» 6 usah yeεmer isHaq g ejrar. 7 max i θencδen leεbaδ n temuwreθ f liweces yenneyasen: «δweltme.» εlexaTer yukkeδ eyen: «δliweciyw.» yetεilak balek eθenγen f elxeĎres, εlexaTer tkan tebhe egget. 8 max i yeεmer egget diyn, ebiymalek elmlek n ifilesTiyniyyen yTul seg eccebbexes yezer isHaq yettirar dliweces rifqeh. 9 inebaθ yennes: «δliwecex, ecbiyk ziyγ tenniyδ δweltme?» yer felles isHaq: «enniyγ balek ejafe f elxeĎres.» 10 yen ebiymalek: «δme wahen ittegiyδ δiyne? ykan yeshel iyjen seg iryeznenne yumken eyenεes dliwecex, usahen exenttaγeδ eδδemb.» 11 inebbeh ebiymalek leεbaδ elkul yennasen: «elli eylemmes eryaze ziyγ liweces δeyemmenγ.»

12 yezreε isHaq elqeεεeθdiyn, yemjer g usukkesdiyn myat merre elli yezreεθi, εlexaTer rebbi ibarex δiys, 13 yeδwel δemuγni egget yekber eccenes. 14 yeδwel γers esεi difunasen dixeddamen egget. eHsδent ifilesTiyniyyen.

15 yaxi erδmen ifilesTiyniyyen isaqqen elkul elli eHfrenten ixeddamen n daddes ibrahiym g liyyemes, εebbenten s ecal. 16 yen ebiymalek yisHaq: «erHel s γenne εlexaTer teδweleδ eqwanne.» 17 yaxi yeffeγ isHaq esyiyn yenSeb ixyemnes g esuwf n ejrar yeεmer diyn. 18 iεaweδ isHaq yeHfer isaqqen elli emmeHfren g liyyam n daddes ibrahiym welli erδmenten ifilesTiyniyyen beεεeδ ejefis. ysemmaθen emmax i nnisemme daddes. 19 max i Hefren ixeddamen n isHaq g esuwf efen diyn elεiyn n wamen, 20 mεarxen f elles iniylten n ejrar diniylten n isHaq ennen iniylten n ejrar: «emane δegliynne.» yaxi ysemme isHaq esuγ εiseq εlexaTer mεarxen felles. 21 eHfren esuγ xlaf mεarxen felles zade, yaxi ysemmat siTne. (meεnahe elεδaweθ.) 22 iHewwel esyiyn eHfren esuγ xlaf ellemεarxenc felles, yaxi ysemmaθ reHbuwt, yen: «ture yefreH essiyne rebbi yucane emxan uwseε, yelzem enexθer g elqeεεeθ.»

23 esyiyn yuwli ibiyr sebεe, 24 g δeggiyδdiyn yeffeγes rebbi yen: «neč δerreb n daddex ibrahiym, eθukδec, neč iyδex δebarxe δiyx edje idreriyx egget f elxaĎer n elεebδiyw ibrahiym.» 25 yebne isHaq diyn elmeδbeH yeδεu s ellesm n rebbi. yenSeb texyemtes diyn eHfren ixeddemnes esuγ.

26 yesδes ebiymalek seg jrar dimuεewnes eHuzzat dfiykuwl elqayeδ n eljices. 27 yennasen isHaq: «ecbiykum tuseδmiyδ uxenyum tekrehmiyδ eθgellebmiyδ s γerwem?» 28 ennen: «nezre belgde elli erreb iyδex, nen edj eyeδwel mabinatne elHelf wedj enemεaheδ 29 elli exenttegeδ Hette cey, emmax i xnegi kan δelxiyr enseybax menγiyr Hette cey. cex ture ibarex δiyx rebbi.» 30 yeεreD f ellasen isHaq, ečen eswen, 31 elweječe ekkeren bekri eθHalfen meεe beεDhum. iceyyeεθen isHaq, exDmen salmiyn. 32 esses esδen ixeddamen n isHaq ennanes f esuγ elli eHfrent: «nufe amen!» 33 ysemmaθ isHaq cibεe. (meεnahe eθjulli.) heδake εlac yeδwel ellesm n temuwreθ biyr sebεe elwasse.

34 max i yeδwel εiysuw γers erbεiyn sne yuγe yehuwdiyt yelliys n biyri eHeθθi yaγ xlaf besme yelliys n iluwn eHeθθiy, 35 neγγesneθ elεiyceθ n isHaq drifqe.