1 beεδ iθεedden εamiyn y ettirjiyθ ferεuwn elli nette ibed f eccafeθ n wesuwf n enniyl. 2 utay sebεe ettifunasin bhaneθ weqwaneθ uliyneθ seg wesuwf ebδaneθ retteεneθ g weγniym. 3 welbeεδ yezre sebεe ettifunasin xlaf uHecneθ weDεaf egget uliyneθ seg wesuwf welbeεδ bedneθ g eljneb n timezwarin. 4 ečneθ tifunasin timuwHac essebεe elli Dεaf tifunasin tibehhayin essebεe elli qwaneθ welbeεδ yekker ferεuwn. 5 iεaweδ ferεuwn yenεes yettirjiyθ elmerreθ xlaf elli sebεe ettiyeδrin effeγneθ s iyjen n eljδer (n elεerq) unihenti εebbaneθ egget. 6 welbeεδ yezre sebεe ettiyeδrin xlaf eqquwrneθ seg waDu n wecihiyli effeγneθ δeffer timezwarindiyn. 7 ebleεneθ tiyeδrin essebεe elli eqquwrneθ tiyeδrin essebεe elli εebbaneθ, yekker ferεuwn yefhem elli tkan ettirjiyθ. 8 max i θeffeγ talji yekker ferεuwn unette δimjehhem seg elli yejrayes δeggiyδ. yeg sahen, yazen yuwγeδ iseHHaren diqerrayen n temuwreθ elkul. yeHkeyasen δmat iyettirjiyθ δeggiyδ yemenni Hette iyjen iged yefhem tirjiyθ n ferεuwn. 9 elweqθes yenne errayes n essuqqay yferεuwn: «asse esfekkre elγelTiyw. 10 elweqθelli yeθγeccec siydiy ferεuwn felle neč derrayes n ixebbazen, yeg sah, iHuTTane g elHebs n errayes n iεessasen. 11 yezre kul iyjen essiyne tirjiyθ g icθ n elliyleθ, ukul tirjiyθ γers elmeεnas. 12 ykan iyδne eεezri δεibraniy, δexeddam n errayes n iεessasen. yeHkayes kul iyjen f terjiθes, ifesrenexθent kul iyjen max i syenne. 13 welli yenneyane felles ySar. yerrayi siydiy ferεuwn y elxeδmtiyw yemenni wissen yuyelti f weγru yenγi.»

14 yazen ferεuwn δeseddaγen yuwsef. eγδenti s elHebs fiyseε fiyseε. beεδ iHejjem ixfes duδmes yireD edbac xlaf, yuwδef ibed ezzaθ n ferεuwn. 15 yenne ferεuwn y yuwsef: «ezriyγ δeggiyδ tirjiyθ weHebbac δ wiyn yefhemt. neč esliyγ fellex elli cexdiyn etgeddeδ etfesreδ tirjiyθin.» 16 yerre yuwsef efferεuwn yennayes: «neč ellessinexc. wahen seg rebbi, nette δexyen f mat iθexseδ.» 17 yenne ferεuwn y yuwsef: «ezriyγ imeniyw g terjiθ bedde g eccafeθ n wesuwf n enniyl. 18 usebεe ettifunasin bhaneθ weqwaneθ uliyneθ seg wesuwf ebδaneθ retteεneθ. 19 usebεe ettifunasin xlaf uHecneθ weDεaf uliyneθ seg wesuwf δeffer timezwarindiyn. neč ellezrixc xlaf tifunasin uHecneθ emnihenti g elqeεεeθ nmiSr elkul. 20 ečneθ tifunasin timuwHac essebεe elli Dεaf tifunasin tibehhayin essebεe elli qwaneθ. 21 yemenni eqqiymneθ eqquwrneθ s etεef kunc εliyhum entečiync. yeqqiym errehĎensneθ yuwHec max i ykan. elweqθes ekkere s unuddem. 22 welbeεδ ezriyγ g terjiθiyw elli sebεe ettiyeδrin bhaneθ uεebbaneθ effeγneθ s iyjen n eljδer. 23 usebεe ettiyeδrin xlaf eqquwrneθ seg waDu n wecihiyli effeγneθ δeffer timezwarin. 24 ebleεneθ tiyeδrin timuwHac elli eqquwrneθ tiyeδrin tibehhayin elli εebbaneθ. enniyγ y iseHHaren f terjiθiyw, yemenni weHebbac δ wiyn ifesriyt.»

25 yenne yuwsef y ferεuwn: «tirjiyθin n ferεuwn nihenti icθ n tirjiyθ. urebbi ysexn yferεuwn δmat iyenwe δayeg. 26 tifunasin essebεe elli bhaneθ nihenti sebεe sniyn utiyeδrin essebεe elli bhaneθ nihenti zade sebεe sniyn n eSSabeθ. tirjiyθin essentiyn nihenti icθ n terjiθ. 27 tifunasin essebεe timuwHac elli uliyneθ δeffer timezwarin nihenti sebεe sniyn. usebεe tiyeδrin θelfuwrraγ elli eqquwrneθ seg waDu n eccerq nihenti zade sebεe sniyn n ezzemmeθ. 28 usah rebbi ysexnex δmat δayeg max i xenniyγ. 29 f elqeεεeθ n miSr elkul δeddesen sebεe sniyn δiysen eSSabeθ ettemeqqarθ. 30 welbeεδ eddasneθ sebεe sniyn n ezzemmeθ. esetwen leεbaδ g eSSabeθ elli zrinteθ g miSr lexaTer ezzemmeθ δeθefreδ elqeεεeθ usinc ettedj teqquwr. 31 uleεbaδ etwen liyyameθ n eSSabeθ lexaTer ezzemmeθ δettes teqwe egget f temuwreθ. 32 ucex tezriyδ tirjiyθ merθiyn lexaTer rebbi δayeg qriyb δmat iyenwe. 33 uture, enzi eryaz δelεaqel uyessen etHuTTeδ f miSr. 34 tHuTTeδ elHukkam f elqeεεeθ n miSr elkul, elemδen elxmus n eSSabeθ g sebεe sniyn imezwaren. 35 ennasen elemδen eče n sebεe sniyn δeSSabeθ, usinc exeznen iyrδen delmuwneθ y leεbaδ, welbeεδ eθeHrzen g timuwre seddu ifassen n ferεuwn. 36 usinc eθegem ečaye wahen δelmuwneθ y sebεe sniyn n ezzemmeθ elli δewwin elqeεεeθ n miSr bac θemuwreθ etmettiyc.»

37 yezre ferεuwn dixeddemnes elli edwi n yuwsef yebhe. 38 yenneyasen ferεuwn: «n etgeddec anef eryaz δiys erruwH n rebbi emwah.» 39 yenne ferεuwn y yuwsef: «beεδ ixyuwce rebbi elqreyeθe elkul, eHebbec δ wiyn δelεaqel uyessen emcex. 40 neč δexege δewkiyl f elqeSriyw usinc edje leεbaδ n miSr elkul eδuyuwren δeffer tufleyθex. uneč meniyc xirex kan s elkursiye emeqqar.» 41 welbeεδ yenne f erεuwn y yuwsef: «taye δexHuTTe δelHakem f elqeεεeθ n miSr elkul.» 42 yekkes ferεuwn elxusθes n elHkum seg weDeDes, yegi g waDeD n yuwsef. yirDes edbac s tekettent tebhe yeyles tesemsmiθ n uwreγ f elεunqes. 43 yserkebθi f eθkerrittes teθθaniθ welbeεδ inabe f iεessesnes yenneyasen: «erkεeθ y yuwsef!» usah yegi δelHakem f elqeεεeθ n miSr elkul. 44 yenne ferεuwn y yuwsef: «neč δferεuwn uδeqqiyme δferεuwn. yemenni eHebbec δ wiyn δeyufley beεδex g elqeεεeθ n miSr elkul.» ubeεεeδ yeδwel yuwsef δelHakem f miSr elkul. 45 ysemme ferεuwn yuwsef <Sefnat feεniyH>. yaγes <esnat> yelliys n fuwTiyfariε elkahen ennuwn. 46 max i yiweD yuwsef tleθiyn εam, ibed ezzaθ n ferεuwn elHakem n miSr. welbeεδ yeffeγ yuwsef yemreq yθenneD ynedzi g temuwreθ n miSr elkul. 47 tuγeδ elqeεεeθ g sebεe sniyn imezwaren eSSabeθ ettemeqqarθ. 48 ilemmeδ yuwsef eSSabeθ n sebεe sniyn s elqeεεeθ n miSr yexzent δeče seg ijiyman elli enneDen s timuwre elkul. 49 yexzen yuwsef iyrδen egget emerremleθ n iylel elmi yeδwel litgeddec etyeHseb.

50 tiru esnat liwec n yuwsef sen δidrari qebl eyaδef esukkes emezwar n ezzemmeθ. 51 ysemme yuwsef memmis emenzu <menesse> εlexaTer yenne: «ysetwi rebbi g etteεbiyw elkul dleεbaδ n elHuwc n dadde.» 52 yemenni eθθani ysemmaθi <ifrayim> lexaTer yenne: «rebbi yucayiyδ idrari g temuwreθ zriyγ δiys etεeb egget.» 53 welbeεδ uqan sebεe sniyn n eSSabeθ elli tuseδ g elqeεεeθ n miSr. 54 eseδneθ sebεe sniyn n ezzemmeθ max i yenne yuwsef, elweqθes yewweθ elez timuwre elkul kan δelqeεεeθ n miSr, esyexliyδc eleze wahen lexaTer ykan δiys eče yemmexzen. 55 max i θewweθ ezzemmeθ elqeεεeθ n miSr elkul ebδen leεbaδ zeggen efferεuwn eqqarnes: «uwcane eγrum!» yenneyasen ferεuwn: «emerqeθ y yuwsef welli exenyen egemt.» 56 terni ezzemmeθ teθqewwe g elqeεεeθ n miSr elkul. elweqθes imiyr yuwsef elmxazen yebδe yezzenze gweče y leεbaδ n miSr. 57 usiynd leεbaδ seg elblayeS elkul bac e sγen iyrδen seg yuwsef lexaTer leεbaδ ellufinc δmat δečen.