1 welbeεδ ykemmel yeεquwb teyuriθes eδeyaweδ elqeεεeθ n leεbaδ elli εemren g eccerq. 2 max i yerqeb yezre anu g ujiymi enneDen felles tlaθe δicellagen n esεi. esεi ykan ises g wanudiyn elli yemmemsel s eθγaγet temeqqarθ. 3 max emlaymen icellagen elkul diyn, ebeεδen iniylten tγaγet seg iymi n wanu, esseswen esεi usiyn etterren uggemxenes. 4 yenceδten yeεquwb: «s meniys xenyum eyemmeθniyw?» erren felles: «seg Haran.» 5 yenceδten: «tessenem laban memmis ennaHuwr?» erren felles: «n essent.» 6 yenceδten: «nette labas?» erren felles: «labas, tay raHiyl yelliys jayye s esεiys.» 7 yennasen: «as elyuwc δiTwiyl, wesεi elyuwc yettemleyiymc ture, essesweθ esεi tewyemt eyerθeε.» 8 ennen: «enged enessesw esεi kan max emlaymen elkul enbeεεeδ tγaγet seg iymi n wanu.» 9 elweqθelli ykan yHekke iyδsen tuseδ raHiyl s esεi n daddes εlexaTer tkan teniyltiθ. 10 max i tyezre yeεquwb s esεi n xalis, izewweδ ibeεεeδ tγaγet seg iymi n wanu yessesw esεi. 11 welbeεδ ikub yeεquwb raHiyl yqam s uεeyyeĎ, 12 yennes elli nette yeqreb ydaddes welli nette δmemmis n rifqeh. tezzel tennes y daddes. 13 max i yesle laban elli yeεquwb memmis n weltmas yuseδ, yezzel bac e θyeεreD. yeγemmerθ ikubbi yewiθ y elHuces. yeHke yeεquwb ylaban elli yejre elkul, 14 yennes laban: «mbelHeq, cex seg exsumiyw diδemniyw.» yeqqiym yeεquwb γers eyyuwr.

15 usiyn yennayes laban y yeεquwb: «εlexaTer teqrebδiyδ, eyθexδmeδ blac? enniyδ menyeθ tejernetex.» 16 laban kanneθ γers sent ettifrax, temeqqarθ ellesmes leyye utemezyent raHiyl. 17 leyye tkan tiTTewines δεefnet, emme raHiyl tkan tebhe egget. 18 yexs yeεquwb raHiyl, yennes y laban: «exexδme sebεe sniyn tucδiyδ yelliyx temezyent raHiyl.» 19 yennes laban: «etteγeδ cex, xiyr n elγirex. eqqiym iyδi.» 20 yexδem yeεquwb sebεe sniyn bac e yeγ raHiyl, kanen δruws εlexaTer ykan yexs raHiyl.

21 ubeεδ yennes yeεquwb y laban: «sebεe sniyn kmelen uciyδ raHiyl etteγe.» 22 ilayem laban leεbaδ n haran elkul y egasen emensi, 23 g elmeγreb yuγeδ leyye g elεuwD n raHiyl yuciθ y yeεquwb yaδef essis. 24 yuwces laban texeddemtes zilfeh y yelliys leyye bac e θeδwel ettexeddamt γers. 25 max i θuwli tefuwθ tay ifaq yeεquwb elli netteθ δleyye, yennes y laban: «δmette wah ittegiyδ δiyye? xδemγex bac e yθuwceδ raHiyl, SHiyH? imette iyθexδεeδ?» 26 y er felles laban: «muc g eSSebrenne temezyent aθeγ qebl temeqqarθ. 27 kemmel esbuwε n leyye usiyn axneγ raHiyl zade kan texδemdiyδ sebεe sniyn xlaf.» 28 yeqbel yeεquwb ykemmel esbuwε n leyye, yuwces laban yelliys raHiyl temeTTuwθ xlaf. 29 yuwc laban texeddemtes belheh yyelliys raHiyl bac e θeδwel ettexeddamt γers. 30 yaδef yeεquwb s raHiyl zade yexsiθ exθer n leyye. yexδem γer laban sebεe sniyn xlaf.

31 max i yezre rebbi elli leyye temmexreh yerriθ ettaru, emme raHiyl etteruwc. 32 taru leyye efruwx tsemmaθ rawbiyn (meεnahe enzi memmi.) εlexaTer tenne: «rebbi yezre eεeniyw, uture eryaziyw δeyyexs.» 33 taru efruwx xlaf ten: «εlexaTer rebbi yesle elli nette eyyexsiyc, yuwciyδ wahen xlaf.» tsemmaθ cemεuwn. 34 taru efruwx xlaf ten: «ture eryaziyw δeyeδwel yemmeqqen δiyye exθer εlexaTer iruwγes tlaθe δidrari.» heδake εlac tsemmaθ lawiy. 35 taru efruwx xlaf ten: «ture δeHemde rebbi.» heδake εlac tsemmaθ yehuwδa, ubeεδ tbeTTel arew.