1 inabe isHaq yeεquwb ibarex δiys yweSSaθ: «eθeγec seg tifrax n kenεan. 2 ekker berre y teHmiylt n eram, y elHuwc n betuwYiyl daddes n yemmex, taγeδ temeTTuwθ esyiyn, seg tifrax n laban enjes n yemmex. 3 eybarex δiyx rebbi elqader yxeθθer ezzerriεθex usinc eθeδewleδ egget ettimuwre. 4 yuwcex elberxeθ n ibrahiym, icex didreriyx beεδex, bac e θurθeδ elqeεεeθ elli cex ture δeberrani, elli yuciθ rebbi y ibrahiym.» 5 usiyn yuzen isHaq yeεquwb yexDem y teHmiylt n eram, y etwali laban memmis n betuwYiyl lerami enjes n rifqeh y emmes n yeεquwb dεiysuw.

6 max i yezre εiysuw elli isHaq ibarex g yeεquwb yezent y teHmiylt n eram bac e yeγ esyiyn, welli max i barex δiys yweSSaθ yennes: «eθeγec seg tifrax n kenεan.» 7 welli yeεquwb yesle edwi n daddes dyemmes yexDem y teHmiylt n eram, 8 yexez εiysuw elli tifrax n kenεan uHecneθ g tiT n daddes isHaq. 9 yexDem y ismaεiyl memmis n ibrahiym yaγ yelliys meHelle weltmas ennebayuwt f elwecunes tiddiyn.

10 elweqθes yeffeγ yeεquwb seg biyr sebεe yexDem y Haran, 11 yeweD g weggez n tefuwθ ywemxan yqam tγaγet esyiyn iHuTTiθ seddu ixfes yenεes diyn, 12 yezer g tirjiyθ esselluwm yemmerxez g elqeεεeθ wellexres g esme, utay elmleyxaθ n rebbi ettelyen ettegzen felles. 13 rebbi ykan ibed δenyes yennes: «neč δrebbi erreb n ibrahiym daddex derreb n isHaq! elqeεεeθ elli tettekkiyδ felles δettuwce icex didreriyx. 14 uδeθexθer ezzerriεθex emecal n elqeεεeθ, uδeθeθwesεeδ yelγerb deccerq yecmal deljenuwb, δesθbarxen essix didreriyx leεbaδ n elqeεεeθ elkul, 15 tay neč iyδex, δeεusse fellex elmeniy eθexDmeδ, rejjeεγex y elqeεεeθe. exettedjiyγc elδexege elli uεeδγex essis.» 16 ifaq yeεquwb seg enuddemes yen g ules: «rahu rebbi dahen uneč mefibeliyc.» 17 yukkeδ yen: «yessekkeδ emxane! wahen mbelHeq δelHuwc n rebbi delbab n esme.» 18 elweječe yekker yeεquwb bekri, yesbed tγaγet elli yenεes felles, yenγel felles uwδi, 19 ysemme emxandiyn biytiyl (meεnahe elHuwc n rebbi), weθkan ettemsemme qebl luwz 20 yuεeδ yeεquwb elweεδeθ, yen: «iδekan rebbi iyδi eyεus felle uggebriδ elli δeθuyuwre δiys, yuwciyδ eγrum eθeče dedbac n wariD, 21 erejεe labas y elHuwc n dadde, elweqθes eykuwn erreb δrebbi y neč. 22 weθγaγette elli sbeddat δeθkuwn δelHuwc n rebbi, welli δeyettuwceδ elkul δexuwce essis elεcer.»