seyyedne ibrahiym ysemneε luwT
1 g elweqtdiyn, emrafel elmlek n cenεar deryuwk elmlek n alasar dkederleεewmer elmlek n εiylam ettedεal elmlek n juwyiym. 2 xDemen δeHarben bareε elmlek n seduwm dbercaε elmlek n eεmuwreh dcinab elmlek n edmeh dcemiber elmlek n eSbuwyiym delmlek n baleε elli teδwel δSuwγer. 3 y iyhen elkul emlaymen g esuwf n esseddiym elli nette δiylel n tisent. 4 eqqiymen eθnac n esne xeδmen g kederleεewmer ugusukkes θleTTac enneDen felles. 5 usiyn g usukkes erbeεtac emlaymen kederleεewmer dlemluwk elli iyδes eγelben ireffiyyen g εectaruwθ qernayim, dizuwziyyen g ham, dimiyyen g teHmiylt n qiryetayim. 6 diHuwriyyen g eddehrθensen sεiyr eθbεenten y teHmiylt n faran g elHed n eSSeHreθ. 7 g webriδ n warjeε θεedden f εiyn micfaT, elli teδwel δqadec, exlen θemuwreθ n elεemalqe elkul delemuwriyiyn elli εemren g HeSSuwn tamar. 8 yeffeγ elmlek n seduwm delmlek n eεmuwreh delmlek n edmeh delmlek n eSbuwyiym delmlek n baleε elli teδwel δSuwγer. emHarben g esuwf n esseddiym. 9 nihnin dkederleεewmer elmlek n εiylam ettedεal elmlek n juwyiym demrafel elmlek n cenεar deryuwk elmlek n alasar, g eSSed n erbεe δlemluwk δimeqqaren, xemse δlemluwk δimezyanen efγen δeHarben. 10 esuwf n esseddiym ykan iεebbe anu n ezzeft, max i ruwlen lemluwk n seduwm deεmuwreh, negzen bac e εeglen. emme elbaqi erwelen y edhari. 11 lemluwk lerbεe iwiyen kul cey seg seduwm deεmuwreh Hette δeče, exeDmen. 12 iwiyen zade luwT memmis n yuwwes n ebram elli iεemmer g esduwm. ewyen elli γers elkul exDmen. 13 iyjen seg ihelli mneεen yuseδ y ebram elεibrani elli elyuwc iεemmer y etwali eccejreθ n elbeluwT egli n memra elemuwri yuwwes n eckuwl dεaner elli θfahmen δeεewnen beεDhum g elHerb. 14 max i yesle ebram elli memmis n yuwwes iwyent, inabe elεzerre imδerben elli emmarwen g elHuces elkul welεδeδensen tlaθe miyye uθemenTac yeθbeεθen eδeyaweδ y dan. 15 g δeggiyδ, ebram izuwn elli iyδes eγlbenten HaSrenten elHuwbe cemal dimecq. 16 yaγeδ elli iwyent elkul dluwT memmis n yuwwes delli ywinasθ elkul delwacun dleεbaδ elkul.
melkiSadeq
17 beεεeδ iyeγleb kederleεewmer dlemluwk elli iyδes, ebram yrewweH elmeniy iykan iεemmer. g webriδes yeffeγes elmlek n seduwm bac e θilaqe g esuwf n ecwe elli yeδwel δesuwf n elmlek. 18 usiyn yuγeδes melkiSadeq elmlek n saliym elli ykan iδukke f ellesm n midden ezzaθ n rebbi elli kamel eεle, eγrum decrab. 19 ibarexθ yennes: «eybarex δiyx rebbi elli kamel eεle elli yexleq esmawaθ delqeεεeθ. 20 wetbark elleh elli yuγeδ elεδewwex y etwali ifesnex.» yuwces ebram elεcer n elli yiwiθ. 21 yaxi elmlek n seduwm yennayes y ebram: «uciyδ leεbaδ berk, tedjeδ elbaqi icex.» 22 yennes ebram: «eθjulle y rebbi elli kamel eεle elli yexleq esmawaθ delqeεεeθ 23 elli elliwiyac Hette δtilelli n eSSebbaĎ δegliyx bac e lteqqarec, <neč erriyγ ebram δemuγni.> 24 δeθewye kan δmette ečen elεzerre δelbay n iryazen elli xDemen iyδi, εaner deckuwl dmemra yelzem eδewyen elbeyensen.»