yeεquwb eybarex idrari n yuwsef
1 beεδ liyyameθ xlaf ennanes y yuwsef: «daddex δmaDun.» yawi yuwsef idreriys essenniyn menesse defrayim iyδes yemreq. 2 ennan y yeεquwb: «memmiyx yuwsef yuseδex.» yeθHemmel eTTen yekker yeqqiym f esriyr. 3 yenne yeεquwb y yuwsef: «rahu rebbi yeθheyYiyδ g luwz g elqeεεeθ n kenεan wibarxi. 4 ubeεδ yennayi, taye δesexeθre ezzerriεθex usinc esuwfγe s iδemnex leεbaδ egget usinc eδuwce y idreriyx elqeεεeθe θahen diyme. 5 uture, mani idreriyx efrayim dmenesse elli tirwetten g miSr qebl n elli exeddase nihnin δidreriyw uδeyyuwrθen emruwban dcemεuwn. 6 yemenni idreriyx elli δentarweδ beεδ iyhen, emmeHsben δidreriyx cex weHδex. usinc eδuwrθen ewmeθnensen menesse defrayim. 7 lexaTer elweqθelli neč rajeε s ijiyman n aram θemmuwθ raHiyl g elqeεεeθ n kenεan g webriδ ezzaθ n efrat. elweqθes erδmext diyn g webriδ elli yettawi y efrat elli etsemmanteθ ture <biytleHm>»
8 yenzi yeεquwb y idrari n yuwsef welbeεδ yenceδti: «δ wiyn iyhen?» 9 yennayes yuwsef: «nihnin δidreriyw elli yuceyiyθen rebbi dah.» yenne yeεquwb: «esqerrebθen etweliyw entbarxe.» 10 elweqθes ebδaneθ TiTTawin n yeεquwb eεyaneθ s elkber ulitgeddec eyenzi belgde. yeg sah yuwsef yqerrebθen etweliys, ykubbin yeεquwb yγemmerθen. 11 welbeεδ yenne yeεquwb yyuwsef: «etεilekexc elli δedyes as usinc exezreγ yemenni rebbi isexni idreriyx zade.»
12 welbeεδ ysikkerθen yuwsef s elεeb n daddes yerkeε nette ezzeθes f elqeεεeθ. 13 yeTTef yuwsef efrayim s elymines yesbeddi f elysar n yeεquwb welbeεδ yeTTef menesse s elyseres yesbeddi f elymiyn n yeεquwb. 14 yemenni yezzel yeεquwb ifesnes δimxalfen belεani iHuT y elimines f iyxef n efrayim emezyen welyseres iHuTTiθ f iyxef n menesse emenzu. 15 ibarex yuwsef yenne: «rebbi elli Ďewεenti lejδeδiyw ibrahiym disHaq, rebbi elli yettelhe essi s elli emmarwe elwasse, 16 rebbi elli imenεi s elmlax seg timuHacin elkul, δeybarex idreriye lessenniyn. esemmen f ellesmiyw dellesm n lejdediyw ibrahiym disHaq usinc entisexθer g elqeεεeθ egget.»
17 yemenni yuwsef eθyeεjiybc elli daddes iHuT efuses n elymiyn f iyxef n efrayim. elweqθes yeTTef afus n daddes δettibeddel s iyxef n efrayim y iyxef n menesse. 18 yenne yuwsef y daddes: «eθegec sah edadde. rahu wahen eyendeγ emenzu. HuT efusex n elymiyn f ixfes.» 19 yemenni daddes elyeqqiylc yen: «neč essene wah ememmiy. neč essene Hette δwahen. δeyeδwel ettemuwreθ ettemeqqarθ yemenni yuwwes emezyen δeyeδwel ekebres widreriys δeδuwlen ettemuwreθ ettemeqqarθ egget.»
20 ybarexθen yeεquwb esses yen: «xenyum δeθexeθrem egget, uleεbaδ δeδuwlen eqqaren <rebbi exyer emefrayim dmenesse.>» usahen ysebbeq yeεquwb efrayim f menesse. 21 welbeεδ yenne yeεquwb y yuwsef: «neč qriyb emmuwθe yemenni rebbi δeyeqqiym iyδwem usinc δexenyer yelqeεεeθ n midnewwem. 22 utaye neč uciyγex elbay n elqeεεeθ δezzayeδ f ewmeθnex. iwyexθi s essifiyw delqusiyw seg imuwriyyen.»